За заработка на курсот евро/долар ќе ви треба повеќе среќа од памет

Курсот на еврото и доларот е многу деликатно прашање за светската економија, бидејќи секое големо флуктуирање на силата на двете водечки светски валути има експоненцијални последици за економијата, но и отвора можност за профит.

Меѓутоа, ако сакате да профитирате шпекулирајќи со курсот на американската и европската валута, ќе ви треба повеќе среќа отколку памет. Тоа го покажуваат и мислењата на експертите од целиот регион, па некои сметаат дека доларот ќе зајакне, а други веруваат дека еврото ќе добие.

Главниот фактор што ќе влијае на движењето на курсот секако ќе биде монетарната политика, односно одлуките на Федералните резерви на САД (Фед) и на Европската централна банка (ЕЦБ) во борбата против инфлацијата, но има безброј други фактори што можат да ја нарушат деликатната валутна рамнотежа.

Што се однесува до конкретните прогнози, анализата ја почнуваме со нашиот аналитички тим, кој предвидува мала девалвација или депрецијација на доларот во однос на еврото во 2024 година. Поточно, тие очекуваат курсот да се движи меѓу 1,08 и 1,14 долар за евро.

„Главната причина за песимистичкиот однос кон доларот е очекуваното намалување на каматните стапки од американската централна банка, што ќе ја стави локалната валута во понеповолна позиција во однос на еврото“, посочуваат аналитичарите на „Блумберг Адрија“.

Дополнително, американската економија покажува знаци на попуштање според податоците од пазарот на трудот, додека еврозоната сè уште не е влезена во техничка рецесија, иако е на работ. Дополнителен аргумент во прилог на зајакнувањето на еврото во однос на доларот е суфицитот на тековната сметка на платниот биланс на еврозоната, оценува нашиот аналитички тим.

Хрватските експерти со кои разговаравме се поделени во мислењата.

Главниот економист на Хрватската стопанска комора (ХГК), Горан Шаравања, го гледа еврото како послаба алка во споредба со доларот, а тоа го аргументира со општата состојба на европската економија.

„Бидејќи економијата на еврозоната претрпе многу поголем удар од руската инвазија на Украина отколку САД, би очекувал еврото да ослаби во однос на доларот. Односно, очекувам Фед да биде последната од главните светски централни банки што ќе ги намалуваат референтните каматни стапки. Ако сум во право, доларот треба да зајакне во однос на еврото“, нагласува тој.

За разлика од Шаравања, шефот на обврзничко инвестирање во „Интеркапитал“, Иван Дражетиќ, има поинаква прогноза. На прашањето кој прв ќе почне да ги намалува каматните стапки, ЕЦБ или Фед, тој вели дека е речиси сигурен дека тоа ќе биде Фед. „Девизниот курс евро/долар е многу важен и ако ЕЦБ ги намали каматните стапки пред Фед, еврото ќе изгуби од вредноста, а тоа ќе ги зголеми инфлаторните очекувања во еврозоната.

Тој не верува дека намалувањето на каматните стапки во Америка ќе се случи пред крајот на вториот квартал, а кога станува збор за бројот на намалувања што ги гледа во 2024 година, Дражетиќ вели дека би се обложил на три во САД. Тој смета дека Европа ќе стагнира бидејќи ЕЦБ размислува во сосема друга насока.

Економистот од Босна и Херцеговина Игор Гавран прогнозира дополнително слабеење на еврото.

„Економијата на еврозоната и на ЕУ не покажува знаци на закрепнување, а и покрај намалувањето на инфлацијата, штетите од санкциите и прекинот на економските односи со Руската Федерација, се издвојуваат огромни суми пари без вистинско покритие за финансирање на Украина. Од друга страна, наместо да се зајакнува конкурентноста, се најавуваат протекционистички мерки кон увозот од поконкурентни економии како Кина“, објаснува Гавран.

Српскиот инвеститор и основач на „Сензал капитал“, Раде Ракочевиќ, пак, смета дека е веројатно мало зајакнување на еврото во однос на доларот.

„Најголемо влијание ќе има движењето на каматните стапки, кои централните банки сигурно ќе ги намалат, така што ова ќе биде многу нестабилна година“, изјави Ракочевиќ за „Блумберг Адрија“, додавајќи дека изборите во САД исто така ќе бидат важни, како и геополитичките тензии.

„Кога една од двете централни банки ќе ги намали каматните стапки за 25 или 50 базични поени, другата валута ќе се зајакне. Кога другата централна банка ќе го стори тоа, тогаш ќе скокне спротивната валута, па мислам дека ќе имаме пила. Сепак, очекувам мали отстапувања во опсег од околу пет проценти“, заклучи Ракочевиќ.

„Прогнозите на повеќето деловни банки за крајот на 2024 година се дека евро/долар (EUR/USD) ќе достигне паритет 1,11-1,15. Во однос на темпирањето на динамиката на движење, се очекува  евро/долар позначително да зајакне од вториот квартал (раст на еврото во однос на американскиот долар)“, вели Ана Николоски, директорка на Дирекцијата за тргување со финансиски инструменти при „Комерцијална банка“ АД Скопје. „Американскиот долар традиционално има добри резултати на почетокот на годината и кога еврозоната е во рецесија, па во првиот квартал можеби е прерано да се види одлучувачки пресврт на повисоко ниво за  евро/долар, односно пад на американскиот долар“.

Таа вели дека треба да се има предвид дека на нивото  евро/долар влијаат голем број непредвидливи ризици, кои може да го променат правецот во спротивна насока од проекциите.

Никола Маљковиќ, аналитичар на словенечката платформа за тргување „Оптимтрејдер“ (OptimTrader), смета дека годинава нема да има големи промени. Тој очекува релативно слично движење на курсот како во 2023 година, во опсег меѓу 1,04 и 1,15 долар за евро. „Секое отстапување од наведените нивоа значи можност за инвестирање“, заклучува Маљковиќ.

Валутниот пар  евро/долар е еден од главните валутни парови (majors) глобално и се смета за најтргуван пар на глобалниот девизен пазар, со дневен просечен промет што надминува 5.000 милијарди американски долари.

Анализата за 2023 година покажува дека парот  евро/долар забележа поголема волатилност, а веќе во втората половина од годината американскиот долар ја зголеми вредноста во однос на еврото. Впрочем, однесувањето на парот  евро/долар е еден вид показател на компаративната состојба на економиите на Соединетите Американски Држави и еврозоната. „Во таа смисла, доколку американската економија остварува одржлив раст, наспроти полоши економски резултати во економијата на еврозоната, тоа може да предизвика пад на еврото и раст на американскиот долар и обратно“, заклучува Николоски.