Најголемите кинески државни банки размислуваат да ги намалат стапките на депозитите по третпат оваа година, изјавија за „Блумберг“ повеќе извори запознаени со плановите. За разлика од остатокот од светот, каде што економиите се борат со инфлацијата, банките во Кина се обидуваат да го зајакнат економскиот раст.
Банките како „Индастријал енд комершл“ (Industrial & Commercial Bank of China Ltd), „Чајна констракшн“ (China Construction Bank Corp) и други би можеле да ги намалат стапките на депозитите во јуани меѓу пет и 20 базични поени, рекоа изворите, барајќи да не бидат именувани бидејќи плановите сè уште не се јавни. Регулаторите го потпишаа планот, велат изворите и додаваат дека одлуката може да биде објавена до петок.
Bloomberg
Овој потег, по сличните намалувања на каматните стапки во јуни и минатиот септември, ќе биде последниот потег на Пекинг за стимулирање на трошењето, насочување на повеќе средства на берзата и намалување на притисокот врз банките.
Кинеските државни банки се обидуваат да ги заштитат своите профитни маржи додека ги следат владините директиви за зајакнување на поддршката за втората по големина економија во светот. Централната банка на државата ги повика банките да одржуваат „разумни“ каматни маржи.
Bloomberg
Овој месец централната банка ја намали стапката на едногодишните задолжувања најмногу во последните три години. Сепак, и со ова намалување на каматните стапки, второ по ред годинава, Пекинг сè уште не одлучува да дава поголеми стимули како во претходните кризи. На почетокот на месецот кинеските банки ја оставија петгодишната стапка непроменета и ја намалија втората стапка помалку од очекуваното. Ова може да се гледа како потег за заштита на каматните маржи. Намалувањето на каматните стапки на депозитите може да им даде на банките поголем простор да обезбедат подобри услови за корпоративните и станбените кредити.
Намалувањето на стапката на депозитите исто така може да ги поттикне домаќинствата да се префрлат од банкарски депозити на други инвестиции или на потрошувачка. За време на пандемијата кинеските домаќинства почнаа да штедат поголем дел од својот приход од порано, а вкупните средства депонирани во банките се зголемија. Сето тоа негативно се одрази на фондовите што купуваат акции и обврзници во име на домаќинствата.
Одлуката доаѓа додека кинескиот сектор за недвижности се бори, а неговите проблеми се закануваат да се прелеат во финансискиот систем на земјата од 60 трилиони долари. Постојните политики не успеаја да го забрзаат закрепнувањето на пазарот на недвижности бидејќи паѓаат цените низ целата земја. „Кантри гарден“ (Country Garden Holdings Co.), градежна фирма што некогаш беше столб на индустријата, е на работ на банкрот, што докажува дека ниту една компанија не е преголема за да пропадне. Економистите анкетирани од „Блумберг“ очекуваат кинескиот бруто-домашен производ да се зголеми за 5,1 отсто во 2023 година во однос на претходната година. Тоа е помалку од претходните очекувања од 5,2 отсто и ги приближува проекциите до целта на владата од околу пет отсто, бројка што се сметаше за најлошо сценарио.
.webp){kind=icon}
