.webp){kind=icon}
Од јануари до ноември 2022 година, Регулаторната комисија за енергетика и водни услуги (РКЕ) издала лиценци за производство на електрична енергија од обновливи извори за околу 200 електроцентрали, а со инсталираниот капацитет, како што соопшти, може да се задоволат потребите на 27.100 домаќинства.
Според РКЕ, најголем интерес има за производство на електрична енергија од фотонапонски електроцентрали.
„Досега оваа година имаме издадено лиценци за 86,8 мегавати инсталиран капацитет од фотонапонски електроцентрали, додека 6,4 се за мали хидроцентрали и 2,5 мегавати за термоелектроцентрали на биогас, или вкупно се издадени лиценци со предвидено просечно годишно производство на електрична енергија од обновливи извори на електрична енергија на ниво од 95,7 мегават-часа. Овие електроцентрали се приклучени на електродистрибутивната мрежа“, информира РКЕ.
Регулаторната комисија оценува дека ова количество на електрична енергија од над 95 мегават-часа од обновливи извори на енергија, гледано во апсолутен износ, е и повисоко од производството на ХЕЦ Козјак и со него може да се задоволат потребите за 27.100 домаќинства.
„Ваквите приватни иницијативи во време на енергетска криза се покажаа како решение за многу стопанственици што со инсталирање фотонапонски електроцентрали ги намалија значително трошоците за електрична енергија и произведената електрична енергија ја користат за задоволување сопствени потреби. Во сончеви периоди и денови овие потрошувачи што имаат инсталирано фотонапонски електроцентрали во најголем дел ги задоволуваат сопствените потреби и поради тоа немаат потреба да набавуваат електрична енергија од снабдувачите со електрична енергија и истата таа да ја плаќаат“, вели претседателот на РКЕ, Марко Бислимоски.
