Кина ќе издаде посебни државни обврзници за да го зголеми банкарскиот капитал

Кина соопшти дека ќе издаде специјални државни обврзници за да го зголеми капиталот кај најголемите банки во државна сопственост.

Издавањето на обврзниците има цел да ги поддржи големите државни банки да го дополнат својот основен капитал, информира министерот за финансии Лан Фоан на брифинг во Пекинг. Овој потег ќе ја зајакне нивната способност да ги елиминираат ризиците и да го поттикнат кредитирањето за поголема поддршка на домашната економија, додаде тој.

„Министерството за финансии формира механизам со финансиски регулатори за помош на банките и чека кредиторите да ги достават своите капитални планови“, рече заменик-министерот за финансии Лиао Мин на истиот брифинг.

„Блумберг“ минатиот месец објави дека Кина може да инјектира дури 142 милијарди долари капитал во најголемите банки, со финансирање главно од издавање нов посебен државен долг.

Властите кон крајот на септември истакнаа дека ќе го зголемат основниот капитал кај шесте главни комерцијални кредитори, преземајќи паралелно уште низа други мерки за зајакнување на економијата. Овој потег ја означува првата докапитализација на кредиторите по повеќе од една деценија бидејќи официјалните лица се обидуваат да ја спасат индустријата од рекордно ниските маржи, од падот на профитот и од растот на лошите кредити.

Шесте најголеми банки, кои ги вклучуваат „Индустриската и комерцијална банка“ (Industrial & Commercial Bank of China Ltd.), „Банката на Кина“ (Bank of China Ltd.), „Земјоделската банка“ (Agricultural Bank of China Ltd.), „Кинеската градежна банка“ (China Construction Bank Corp.), „Банката за комуникации“ (Bank of Communications Co.) и „Поштенската банка“ (Postal Savings Bank of China Co.), првенствено се потпираа на задржаната добивка за да ги зголемат капиталните резерви.

„Новата инјекција на капитал ќе им овозможи похрабро да позајмуваат и да апсорбираат повеќе загуби од заемот“, рече Чан.

Комбинираната добивка на кинеските комерцијални кредитори во првата половина годинава се зголеми за само 0,4 проценти, што е најбавно темпо на раст од 2020 година.

Во моментов нема коментари за веста. Биди прв да коментира...

Остави коментар