Од Германија ни зависат четири од пет најизвезувани производи

Голем број од македонските извозници треба да се молат да не се остварат најавите за рецесија во Германија во следната година со оглед на тоа што приближно половина од вкупниот извоз на Македонија завршува во оваа земја. Нашата анализа покажа дека, всушност, четири од пет најзастапени производи во македонскиот извоз главно се продаваат на германскиот пазар и се наменети за автомобилската индустрија.

Неочекуваниот раст на бруто домашниот производ во најголемата европска економија од 0,3 проценти во третото тримесечје од годинава е позитивен сигнал, којшто покажува дека Германија им пркоси на прогнозите за негативен раст и на кризата предизвикана од енормниот раст на цените на енергенсите, недостигот од гас и високата инфлација. Сепак, очекувањата се уште се далеку од оптимистички.

Кои се најзастапени производи во македонскиот извоз?

Катализатори, апарати за филтрирање и сетови на проводници за палење возила се трите најзастапени производи во македонскиот извоз во минатата година, што само го покажува влијанието на производството во фабриките од автомобилската индустрија во слободните економски зони врз домашната економија. Податоците за надворешната трговија на Државниот завод за статистика покажуват дека најголем дел од овие производи се извезуваат во Германија.  

На листата пет најголеми трговски партнери на Македонија, освен Германија која е убедливо на првото место се наоѓаат и Британија, Грција, Србија и Бугарија. Меѓу главните производи коишто се извезуваат во овие земји покрај деловите за автомобилската индустрија се фероникелот, производите од челик, тутунот, електрична енергија, различни видови облека, како и руди на олово, бакар, цинк и други.

Македонија контра песимистичките очекувања

Повеќе меѓународни институции укажаа дека Германија и воопшто земјите од еврозоната се на работ на рецесија и дека е многу веројатно следната година најголемата европска економија да има негативен раст на БДП. Во прилог на ваквите тврдења оди и ПМИ (индексот на менаџерите за набавки) за производството во Германија кој во моментов е под просекот, додека овој индикатор за еврозоната во октомври забележа најголем пад од април 2009 година наваму – што укажува на појава на рецесија.

Една од носечките индустрии во Германија, а која е особено важна за Македонија е автомобилската индустрија. Виктор Мизо, генерален директор „Костал“ на една од најголемите германски инвестиции во земјава од автомобилскиот сектор неодамна за „Блумберг Адрија“ изјави дека за половина година автомобилската индустрија во Европа забележа пад на бројот на регстрирани возила за 17 отсто што е рекорд по 1996 година.

„Постои несигурност за нарачките од нашите европски клиенти во претстојниот период. За премиум возилата кои генерираат најголема профитна маржа постои голема побарувачка, но побарувачката на пониските класи возила е под влијание на економските состојби. Не треба да заборавиме дека се уште е присутен проблемот со недостиг на чипови кој ќе трае до 2024 година“, објаснува Мизо.

Од друга страна, Македонија има зголемените очекувања за извозните нарачки, коишто растат од април 2021 година, што ја прави единствена земја во регионот што покажува отпорност кон трендот на намалување на извозот.

Во моментов нема коментари за веста. Биди прв да коментира...

Остави коментар