Фотоволтаици: Има барања за 8.000 мегавати, системот нема да ги издржи

Се исплати ли во Македонија да се инвестира во фотоволтаични централи за производство на струја е прашање што заслужува сериозно внимание во период на разгорување на енергетската криза. Искусни енергетичари укажуваат дека во услови на енормен пораст на цените на енергенсите е оправдано што се повеќе македонски компании инвестираат во вакви капацитети за да обезбедат сигурност во снабдувањето и зелена енергија, но дел од нив потенцираат дека веќе доаѓа до заситеност на пазарот и дека македонскиот енергетски систем не може да ги издржи најавените инвестиции.

Системот не може да издржи 8.000 мегавати

На прашањето во какви енергетски капацитети сега е паметно да се инвестира, Ристо Јаневски, директор за стратегиско планирање и развој во „Окта“ меѓудругото вели дека големи инвестиции во купување земја за поставување фотоволтаици стануваат непотребни.

„Според податоците на МЕПСО и на ЕВН досега има поднесено барања за приклучоци на капацитети за производство на повеќе од 8.000 мегавати струја. Нашиот енергетски систем има капацитет од 2.200 мегавати и никогаш не се користат над 1.600 мегавати“, вели Јаневски.

Тој објаснува дека со реализација на најавените инвестиции во фотоволтаици би се јавила несразмерност.

„Фотоволтаиците работат преку ден и треба да се знае дека системот мора да има  капацитет да ги издржи флуктуациите. Значи, не може вие едноставно да произведете, да ја пуштите струјата низ преносниот систем и таа да се искористи дома или надвор. Веќе има студии кои покажуваат дека капацитетот на нашиот систем е понизок и не би го издржал приклучувањето на најавените фотоволтаици од 8.000 мегавати“, вели Јаневски.

Тој објаснува дека очигледно се јавува заситеност на пазарот од овие извори, но потенцира дека топло препорачува секоја компанија која има потрошувачка на струја да инвестира во фотоволтаици бидејќи е добар начин да се обезбеди енергетска сигурност.

Depositphotos

Златко Черепналовски од ЕДС посочи дека од оперативен аспект немаме премногу енергија за балансирачкиот механизам и дека МЕПСО треба да им постави услов на инвеститорите да обезбедат балансирачка енергија за себе на европскиот пазар за потоа да даде зелено светло за целата постапка за инвестирање.   

„Вие на пример ќе изградите фотоволтаична централа од 100 мегавати на 120-30 хектари земјиште. Ќе добиете и приклучок, ќе почне трговецот да дава физички номинации кон МЕПСО и утре ќе дојде облак. Веднаш ќее ви фалат 50-60 мегавати што за македонскиот систем е многу. Според мене, затоа услов за добивање приклучок за централи со поголем капацитет би требало да биде и да се обезбеди балансирачка енергија“, вели Черепналковски. 

„Окта“ и „Макстил“ инвестираат во фотоволтаици

Јаневски соопшти дека во оваа насока „Окта“ почнала скромно со неколку фотоволатични централи инсталирани на кровови на наши клиенти и дека се размислува за поставување фотоволтаици и на бензинските пумпи.

„Се подготвуваме во самиот двор на рафинеријата да направиме една поголема фотоволтаична централа од 10-12 мегавати. Сите припремни работи како приклучоци и дозволи ни се обезбедени и очекуваме да почнеме со реализација на проектот“, изјави Јанвески.

Драган Мијалковски, директор на погонот челечарница во „Макстил“ соопшти дека компанијата започна процес за инвестирање во фотоволтаици.

„Планираме да инвестираме во фотоволтаична централа инсталирана на кровната конструкција на погоните со капацитет од 15-20 мегавати. Во фаза на изработка сме на физибилити студија, во најскоро време очекуваме да имаме сопствена зелена енергија“, изјави Мијалковски.

Во моментов нема коментари за веста. Биди прв да коментира...

Остави коментар