Инфлацијата во еврозоната забрзува-се чини дека ЕЦБ има недовршена работа

Забрзаната инфлација во еврозоната, што ќе се обелодени во официјалните податоци следната недела веројатно ќе ги потсети креаторите на политиката дека иако нивната цел од два отсто сега е на повидок, таа сè уште не е на дофат.

Потрошувачките цени веројатно се зголемија за 2,4 отсто во декември во однос на истиот месец претходната година, што е малку повеќе од ноемврискиот резултат. Базичниот показател, кој ја исклучува енергијата и другите нестабилни ставки, веројатно остана на ниво од 2,7 отсто, сметаат економистите.

Ваквиот исход, поттикнат од трошоците за гориво, одново ќе го потенцира предизвикот со кој сè уште се соочуваат претседателката на Европската централна банка (ЕЦБ), Кристин Лагард, и нејзините колеги. Таа неодамна изрази надеж дека инфлацијата ќе ја достигне целта во одреден момент во 2025 година.

Проекциите на ЕЦБ го посочуваат четвртиот квартал од годинава како момент кога може да се постигне целта од два отсто инфлација. Зголемените цени на гасот во последните денови се само еден од елементите што може да ја загрози таа перспектива, додека заканите за американски трговски царини може дополнително да го заматат хоризонтот.

„Постигнавме значителен напредок во 2024 година во намалувањето на инфлацијата и се надеваме дека 2025 е годината кога ќе сме на целта како што се очекуваше и како што е планирано во нашата стратегија. Се разбира дека ќе продолжиме со нашите напори за да обезбедиме стабилна и одржлива инфлација“, рече Лагард пред неколку дена.

Што велат економистите на „Блумберг“?

„Главната слика останува онаа на генерализирана дезинфлација што ќе му овозможи на Управниот совет да продолжи да ги намалува каматите оваа година. Очекуваме олеснување од вкупно 100 базични поени“, вели Џејми Раш, главен европски економист.

Податоците за еврозоната ќе бидат објавени во вторник, истовремено со бројките од Италија, откако претходно, в понеделник Франција и Германија ќе бидат земјите кои ќе објават статистички податоци за растот на цените во декември.

Економистите очекуваат дека сите три земји, Франција, Германија и Италија, ќе покажат забрзување на инфлацијата, како што беше случај со Шпанија во извештајот на крајот на декември.

Минатата недела гувернерот на Банката на Грција, Јанис Стурнарас, предвиде дека ЕЦБ до есен ќе ги намали намали каматите за 100 базични поени. Економистите и инвеститорите гледаат сличен пат за трошоците за задолжување.

Спротивно на тоа, неговиот австриски колега, Роберт Холцман, рече дека креаторите на политиката може да почекаат пред да го направат следното намалување.

„Некои цени на енергијата повторно се во нагорна линија. Но, постојат и други сценарија за тоа како може да се врати инфлацијата, како што е посилна депрецијација на еврото“, изјави тој за весникот „Курир“ (Kurier).

 

Во моментов нема коментари за веста. Биди прв да коментира...

Остави коментар