Федералните резерви на САД (ФЕД) прават пауза. Овој пат нема да се зголеми каматната стапка, но ќе има барем уште две зголемувања до крајот на годината. Аналитичарите на „Блумберг Адрија“ претходно во својата прогноза напишаа дека ФЕД ќе паузира, но дека тоа може да му се удри од глава во наредниот период. Денеска се чека одлуката на Европската централна банка (ЕЦБ), нашите аналитичари велат дека во Европа нема да има пауза, каматата ќе расте.
Добро утро. Ова се петте вести што треба да ги знаете за почеток на денот.
Денеска ЕЦБ одлучува за каматата – нашите аналитичари прогнозираат раст од 25 базични поени
Попладне претседателката на Европската централна банка, Кристин Лагард, на вообичаената прес-конференција ќе соопшти за колку ќе се зголеми каматната стапка. Нашите аналитичари велат дека зголемувањето ќе биде за 25 базични поени.
„Фактот што еврозоната влезе во техничка рецесија во првиот квартал од оваа година не треба да ја оддалечи ЕЦБ од трендот на затегнување, особено што економската активност, иако слаба, сè уште не е во рецесија“, смета главниот аналитичар Андреј Кнез.
Bloomberg Mercury
ФЕД најавува нови зголемувања наскоро, сега прави пауза
Во САД основната каматна стапка останува на ниво од околу 5 отсто - што е прва ваква одлука на ФЕД за паузирање на покачувањето по повеќе од една година. Во соопштението по седницата на челниците на ФЕД беше наведено дека со задржувањето на стапките на ова ниво му се овозможува на Комитетот да ги процени дополнителните информации и нивните импликации врз монетарната политика.
„Речиси сите учесници на Комитетот очекуваат дека ќе биде соодветно да се зголемат каматните стапки уште малку до крајот на годината“, изјави претседателот на ФЕД, Џером Пауел.
МФ со убави прогнози – ќе растат и економијата и платите
Намалување на минусот во буџетот, раст на платите, потрошувачката, извозот и инвестициите предвидува Министерството за финансии во Фискалната стратегија за периодот од 2024 до 2028 година.
Според стратегијата, во следниот период буџетскиот долг етапно ќе се намалува и во 2028 година ќе стигне до 2,5 отсто. Намалувањето на дефицитот ќе се должи на зголемените инвестиции на државата во капитални проекти, кои ќе достигнат до пет отсто од БДП. Исто толкав ќе биде и просечниот раст на БДП, а платите ќе растат за шест отсто.
За ненаситната држава сме работеле три месеци, сега работиме за себе
Македонците си ги исплатија давачките кон државата за годинава - и тоа го сторија до 3 април. На тој ден во четвртиот месец всушност е таканаречениот ден на даночна слобода (tax freedom day). Тоа е реален ден, но имагинарна граница што практично означува до кога во годината вработените работат за државата, а од кога почнуваат да работат за себе, се разбира само на хартија.
Според пресметката на аналитичкиот тим на „Блумберг Адрија“, Македонците всушност први се раздолжуваат кон ненаситниот државен апарат, па Босанците, кои го сториле тоа на 23 мај. Просечниот Србин се раздолжил на 8 јуни, а Хрватите на 11 јуни. Тоа допрва ќе им следува на Словенците, кои за државата ќе треба да работат дури до 5 јули годинава.
Колку ќе работиме в година за државата ќе зависи од растот на платите во администрацијата
Министерот за финансии Фатмир Бесими вели дека интензивно се дискутира за методологијата за плати во јавниот сектор што ќе биде системско решение и тоа што ќе биде договорено со синдикатите ќе важи за сите. Министерот додаде дека не може да прејудицира кога и како ќе завршат преговорите. Откако ќе завршат преговорите, најави дека ќе треба одреден транзициски период за да се имплементира решението во буџетот.
„Клучно е да имаме системско решение што ќе им гарантира статус и стандард на вработените во јавниот сектор, а наедно ќе ја следи и продуктивноста на нашата економија. Се дискутира дали минималната или просечната плата да биде основа за методологијата и откога ќе се реши тоа прашање ќе важи за сите во јавниот сектор, како што направивме претходно со системското решение за минималната плата и пензиите“, кажа Бесими.
Претходно министерот Бесими изјави дека поголеми плати во согласност со новата методологија може да има од следната година, затоа што за оваа не се предвидени средства во буџетот.
.webp){kind=icon}
