Членовите на одборот на ЕЦБ велат дека каматите ќе продолжат да растат

„Европската централна банка (ЕЦБ) и натаму треба значително да ги зголемува трошоците за задолжување за да може да се справи со рекордниот раст на цени, дури и покрај веројатноста дека еврозоната може да влезе во рецесија“, вели Мартинс Казакс, член на Управниот одбор.

„Каматните стапки ќе продолжат значајно да растат. Секако дека неизвесноста е многу голема, особено во врска со војната во Украина. И другите централни банки исто така ги подигнуваат каматните стапки за да ја забават инфлацијата“, изјави Казакс за една летонска телевизија во пресрет на конференцијата во Рига. Коментарите доаѓаат по низата јавни настапи на надлежните од ЕЦБ, додека инвеститорите и економистите размислуваат за двојните предизвици со кои се соочуваат, рекордна инфлација и веројатен економски пад во еврозоната, што е резултат главно на енергетската криза предизвикана по руската инвазија врз Украина.

Десет од 25 членки на Управниот одбор одржаа говор во рамките на конференцијата неколку дена по објавата на податоците што покажаа дека потрошувачките цени пораснале за 10,7 отсто, повеќе отколку што се очекуваше, а пет пати повеќе отколку посакуваната цел. Фокусот сега е на тоа што ќе се преземе во следниот месец на завршниот состанок.

Не се во прашање само каматните стапки, кои минатиот месец се удвоија на 1,5 отсто во најагресивниот циклус на монетарно заострување во историјата на ЕЦБ, туку и фактот дека и натаму заостануваат зад САД. Банкарите исто така расправаат и за тоа како да ги намалат речиси пет илјади милијарди долари вредните обврзници, купени како стимул во текот на неодамнешната криза. Планот е дека на состанокот во декември ќе се договори тој процес, познат како квантитативно заострување.

Членот на Управниот одбор на ЕЦБ, Фабио Панета, предупреди на несакани последици поради брзото зголемување на каматните стапки.

Говорејќи на конференцијата на пазарот на пари од ЕЦБ, Панета рече дека правецот на монетарната политика е јасен и дека е оправдано дополнително приспособување за да се заузди инфлацијата.

„Ќе мора внимателно да ги разгледаме отпорноста на нашата економија, импликациите од светските монетарни прелевања и новонастанатите закани по финансиската стабилност. Затоа, ајде да водиме сметка за чекорите во приспособувањето на нашата монетарна политика, за да можеме стабилно да продолжиме низ тековните шокови и да ја вратиме економијата заедно со стабилните цени и солидниот раст“, рече тој.

Според членот на Управниот одбор, Казакс, зголемувањето на каматните стапки ќе мора да продолжи до 2023 година.

„Јасно е дека каматните стапки ќе мора да растат многу повеќе, за инфлацијата да се спушти на посакуваните два процента на среден рок. Нема потреба за паузирање. Зголемувањето на каматите мора да продолжи и во наредните години, сѐ додека инфлацијата, особено базичната, не покаже видливо забавување“, рече Казакс на отварањето на конференцијата во Рига.

Тоа е спротивно на растечките ризици од економски пад во Европа.

„По мое мислење, рецесија во еврозоната е основно сценарио, но засега е веројатно дека ќе биде релативно плитка и кратка“, рече Казакс.

Шефот на Централната банка на Летонија, Казакс, предупреди дека кредитите ќе бидат уште поскапи, дури и откако ЕЦБ ќе го заврши последователното покачување на каматните стапки за 75 базични бодови.

„Каматните стапки дефинитивно ќе растат. За позајмувачите кај кои е врзан ЕУРИБОР, ќе станат уште поскапи“ , изјави Казакс за летонската телевизија ЛНТ.

Во моментов нема коментари за веста. Биди прв да коментира...

Остави коментар