„Гранит“ го зголеми профитот за 65 проценти

„Гранит“ АД Скопје за периодот јануари-септември 2023 година оствари добивка од 129 милиони денари (2,1 милиони евра), што е зголемување за 65 проценти во однос на истиот период минатата година кога добивката на компанијата изнесувала 78,6 милиони денари(1,2 милиони евра),  покажува консолидираниот биланс на успех на компанијата објавен преку Македонската берза.

 Од „Гранит“ информираат дека остварените консолидирани вкупни приходи во периодот јануари-септември во споредба со остварените во истиот период 2022 година бележат зголемување за еден процент.  Приходите од продажба за периодот јануари-септември 2023 година во споредба со остварените во истиот период 2022 година бележат зголемување за пет проценти.  Финансиските приходи бележат намaлување за 18 проценти.

Остварените консолидирани вкупни расходи во периодот јануари-септември споредено  со истиот период 2022 година бележат намалување за 0,5 проценти. Во рамките на оперативните расходи, трошоците за материјали и суровини бележат намалување за четити проценти во однос на минатата година. Трошоците за вработени се зголемени за 8 проценти.

„Постоечката криза во Украина со Русија, енергетската криза со значајното зголемување и варирање на цените на главните енергенси и материјали (струја, гас, нафта, железо), како и инфлацијата со порастот на општите цени имаат и се‘ уште ќе имаат влијание врз светската економија, а следствено на тоа и врз македонската економија во наредниот период. Влијанијата ќе имаат ефект посебно врз зголемување и нестабилност на цените на одредени суровини и материјали, енергија, а преку тоа и врз крајните цени на многу производи.“, велат од „Гранит“.  

Инаку, според анализата за градежниот сектор што неодамна ја подготви аналитичкиот тим на „Блумберг Адрија“, „Гранит“ беше вброен меѓу најголемите во Македонија и регионот. Анализата покажа дека  макровлијанијата и деловните активности на овие компании во 2022 година резултираа првенствено со намалување на просечната EБИТДА-маргина за компаниите што работат во сегментот на станбена изградба за два процентни поени и 1,3 процентни поени за компаниите од нискоградбата. Просечната EБИT-маргина исто така е намалена, и тоа во високоградбата за 1,1 процентен поен и за 1,5 процентни поени за сегментот на нискоградбата.

Анализата покажа дека по тешките денови од времето на пандемијата во 2020 година, во 2021 година компаниите закрепнаа. Закрепнувањето е повисоко кај компаниите од земјите што имаат повисоки приходи, што е резултат на зголемените инвестиции во текот на 2021 година.

Аналитичарите објаснуваат дека иако првичните проекти во урбаните јадра можеби нема веднаш да ги постигнат целите за профит поради повисоките трошоци поврзани со локацијата, логистиката и поквалитетните материјали, тие служат како стратегиска потпора за идните проекти за постигнување на посакуваната профитабилност.

„Урбанизацијата доведува до потреба од проширување на градовите, создавајќи потреба од нова инфраструктура и згради. Тоа се одразува позитивно на компаниите од градежниот сектор што остваруваат продажба со вршење работи за реконструкција и изградба на патишта и пристапни патишта до веќе изградени инфраструктурни објекти“, пишува во анализата.