.webp){kind=icon}
Оптимистички податоци стигнаа вчера од Германија. Тамошната статистика објави дека нарачките во фабриките неочекувано се зголемија сигнализирајќи мало закрепнување додека најголемата европска економија се бори со индустрискиот пад.
Побарувачката пораснала за 8,9 отсто во декември во однос на претходниот месец. Овој раст и пркоси на просечната процена на економистите за пад од 0,2 отсто и се должи на големите нарачки. Да немаше толку нарачки, падот ќе изнесуваше 2,2 отсто, објави Дестатис.
Добро утро, ова се најважните пет вести за денеска.
Пад на прометот на регионалните берзи, можат ли да го спасат обврзниците?
Граѓанските или таканаречените народни обврзници и државни записи што беа издадени во текот на минатата година на пазарите на капитал привлекоа и доста неискусни мали инвеститори, но тоа не се одрази на прометот на регионалните берзи. Љубљанската и Белградската берза лани имале за 100 милиони евра односно за 145,9 милиони евра помалку промет од претходната година. Причина за намалениот промет, според експертите, е тоа што немало вонредни настани како војни или пандемии.
Иако минатата година на берзите беше доста раздвижена во однос на приносот на домашните индекси и издавањето државни записи и обврзници, на повеќето регионални берзи е забележано помало тргување, со исклучок на Бања Лука и Сараево.
Нема зима за македонските инвестициски фондови
Нето-вредноста на средствата на отворените инвестициски фондови во Македонија на крајот на четвртиот квартал од 2023 година достигнаа 13,5 милијарди денари (219 милиони евра), што е зголемување од 2,4 милијарди денари (39 милиони евра) или за 21,7 процент во однос на истиот период претходната година, покажуваат новите податоци на Комисијата за хартии од вредност (КХВ).
Во четвртиот квартал од 2023 година зголемувањето на вкупната нето-вредност на средствата на инвестициските фондови изнесува околу 1,1 милијарда денари (19 милиони евра), што е за 9,6 проценти повеќе отколку во претходниот квартал.
Датумот за намалување на стапките е само почеток на дилемите за ЕЦБ
Кога да започне намалувањето на каматните стапки е само првата точка во дебатата меѓу креаторите на политиката на Европската централна банка (ЕЦБ), кои исто така изгледаат подготвено да се пречкаат околу тоа како точно да го повлечат досега невидениот потфат за монетарно затегнување.
Официјалните лица моментално размислуваат дали да започнат со кратења во април или во јуни – релативно едноставна одлука, со оглед на тоа што тие исто така мора да ја одмерат големината на нивните чекори, колку брзо сакаат да продолжат и каде ќе завршат трошоците за задолжување.
Грчката стратегиска инвестиција ќе ја земени централата ТЕ-ТО
Државно земјиште, банкарски гаранции, финансиска помош од државата и ослободување од еколошки даноци се некои од поволностите што ќе ги добијат четирите стратегиски инвеститори за изградба на капацитети од обновливи извори. На брифинг со новинарите вицепремиерот за економски прашања Фатмир Битиќи и директорот за развој и инвестиции на ЕСМ, Виктор Андонов, појаснија дека преговорите со овие инвеститори траеле повеќе од две години, а придобивката од овие инвестиции е енергетска независност на државата.
Грчката компанија „Митилинеос“, која ќе треба да изгради нова централа на просторот на поранешна „Железарница“, ќе добие од државата 49 милиони евра, во рок од пет години, за кога е најавена и целосната изградба на централата. Со инсталирана моќност за производство на електрична енергија од 130 до 165 мегавати и топлинска енергија од 90 до 105 мегавати, оваа инвестиција, според Битиќи, би ја исклучила од пазарот скопската когенеративна централа ТЕ-ТО.
Србија атрактивна за македонските работници, кои од први март ќе може слободно да се вработуваат
Од 1 март стартува заедничкиот пазар на труд меѓу Македонија, Албанија и Србија. „Од македонска перспектива за очекување е дека одреден квантум вработени би можеле да се прелеат на подобро платени места, пред сè во соседна Србија, која има многу подобри проекти и инвестициски зафати“, вели Трајан Ангелоски, претседател на ССКМ, во интервју за „Блумберг Адрија“.
„Во овој временски период, во овој процес на движење на работната сила во делот на Отворен Балкан, пред сè очекуваме движење на работна сила од Македонија кон Србија. Но тоа е нормален процес. Во друг временски период, ако има повеќе економски активности, а логично е дека ќе мора да ги создадеме, секако ќе има и луѓе од Србија што ќе дојдат да работат во Македонија“, посочува Ангелоски.
