Стагфлацијата претставува клучен ризик за светската економија во 2023 година, велат инвеститорите, според кои премногу е рано за надеж во заздравување на пазарот по годинешната брутална распродажба.
Речиси половина од 388 испитаници во најновата анкета на „МЛИВ пулс“ (MLIV Pulse) изјавија дека следната година ќе доминира глобалното сценарио во кое растот ќе продолжи, додека инфлацијата ќе остане висока. Другиот најверојатен исход е дефлациска рецесија, додека економско заздравување со висока инфлација се смета за најмалку веројатно.
Резултатите сигнализираат за уште една година полна со предизвици за ризичните имоти, откако заострувањето на политиките од страна на централните банки, наглиот раст на инфлацијата и влијанието на руската инвазија врз Украина го поттикнаа најлошиот крах на акциите од светската финансиска криза. Во оваа мрачна заднина, додека акциите растат во последното тримесечје, повеќе од 60 проценти од учесниците во анкетата рекоа дека инвеститорите низ светот уште имаат големо расположение за цените на имотите.
„Следната година ќе биде тешка. Дефинитивно, стагфлацијата засега е извесна“, рече Никол Корницер, париска управителка за портфолија на „Бафало интернешнел фонд“ (Buffalo International Fund) во „Корницер капитал менаџмент“ (Kornitzer Capital Management Inc), кој раководи со околу шест милијарди долари.
Во меѓувреме, околу 60 проценти од учесниците во анкетата рекоа дека очекуваат натамошно слабеење на доларот во следниот месец. Тоа е во спротивност со минатиот месец, кога речиси половина од испитаниците рекоа дека во ноември ќе продолжат острите политики на американските Федерални резерви (ФЕД), а со тоа и доброто позиционирање на доларот. Силата на доларот влијае на неколку класи имоти, вклучувајќи ги и другите валути, како еврото, и акциите на пазарите во развој. Падот на доларот може да создаде големи можности во 2023 година, за кои веќе се очекува дека ќе бидат бледи.
„Доларот веројатно ќе слабее во текот на 2023 година. Можеби не драматично, но трендот веројатно ќе биде силен. Рецесијата во САД и насоката на движењата ќе бидат клучни катализатори за валутата“, рече Корницер.
Сите очи се вперени кон ФЕД, а растот веројатно дополнително ќе биде нарушен, бидејќи каматните стапки остануваат високи, режим што веќе го најави претседателот на ФЕД, Џереми Пауел. Во исто време, кинеската строга политика за нулта ковид претставува уште еден ризик за светската економија, додека бројот на случаи се движи кон рекордно високо ниво среде сè помасовните протести против ковид-ограничувањата во земјата.
Повеќе од половина анкетирани очекуваат дека индексот S&P 500 ќе ја заврши 2023 година во опсег од околу 10 проценти пониско или повисоко. Тоа е во согласност со очекувањата од Волстрит, со стратезите на Голдман Сакс (Goldman Sachs Group Inc), Морган Стенли (Morgan Stanley) и Бенк оф Америка (Bank of America Corp), кои се меѓу оние што го гледаат индексот S&P 500 релативно непроменет за период од околу 12 месеци. Сите тие очекуваат дека сè полошата заработка ќе влијае на успешноста на акциите.
„Аналитичарите ќе мора да ги ревидираат своите процени за заработка во надолна линија. Очекуваме дека Европа ќе доживее економски турбуленции, САД веројатно ќе можат да покажат само скромен раст, а Кина нема да ги оствари своите амбиции“, рече Анека Треон, директорка на „Ван Леншот Кемпен“ (Van Lanschot Kempen), со седиште во Амстердам, чија компанија има конзервативен поглед на акциите во 2023 година.
Сепак, и покрај својот песимизам, анкетираните рекоа дека е веројатно инфлацијата во САД да падне под три проценти во 2023 година, што имплицира одредено олеснување кон крајот на оваа година. Тоа би било добредојдена вест за банкарите на ФЕД, кои веќе сигнализираа дека имаат намера да го намалат покачувањето на каматите на 50 наместо 75 базични бода во декември, за да се ублажат ризиците од преголемото затегање на монетарната политика.
Што се однесува на состојбите, учесниците во анкетата гледаат можност да ги зграбат долгорочните обврзници и технолошките акции. Двете класи имоти оваа година се оштетени поради остриот раст на каматните стапки.
Меѓу другите потенцијални ризици во 2023 година е развојот на пазарите во Обединетото Кралство и Канада, при што анкетираните гледаат поголема веројатност за пад од 20 проценти во тие земји отколку во другите. Скокот во трошоците за задолжување ги брка некои од потенцијалните купувачи од пазарот и поттикнува прогнози за пад на цените на недвижностите.
Поголемиот дел испитаници ја отфрлија можноста за ескалација на геополитичките немири во следната година, на пример меѓу Кина и Тајван, како и меѓу НАТО и Русија.
„Во првата половина од 2023 година ќе доминира приказната за повисоки каматни стапки. Меѓутоа, околу третото и четвртото тримесечје следната година очекуваме дека пазарната реторика ќе се помести кон низок раст и рецесија“, рече Ипек Озкардескаја, виша аналитичарка во „Свисквот“ (Swissquote).
.webp){kind=icon}
