Странските инвеститори повлекле рекордна сума пари од Кина

Странските инвеститори извлекоа рекордна сума пари од Кина во минатиот квартал, а причина за тоа се смета дека е длабокиот песимизам за втората по големина економија во светот.

Странските директни инвестиции во платниот биланс на Кина паднаа за речиси 15 милијарди долари од април до јуни, што е само вторпат овој износ да биде негативен, покажуваат податоците на Државната управа за девизи објавени во петокот. Во првите шест месеци тие паднаа за околу пет милијарди долари.

Доколку падот продолжи до крајот на годината, тоа ќе биде прв годишен нето-одлив од 1990 година, од кога се споредуваат податоците.

Странските инвестиции во Кина се намалија во последниве години, откако достигнаа рекордни 344 милијарди долари во 2021 година. Забавената економија и зголемените геополитички тензии поттикнаа некои компании да ги намалат своите инвестиции, а брзата транзиција на Кина кон електрични возила исто така ги изненади странските автомобилски компании, што натера некои да ги повлечат или да ги намалат своите инвестиции.

Падот доаѓа и покрај зголемените напори на Пекинг за привлекување и задржување странски инвестиции, откако минатата година беше забележан најмал пораст во историјата. Владата сака да покаже дека останува отворена и привлечна за странските компании, надевајќи се дека компаниите ќе донесат напредни технологии и ќе се спротивстават на притисокот од САД и другите земји да се оддалечат од Кина.

Податоците САФЕ (SAFE), кои ги следат нето-тековите, покажуваат трендови во профитот на странските компании, како и промени во големината на нивните операции во Кина.

Мултинационалните компании имаат повеќе причини да чуваат готовина во странство отколку во Кина, бидејќи напредните економии ги зголемуваат каматните стапки додека Пекинг ги намалува за да ја стимулира економијата.

Претходните податоци на Министерството за трговија покажаа дека новите странски директни инвестиции во Кина во првата половина од годинава биле најниски од почетокот на пандемијата во 2020 година.

Раст на излезните инвестиции

Кинеските излезни инвестиции исто така достигнаа рекорд, со тоа што фирмите испратија 71 милијарда долари во странство во вториот квартал, што е за над 80 отсто повеќе од 39 милијарди долари во истиот период минатата година.

Кинеските компании забрзано ги зголемуваат инвестициите, а парите се слеваат во проекти како што се фабрики за електрични возила и батерии.

Податоците исто така покажаа дека аномалијата во мерењето на трговскиот суфицит на Кина продолжи да се проширува, достигнувајќи рекордни 87 милијарди долари во вториот квартал и речиси 150 милијарди долари во првата половина од годината. Тој јаз беше нагласен во извештај претходно годинава на американското министерство за финансии, кое ја повика Кина да објасни зошто бројките се толку различни.

Според неодамнешниот извештај на Меѓународниот монетарен фонд, оваа разлика „се чини дека главно се должи на различните методологии што се користат за евидентирање на извозот и увозот на стоки“.

Јазот се зголеми откако податоците што ги користеа кинеските власти се сменија пред две години, а беа поттикнати и со неодамнешното зголемување на производството од странски фирми.

Во моментов нема коментари за веста. Биди прв да коментира...

Остави коментар