Шаренило на берзата: Кој работи со добивка, а кој со загуба во 2023-та?

Компаниите од Македонската берза почнаа да ги објавуваат финансиските резултати за првото тримесечје, кои откриваат шаренолика слика за нивното работење на почетокот на 2023 година. Некои од нив забележаа значително зголемување на приходите и добивката, а други работеа со загуба и имаа влошување на резултатите во однос на истиот период минатата година. Ги анализиравме клучните показатели за компаниите за овој период и какви се нивните очекувања до крајот на годината. 

Големите банки веројатно ги очекува уште една успешна година

Големите банки во Македонија од година на година веќе традиционално остваруваат подобрување на финансиските резултати, а извештајот на НЛБ банка за првото тримесечје од годинава сигнализира дека тие веројатно ќе имаат уште една успешна година. Имено, банката во првиот квартал оствари добивка од 13 милиони евра, што е зголемување за 22,8 проценти во однос на истиот период минатата година, кога добивката на банката изнесувала 10,6 милиони евра.

„Зголемувањето се должи на континуирани продажни активности на кредитните продукти со посебен фокус на домаќинствата, микро, малите и средни претпријатија, како и зголемен број на корисници на платните сервиси на банката“, соопштија од НЛБ банка.

Оттаму информираа дека нето-каматните приходи, заклучно со крајот на март годинава, се повисоки за 25,7 проценти споредено со претходната година, при што приходите од камати се повисоки за 25 проценти, главно поради пораст на портфолиото во секторот домаќинства, како и пораст на каматните стапки кај сегментите домаќинства, нефинансиски правни лица и банки. Расходите за камати се повисоки за 18 проценти главно поради пораст на каматните стапки по основа на субординирани обврски и кредитни линии.

Вкупните приходи од работењето се повисоки за 16,1 проценти во однос на претходната година, најмногу поради повисоки каматни приходи.

Во НЛБ банка очекуваат во претстојниот период да се одржи макроекономската стабилност на државата, што ќе придонесе за постабилен деловен амбиент за реалниот сектор по глобалната енергетска криза, нарушувањата на каналите на снабдување, промената на трендовите на финансиските пазари и инфлаторните притисоци.

Рекордно зголемување на добивката во првите три месеци од годинава оствари и Комерцијална банка. Имено, таа инкасира профит од 16,9 милиони евра, што е зголемување за 98,9 проценти во однос на истиот период минатата година кога банката имала добивка од 8,6 милиони евра. Вкупните приходи од работењето на банката бележат зголемување од 40,6 проценти во однос на истиот период од минатата година.

Во банката очекуваат макроекономската стабилност во 2023 година да биде одржана преку одржување на ценовната стабилност и стабилноста на номиналниот девизен курс на денарот во однос на еврото.

„Се очекува мерките за субвенционирање на цената на електричната енергија за прехранбената индустрија од страна на државата и замрзнувањето на цените на одредени производи да влијаат врз движењето на инфлацијата, така што истата ќе изнесува од 8 до 9 проценти. Банките ќе ги следат сигналите на Народната банка во однос на монетарната политика и соодветно ќе ги коригираат каматните стапки на депозитите и кредитите“, велат од банката.

За разлика од НЛБ банка и Комерцијална банка, Стопанска банка Битола во првиот квартал од годинава оствари загуба од 837.000 евра, што е продлабочување во однос на истиот период минатата година, кога загубата на банката била 144.000 евра.

„Глобалната и домашната економија во првиот квартал од 2023 година сѐ уште беа под влијание на пазарните дисторзии што се провлекуваат од избивањето на пандемијата на ковид-19, дополнително продлабочени од конфликтот меѓу Русија и Украина. По врвот што беше достигнат август/септември 2022 година, цената на енергентите регистрира надолно движење, што резултира со одредено забавување на растот како на увезената, така и на домашната инфлација во овој квартал. Народната банка и во изминатиот квартал продолжи со затегнување на монетарната политика преку зголемувањето на каматната стапка на благајничките записи и преку другите инструменти што ѝ стојат на располагање. Негативниот шок од високиот раст на цената на енергентите, како и забавената економска активност од средината на 2022 година, се одрази неповолно врз ликвидноста и кредитоспособноста на дел од компаниите и домаќинствата“, велат од банката.

Во однос на претстојниот период од Стопанска банка Битола велат дека во услови кога на повидок се забавување на инфлацијата и продолжена неизвесност поврзана со конфликтот во Украина и движењето на пазарот на енергенти, на краток рок очекувањата на банката се во насока на исполнување на планските големини.

„На среден рок, банката очекува одредено стабилизирање на макроекономското опкружување и умерено нагорно придвижување во економијата, притоа приспособувајќи го своето работење на деловната клима и на динамикaта на пазарот за остварување на планот“, соопштија од банката.

Каква е состојбата кај компаниите од прехранбената и текстилната индустрија?

„Жито Полог“, компанија што е еден од најголемите производители на храна во Македонија, ја почна 2023 година со загуба од 102.000 евра во првото тримесечје, што е влошување на резултатот во однос на истиот период минатата година, кога компанијата имала добивка од 140.000 евра.

Приходите на „Жито Полог“ во првиот квартал бележат намалување за 50 проценти во однос на истиот период минатата година. 

„Друштвото прави напори за подобрување на финансиските резултати и одржување на ликвидноста. Во наредниот период ќе бидат преземени активност за наоѓање нови пазари, подобрување на квалитетот и асортиманот на производите“, велат од компанијата за очекувањата за идниот период.

Кога станува збор за компаниите од текстилната индустрија, првичните показатели покажуваат приближно слични резултати како и во минатата година. Имено, „Мода“ АД Свети Николе во првите три месеци од годинава оствари добивка од 10.500 евра, што е намалување во однос на истиот период минатата година, кога добивката на компанијата изнесувала 29.500 евра. „Герас Цунев – конфекција“ АД Струмица во првиот квартал од годинава оствари добивка од 14.000 евра, што е на приближно исто ниво како и во минатата година, кога добивката на компанијата во првите три месеци била 15.000 евра. „Герас Цунев – трговија“, пак, во првите три месеци од годинава оствари загуба од 15.600 евра, што е продлабочување во однос на истиот период минатата година, кога компанијата имала загуба од 13.200 евра.

„Во наредниот квартал се очекува зголемување на приходите од ноќевање во хотелот и намалување на загубата, односно по можност и остварување добивка. Овие очекувања се условени од економската и енергетската криза“, велат од компанијата. 

Добар почеток за ГТЦ, „Раде Кончар - апаратна техника“ со намалена добивка

„Раде Кончар - апаратна техника“ ја почна годинава со добивка од 4.780 евра, што е намалување во однос на истиот период минатата година, кога добивката на компанијата изнесувала 63.000 евра. 

„Во наредниот период се очекува добивката да се зголеми по основа на финансиски приходи од дивиденда и капитална добивка од пласирани средства во хартии од вредност. Заложбата на друштвото е да се оплоди капиталот и да се зголеми финансискиот резултат. Заложба на Одборот на директори како долгорочна политика е да се одржува ликвидноста на друштвото и редовно да се исполнуваат сите законски обврски на друштвото, вклучувајќи го и исплаќањето на сите потребни давачки кон државата и доверителите. Одборот на директори посебно ќе се стреми да се постигнат што повисоки финансиски резултати и да се врши редовна исплата на дивиденда на акционерите според остварената добивка“, велат од компанијата. 

„Градски трговски центар“ АД Скопје во првите три месеци од годинава оствари добивка од 130.000 евра, што е неколкукратно зголемување во однос на истиот период минатата година, кога компанијата имала добивка од 15.000 евра.

Компанијата годинава успеа да ги зголеми приходите за пет проценти во однос на првите три месеци од минатата година и да ги намали трошоците за осум проценти.

„Целта на нашето работење е да оствариме позитивни резултати во наредниот период за тековната 2023 година, со максимално ангажирање и целосно искористување на капацитетите со кои располага нашето друштво“, соопшти ГТЦ.