Екологистите бараат ЕБОР да не го одобрува кредитот за гасоводот

Македонската невладина организација „Екосвест“, заедно со „Бенквач нетворк“ (CEE Bankwatch Network), бара од Европската банка за обнова и развој (ЕБОР) да ја преиспита намерата за одобрување кредит на Македонија за изградба на интерконекторот за гас меѓу земјава и Грција.

Двете организации се обратија со механизмот за правна заштита на ЕБОР, а во формалната жалба се наведува дека овој проект, кој треба да биде одобрен на 24 април годинава, е спротивен на националното и правото на Европската Унија „и. како резултат на тоа, исто така ја нарушува еколошката и социјалната политика на ЕБОР“.

Гасниот интерконектор, доколку се изгради, ќе увезе дополнителни 1,5 милијарда кубни метри гас во Македонија - трипати повеќе од потрошувачката на земјата во 2021 година - што значително ќе ја зголеми нејзината зависност од увоз на фосилни горива.

Сепак, за главното влијание врз животната средина - емисиите на стакленички гасови од согорувањето на гасот што го транспортира - немаше оценка во проектот за оцена на влијанието врз животната средина. Еколошките организации тврдат дека немало ни задолжителен период на јавна консултација пред властите во земјава да ја одобрат еколошката процена.

„Повеќето од граѓаните во Македонија немаат поим за овој проект, бидејќи немаше јавна дискусија. Но, наместо да инсистира на значајна јавна консултација, ЕБОР ги затвори очите. Европската банка мора да инсистира на стандардите на ЕУ - кои и онака се задолжителни за земја кандидат како нашата“, вели Ана Чоловиќ Лешоска, извршна директорка на „Екосвест“.

„ЕУ и нејзините банки мора да престанат да применуваат двојни стандарди: дома тие ја разбираат потребата од постепено укинување на гасот, но немаат проблем да му помогнат на Западен Балкан да стане зависен од ова фосилно гориво. ЕУ мора да престане да дејствува како посредник за гасната индустрија и да се заложи за брзо исклучување“, вели Пипа Галоп, службеничка за енергетска политика во Југоисточна Европа од „Бенквач нетворк“.

Минатата недела директорот на акционерското друштво за пренос на гас во државна сопственост „Номагас“, Бајрам Реџепи, во телевизиско интервју за „Блумберг Адрија“ рече дека очекувањата се на 24 април да биде донесена одлуката за финансирање на овој „многу важен интерконектор, кој е важен не само за енергетска диверзификација на Македонија туку и на регионот“.

Во Собранието беше усвоен и Законот за гаранција на обврските по договорот за заем за финансирање на проектот за регионална гасификација, кој ќе се склучи меѓу АД „Номагас“ и Европската банка за обнова и развој. Со тоа треба да се обезбедат потребните 98,6 милиони евра од ЕБОР и да се затвори финансиската конструкција за проектот.

Веднаш по одобрувањето во април, Реџепи очекува дека веќе во мај ќе почне изградбата, а се очекува до крајот на 2025 година тој да биде пуштен во употреба.

Овој интерконектор ќе биде долг 123 километри, од кои 67 км се на македонска страна, поврзувајќи ја Неа Месимврија со Неготино, преку Гевгелија, и интегрирајќи ги двата национални система за пренос на природен гас.

Паралелно во тек е и постапката за избор на изведувач на проектот. На јавниот повик се јавија пет компании.

Во моментов нема коментари за веста. Биди прв да коментира...

Остави коментар