Колку чини земјиштето во Македонија: Од две евра за садење, до над 1.000 евра за градење

Рекордната цена на становите особено во Скопје се правда со високите цени на градежното земјиште, но и се помалиот број слободни парцели за градење. Пребарувањето по огласите покажува дека квадратен метар градежно земјиште во Скопскиот Регион не може да се најде поевтино од 50 евра. Во елитните населби цената на плацовите надминува и 100 евра за квадрат.

Но овие цени важат за локации на кои се градат куќи или други помали објекти. На локации каде може да се градат згради, цените се повисоки и надминуваат и 1.000 евра за квадрат. Ако се работи за атрактивна локација, цените дополнително растат.

Од друга страна, нива во еден од најплодните краеви во земјава, во Тиквешијата се продава по цена од две евра за квадрат. Во помалку атрактивните региони цената се намалува на 1,5 евра. Во Струмичкиот Регион нива од еден декар може да се купи и за 300 евра.

Сепак, и за земјоделското земјиште се наддава, а цената допрва ќе расте. Со најновите измени на законот кои сè уште не се донесени земјоделско земјиште од четврта до седма катастарска класа ќе може да се пренамени во градежно за на него да се постават фотопанели за производство на струја од сонце. Ваквите ниви уште сега се продаваат по 20 евра за квадрат.

Повеќе се тргува со земјоделско земјиште

Цените на градежното земјиште варираат во зависност од тоа дали просторот е урбанизиран и каде се наоѓа. Во услови на стеснување на просторот за градење, цените галопираат. 

„Во Центар или Аеродром со Скопје, цената на квадратен метар градежно земјиште може да надмине и 1.000 евра. Имаме случаи каде стигнува и до 2.000. Најважен фактор во овој случај е намената на градежното земјиште. Ако е во населба надвор од центарот и на 1.000 квадратни метри се гради куќа, тогаш 50 до 100 евра за метар квадратен е реална цена. Атрактивна локација во централното градско подрачје, целосно урбанизирана, на која би се изградил објект од 4.000 или 5.000 квадратни метри, чини над 1.000 евра, а може да стигне и до 2.000 евра за квадратен метар“, вели во изјава за „Блумберг Адрија“, Ивица Јакимовски, претседател на Градежната комора на Македонија.

Иако градежното е далеку поскапо, земјоделското земјиште се продава и изнајмува повеќе. Тоа го покажуваат податоците на Агенцијата за катастар со недвижности што се однесуваа на периодот јануари-јуни годинава.

Во првите шест месеци имало 1.238 продажби на градежно земјиште и над 4.500 продажби на земјоделско земјиште. Сепак, разликата во вредноста на овие продажби е огромна. Вредноста на продаденото градежно земјиште изнесува 33 милиони евра, а на земјоделското 39 милиони иако бројот на продажби е значително поголем. Трендот бил ист и лани.

Слична е ситуацијата и со цените на наемите што се евидентирани во Агенцијата за катастар. Од почетокот на годината се реализирани 629 закупи на земјоделско земјиште и вкупната вредност на овие закупи изнесува 28.000 евра.

Вредноста на закупите кај градежното земјиште надминува 70.000 евра, а имало само 110 такви договори.

Колку чини државното земјиште?

Државата веќе десетина години не го продава своето земјиште. Во моментов не се продава ниту земјоделското земјиште во сопственост на државата.

Законот за продажба на државно земјоделско земјиште е поставен на ЕНЕР во 2021 година, но не е донесен по многубројните реакции на експертската јавност и на земјоделците.

Тој текст предвидуваше дека највисоката цена за државното земјоделско земјиште треба да изнесува едно евро за квадрат, а пренамена на истото тоа не смее да се врши до истекот на десет години.

Претходниот ваков закон беше укинат во 2017 година. Образложението беше дека се укинува затоа што е неприменлив.

Но државата изнајмува земјоделско земјиште. Цените на наемите зависат од катастарската класа и местоположбата. За површини до три хектари почетната цена на јавните наддавања изнесува 25 евра по хектар за земјиште од прва до четврта класа и 15 евра за тоа до седма класа. Во планинските подрачја поквалитетното земјиште се издава за почетна цена од 15 евра, а преостанатото за пет евра по хектар.

 

Во моментов нема коментари за веста. Биди прв да коментира...

Остави коментар