Ана Винтур се повлече од функцијата уредник на американскиот „Вог“ по 37 години

Ана Винтур, долгогодишната уредничка на списанието „Вог“, објави дека изданието, во сопственост на „Конде Наст“, ​​бара нов раководител на уредничката содржина за своето американско издание. Лицето кое ќе ја преземе оваа новосоздадена позиција ќе управува со дневното уредување на списанието, кое со децении се смета за најголем авторитет во модната индустрија и иницијатор на модните трендови.

Винтур, која моментално е глобален уредник на „Вог“ и главен директор за содржини на „Конде Наст“, ​​презеде проширени одговорности пред четири години, по големата реорганизација на компанијата. Другите пазари - вклучувајќи ги Јапонија, Велика Британија и Франција - веќе имаат свои посветени директори на уредничката содржина.

Која е жената што го промени модното новинарство и индустријата?

Ана Винтур е едно од највлијателните имиња во историјата на модната индустрија. Родена во Лондон во 1949 година. Својата кариера ја започнала во британските модни и лајфстајл списанија пред да биде назначена за главен уредник на американскиот „Вог“ во 1988 година - позиција што ја држеше континуирано 37 години. Под нејзино водство, „Вог“ прерасна од елитно модно списание во глобална медиумска сила што ги обликува вкусовите, кариерите и индустриите.

Но, нејзиното патување во светот на модата не беше без предизвици, иако таа имаше интуиција каде сака да биде многу рано. Го започна на 15-годишна возраст, кога нејзиниот татко, уредникот на „Бритиш Ивнинг Стандард“ ја обезбеди нејзината прва работа во влијателната продавница „Биба“ (Biba) . По школувањето во Северен Лондон, таа се обучуваше во „Хародс“, а истовремено посетуваше и часови по мода, но набрзо се откажа, тврдејќи дека „или ја познаваш модата или не“. Својата прва пракса во списанија ја доби додека работеше во контроверзното списание „Оз“ (Oz). Во 1970 година, кога „Харперс базар“ (Harper's Bazaar UK) се спои со списанието „Квин“ (Queen), Винтур ја започна својата кариера како помошник-уредник и оттогаш јасно стави до знаење дека сака да биде уредник на „Вог“. По конфликт со ривал, се пресели во Њујорк и продолжи да работи како моден уредник во „Харперс базар“, но набрзо беше отпуштена поради нејзините иновативни пристапи.

Подоцна работеше како моден уредник во списанието „Вива“ (Viva), а потоа, по кратка пауза и врска со француски продуцент, се врати на сцената како моден уредник за „Сави“ (Savvy) и „Њујорк магазин“ (New York Magazine), каде што за прв пат го покажа својот талент за тогаш иновативната комбинација на мода и познати личности на насловните страници.

Во 1983 година, се пресели во „Конде Наст“ (Condé Nast), каде што по преговорите ја прифати позицијата креативен директор на „Вог“, а во 1985 година стана уредник на британскиот „Вог“, каде што воведе големи промени и го доби прекарот „Нуклеарна Винтур“ поради нејзината решителност и строгост. Нејзините иновации го насочија списанието кон модерна, деловна жена, различна од традиционалниот модел на публиката што читаше ваков тип списание. Потоа, го презема списанието „Хаус енд Гарден“ (House & Garden) во Њујорк и драстично го менува неговиот концепт, но без успех. Една година подоцна, во 1988 година, таа стана уредничка на американскиот „Вог“, каде што успеа да го врати списанието на врвот на модните списанија, користејќи ја својата формула за силно поврзување на модата со познати личности.

Винтур е позната по својот препознатлива боб фризура, темни очила и бескомпромисен уреднички став. Во светот на модата, нејзината проценка честопати имаше предност пред пазарните трендови, а кариерите на дизајнерите, фотографите, моделите и уредниците во голема мера зависеа од нејзиното одобрување. Таа започна бројни кариери - од Џон Галијано и Александар Меквин, до Марк Џејкобс и Том Форд - препознавајќи го талентот пред тој да стане глобално признат и прифатен.

Винтур беше и движечка сила во премостувањето на јазот помеѓу високата мода и популарната култура. Под нејзино водство, „Вог“ почна да прикажува поп-ѕвезди, актерки и културни икони на своите насловни страници, наместо исклучиво модели. Оваа стратегија ја редефинираше улогата на модните списанија во поширокиот медиумски пејзаж.

Но, нејзината моќ оди подалеку од печатените медиуми. Како долгогодишна претседателка на Мет Гала - најважната модна добротворна вечер во светот - Винтур го претвори настанот во спектакл што ги комбинира уметноста, модата, политиката и славните личности. Под нејзино водство, Мет Гала прерасна од њујоршка културна ниша во глобален културен феномен.

Во 2020 година, Винтур беше унапредена во главен директор за содржини на „Конде Наст“, задолжена да ги води уредничките стратегии на сите брендови на компанијата низ целиот свет. Во овој капацитет, таа одигра клучна улога во трансформацијата на традиционалното издаваштво во дигитални и мултимедијални платформи.

И покрај контроверзиите, критиките дека таа охрабрува ексклузивност и елитизам во модата, како и повремените тензии во редакцијата, нејзиното влијание е несомнено. За многумина, Ана Винтур не е само уредник - таа е институција.

Повлекувањето од нејзините секојдневни должности во „Вог3 не значи крај на нејзиното влијание. Како жена која го диктираше ритамот на модната индустрија со децении, останува симбол на непоколеблив вкус, уредничка визија и културна моќ. Како што дознаваме, таа останува на чело на сите брендови на компанијата на глобално ниво - вклучувајќи ги „Вајрд“ (Wired), „Венети феир“ (Vanity Fair), „Џи-Кју“ (GQ), АД (AD), „Конде Наст травелер“ (Condé Nast Traveler), „Гламур“ (Glamour), „Бон Апетит“ (Bon Appétit), „Татлер“и други, со исклучок на „Њујоркер“ (New Yorker). Сите овие брендови се дел од медиумската империја на семејството Њухаус. По објавувањето на одлуката, Винтур остана верна на својот иконски стил, давајќи смела модна изјава во цветен топ, шарено здолниште и светло жолти сандали, седејќи во првиот ред на ревијата на Марк Џејкобс за есен 2025 за време на Неделата на модата во Њујорк пред некој ден.

Се снима продолжението на филмот што засекогаш го промени светот на модата

Токму нејзиниот лик послужи како инспирација за познатата уредничка Миранда Пристли, која мајсторски ја играше Мерил Стрип во филмот од 2006 година „Ѓаволот носи Прада“, базиран на романот на Лорен Вајсбергер, поранешна асистентка на Винтур во „Вог“. Приказната следи млада и амбициозна девојка (Ан Хатавеј) која влегува во светот на високата мода под водство на застрашувачки шеф. Стрип доби номинација за Оскар за оваа улога, а ликот на Миранда Пристли стана синоним за безмилосни шефови во која било индустрија.

Интересно е што Винтур не била секогаш воодушевена што нејзиното име е поврзано со ликот. Во една прилика, таа изјавила дека филмот е „фикција“, но исто така додала дека го почитува начинот на кој го прикажува трудот и посветеноста потребни за уредување на списание.

Додека Винтур се повлекува од долгогодишната позиција како главен уредник на американскиот Вог, студиото „20th Century Studios“ потврди дека е во тек продолжение. Режијата повторно ја потпишува Дејвид Франкел, а улогите ги репризираат Мерил Стрип, Ен Хатавеј, Стенли Тучи и Емили Блант, чија кариера започна благодарение на овој филм. Според достапните информации, Кенет Брана исто така се придружил на екипата на продолжението, кое моментално се насловува „Ѓаволот носи Прада 2“.

Патем, уреничката е позната и по тоа што ужива бројни привилегии, вклучувајќи возење во „Мерцедес Бенц С-класа“ со возач, и во Њујорк и во странство, и месечен буџет за купување од 200.000 долари, како и престој во апартманот „Коко Шанел“ во хотелот Риц во Париз за време на Европските недели на модата. Претседателот на „Конде Нест“, Самуел Ирвинг Њухаус Џуниор, ѝ обезбедил бесплатен заем од 1,6 милиони долари за да купи куќа во Гринич Вилиџ во Њујорк. Нејзината плата била исто толку привлечна колку и нејзиното влијание - во 2005 година изнесувала околу 2 милиони долари годишно.

Во моментов нема коментари за веста. Биди прв да коментира...

Остави коментар