ЕБОР одобри кредит за гасоводот, екологистите бараат да се запре проектот

Европската банка за обнова и развој (ЕБОР) вчера одобри заем од 98,6 милиони евра за гасоводот што ќе ѝ овозможи на Македонија да ја зголеми потрошувачката на гас од три до шест пати во споредба со 2021 година, која е година со најголема потрошувачка досега, информираат од невладината организација „Бенквач нетворк“ (CEE Bankwatch Network).

Проектот за гасен интерконектор меѓу Грција и Македонија е предмет на формални жалби до механизмот за одговорност на ЕБОР и до Секретаријатот на Енергетската заедница во Виена, бидејќи е прекршена законската обврска за одржување јавни консултации на национално ниво пред да се даде еколошка согласност. 

„ЕБОР тврди дека овој гасовод ќе ѝ помогне на Северна Македонија да се оддалечи од јагленот, но предоцна е да се замени едно фосилно гориво со друго. Нов гас не е потребен за електроенергетскиот сектор, како што покажува енергетската стратегија на земјата. Сега мора да им се даде приоритет на добро лоцираните соларни и ветерни електроцентрали, геотермални и топлински пумпи, а не за 20 години“, вели Ана Чоловиќ Лешоска, извршна директорка на „Екосвест“.

Како што информираат од „Бенквач нетворк“, згора на тоа, ниту властите во Македонија ниту ЕБОР не го оценија најзначајното влијание на гасоводот - емисиите на стакленички гасови од согорувањето на транспортираниот гас - ниту открија зошто е потребен толку многу гас или за што ќе се користи.

„Со климатскиот хаос, кој излегува од контрола, непристојно е што ЕБОР сè уште поддржува фосилни горива со јавни пари. Овој гасовод или ќе доведе до големо зголемување на потрошувачката на гас или ќе стане скапо заглавено средство. Денешната одлука разочарува, но ова не е крајот на приказната. Ќе продолжиме да работиме за да го запреме проектот и да се насочиме кон иднина со чиста енергија“, изјави Пипа Галоп од „Бенквач нетворк“. 

Пред повеќе од еден месец државата објави дека е заокружена финансиската конструкција за реализација на проектот за изградба на гасен интерконектор со Грција со обезбедување 98,6 милиони евра од Европската банка за обнова и развој (ЕБОР).

Тогаш во Собранието беше усвоен Законот за гаранција на Македонија на обврските по договорот за заем за финансирање на проектот за регионална гасификација, кој ќе се склучи меѓу АД „Номагас“ и Европската банка за обнова и развој.

Набрзо потоа реагираа од македонската невладина организација „Екосвест“, заедно со „Бенквач нетворк“, кои побараа од Европската банка за обнова и развој да ја преиспита намерата за одобрување кредит на Македонија за изградба на интерконекторот за гас меѓу земјава и Грција.