„Нетфликс“, „Гугл“, „Фејсбук“ ќе мора да плаќаат ДДВ во Македонија

„Нетфликс“ (Netflix), „Гугл (Google)“, „Мета“ (компанијата што стои зад Фејсбук и Инстаграм), „Епл“ (Apple) сите ќе плаќаат данок на додадена вредност (ДДВ) во земјава. Ова е предвидено во измените во Законот за ДДВ, кои се во собраниска процедура. Според текстот на Законот, данокот во име на овие компании ќе го плаќаат даночни застапници, и тоа од 1 јули годинава.

На пример, досега за да ги гледате омилените серии на „Нетфликс“ плаќавте електронски. Од тие пари компанијата што нуди услуга во земјава не ѝ плаќаше данок на државата. Слично е и со некоја апликација што сте ја симнале од „Плеј стор“ (Play store) и за тоа сте ѝ платиле на компанијата, но таа не ѝ платила данок на Македонија.

Ова треба да се смени од 1 јули годинава, до кога овие компании имаат обврска да изберат даночен застапник што во нивно име ќе плаќа данок кон македонската Управа за јавни приходи (УЈП).

„Овие измени кај законот за ДДВ, покрај другото, предвидуваат обврска за странските компании што немаат седиште или подружница на територијата на РСМ а вршат промет на добра и услуги на територијата на РСМ,  што подлежи на оданочување со ДДВ, да назначат даночен застапник, кој ќе има обврска во име и за сметка на  странското лице да врши пресметување на данокот на додадена вредност, поднесување даночна пријава за плаќање ДДВ  и за плаќање камата во случај на задоцнето плаќање на ДДВ, како и да води евиденциски обврски во име на странското лице. Назначувањето ќе се врши  со поднесување пријава за регистрација за целите на данокот на додадена вредност заедно со  потребната докумeнтација до Управата за јавни приходи“, ни одговорија во УЈП.

Законите што треба да донесат 150 милиони евра во буџетот – заглавени во Собрание

Измените се дел од законите што беа предвидени со даночната реформа што требаше да стапи во сила на почетокот на оваа година. Но, од сите закони, досега е донесен само Законот за персонален данок. Законите за данок на добивка и за ДДВ се заглавени на второ читање пред собраниската комисија за финансирање и буџет.  

Даночната реформа требаше да обезбеди 70 милиони евра дополнителни средства во буџетот за оваа година.

Во согласност со податоците на Министерството за финансии, за извршување на буџетот во првите два месеца од оваа година се собрани помалку пари од ДДВ од лани, и покрај високите цени и инфлацијата. Заклучно со февруари во буџетот влегле 169,7 милиони евра од овој данок или над 11 милиони евра помалку споредено со лани, кога сè беше поевтино.

Инаку, за цела 2022 година од ДДВ во буџетот влегоа над милијарда евра, а државата испланира годинава да собере 14,7 отсто повеќе од овој данок или над 1.276 милиони евра, што е историски најмногу.  

Буџетот за оваа година треба да добие поддршка и од таканаречениот данок на солидарност, односно данокот на екстра-профит што ќе го платат компаниите што оствариле подобри резултати од претходно поради кризата.

Владата предвиде дека со него ќе собере околу 80 милиони евра од близу 200 компании. Рокот за плаќање на данокот е крајот на мај, но Законот и за него не е донесен и е во фаза на второ читање пред матичната комисија за финансирање и буџет.

 

Во моментов нема коментари за веста. Биди прв да коментира...

Остави коментар