Азиските берзи пораснаа, европските ги следат, по најавениот фискален стимул на Кина

Акциите на европските берзи отвораат на повисоки вредности утрово следејќи го оние на азиските пазари, по објавената одлука на централната банка на Кина за финансиски стимул што треба да го поттикне економскиот раст на земјата и да ја запре распродажбата на пазарите за акции и обврзници.

Фјучерсите за Euro Stoxx 50 се искачија за 0,5 проценти, откако индексот MSCI Asia Pacific забележа пораст четврти ден по ред. Клучните бенчмаркови на берзата во Хонгконг остварија добивка од најмалку 4 проценти, додека индексите во континентална Кина пораснаа за повеќе од 3 проценти откако властите изјавија дека ја проучуваат опцијата за формирање акциски стабилизациски фонд. Повеќето валути на азиските земји зајакнаа спрема доларот, а златото достигна нов рекорд во цената.

Бизнис-климата доби „ветер во грбот“ откако Кина објави план да „истури“ најмалку 800 милијарди јуани (114 милијарди долари) како поддршка во ликвидност за пазарите на акции, а исто така ќе им дозволи на брокерските куќи да ги искористат фондовите на централната банка за да купуваат хартии од вредност. Овие мерки доаѓаат како дел од поширок пакет политички мерки со цел да заживее економијата, вклучувајќи и намалување на краткорочните каматни стапки и намалување на трошоците за позајмување на хипотекарниот пазар што вреди 5,3 трилиони долари.

Иако првичниот одговор на пазарот по стимулативните мерки беше позитивен, аналитичарите гледаат ризик дека овој оптимизам наскоро може да се распрсне бидејќи некои од основните прашања што ја погодуваат кинеската економија, вклучувајќи го и дефлацискиот притисок, остануваат нерешени.

„Овие мерки јасно покажуваат дека Пекинг сега ја разбира и ја цени потребата за итно зајакнување на расположението на берзата и на станбениот пазар“, рече Сигуо Чен, менаџер на портфолио во „РБЦ Блубеј асет менаџмент“ (RBC BlueBay Asset Management). „Краткорочно, тоа ќе му помогне на пазарот да види каде е дното и да почне да закрепнува, но долгорочно мислам дека треба да видиме поголема фискална поддршка“.