Македонските граѓани не се навикнати во првиот ден од ноември да има пролетни температури, кои достигнуваат над 20 Целзиусови степени. Според прогнозите на синоптичарите, невообичаено топлото време за овој период од годината ќе се задржи и во текот на наредната недела, по што би требало да дојде до мало опаѓање на температурите. Во период кога светот се соочува со енергетска криза, а цените на енергентите уриваат рекорди, топлото време во ноември им оди во прилог на голем број домаќинства, кои засега успеваат да заштедат, бидејќи сѐ уште не мора да ги затоплуваат домовите или го прават тоа само повремено. Никој не може со сигурност да каже каква зима нѐ очекува и колкави ќе бидат потребите за енергенти за затоплување на домовите. Сепак, податоците од долгогодишните мерења на температурите на воздухот и врнежите на дожд и снег укажуваат дека климатските промени се веќе тука и дека во иднина тоа ќе донесе и промени во потребите за затоплување на домовите, односно за топлинска енергија.
Снемува снег во градовите
Демир Капија е единствениот град во Македонија во кој лани имало повеќе денови со појава на снег во однос на просекот од периодот 2016-2020, покажуваат податоците на Државниот завод за статистика. Во сите други градови во кои се вршени континуирани мерења лани имало значително намалување на бројот на снежни денови во однос на повеќегодишниот просек.
Прочитај повеќе
Европејците во очај се враќаат кон огревното дрво
Цените на дрвените пелети се речиси двојно зголемени на 600 евра за тон во Франција
08.10.2022
Криза на пазарот: доаѓа време кога „пелети со пари не се купуваат“
Во моментов пелети се увезуваат од Турција, домашното производство покрива само 20 отсто од потребите
11.10.2022
Хелсинки пронајде необичен извор на енергија за греење-ладна морска вода
Проектот е вреден 400 милиони евра, а системот ќе покрие 40 проценти од потребите на главниот град
22.10.2022
Науката дефинира дека Македонија е под влијание на две зонални клими, медитеранска и континентална, и една локална, планинска клима. Дејствата на зоналните и локалните климатски влијанија се комбинираат меѓусебно, што создава посебни локални климатски карактеристики во одделни делови на државата. Како регион со највисоки просечни температури се издвојува крајниот јужен дел на Македонија, по долината на реката Вардар, односно Гевгелиско-валандовската котлина што се протега до Демир Капија на север. Овој регион е под силно термичко влијание на Егејско Море, со средна годишна температура на воздухот до 14 Целзиусови степени и повеќе.
Како најстудени региони, со најниски просечни температури на воздухот, се издвојуваат високите котлини, како Беровската котлина, и високите планински места, кои се под директно влијание на локалната планинска клима, со средна годишна температура на воздухот под 10 Целзиусови степени.
Сепак, мерењата покажуваат промени. Имено, како што е наведено во „Стратегијата за животна средина и климатски промени 2014-2020“, со исклучок на 2011 година, во периодот меѓу 2007 и 2012 година се забележани најтоплите години од 1951 година наваму, а топлотни бранови се евидентираат речиси секоја година од 1987 година.
Најголем број домови се затоплуваат со огревно дрво
Како што е истакнато во повеќе документи и стратегии за климатските промени, овој феномен освен преку бавно затоплување на воздухот во наредните декади, ќе биде изразен и преку појава на екстреми во временските услови, односно интензивни но краткотрајни врнежи од дожд (поплави), периоди со многу високи температури (суши) и периоди со многу ниски температури. Според очекувањата, полека ќе исчезнуваат, условно кажано, цврстите граници меѓу годишните времиња. А тоа, очигледно, веќе се случува.
Од аспект на актуелната енергетска криза и климата, невообичаено топлото време за овој период од годината сега е поволно за поголемиот број домаќинства во земјава што ги затоплуваат домовите со помош на печки на дрва. Овие денови, тие успеваат да заштедат поради високите температури за разлика од оние што се поврзани со централно парно греење и кои посредно веќе ги плаќаат зголемените цени на гасот и другите енергенти со кои се загреваат градските топлани.
Притоа, треба да се напомене дека Владата уште во август годинава, кога беше трката за набавка на огревно дрво и пелети, ги ограничи маржите на трговците за да се спречи искористување на енергетската криза како алиби за брза заработка на грбот на граѓаните. „Блумберг Адрија“ веќе пишуваше дека на македонскиот пазар се јавува недостиг од пелети, главно поради тоа што повеќе земји од соседството го ограничија извозот за да ги заштитат домашните пазари. Кога станува збор за климатските промени, препораките на екологистите се дека трендот на затоплување на домовите со цврсти горива мора да се искорени, бидејќи тоа е еден од главните загадувачи на воздухот во градските средини.
.webp){kind=icon}
