Нафтата поскапува по падот на режимот во Сирија

Цената на нафтата се зголеми со оглед на тоа што пазарот ги анализира последиците од соборувањето на сириската влада, настан што предизвика шок на Блискиот Исток и им нанесе удар на долгогодишните поддржувачи Русија и Иран.

Брент нафтата за испорака во февруари поскапе за 0,8 проценти, искачувајќи се речиси до 72 долари за барел, а ВТИ (WTI-West Texas Intermediate) нафтата за испорака во јануари се искачи за 0,9 отсто, на 67,8 долари. Падот на режимот на Башар ал Асад создаде вакуум на моќ, со повеќе групи кои се борат за контрола, зголемувајќи ја можноста за поголемо насилство. Сето ова потсетува на Либија и Ирак, каде што вкоренетите владетели беа отстранети само за земјите да се соочат со подлабоки немири.

Bloomberg Mercury

 

Во меѓувреме, највисокото кинеско тело за одлучување рече дека следната година ќе спроведе „умерено лабава“ стратегија за монетарна политика со поголемо олеснување што најверојатно ќе биде добредојдено за инвеститорите кои бараат повеќе стимулации. Креаторите на политиката се подготвуваат и за уште една трговска војна со администрацијата на Трамп.

Суровата нафта е ограничена на тесен опсег од средината на октомври со силни геополитички случувања на Блискиот Исток и во Украина, на кои се спротивставуваат слабата кинеска побарувачка и големата понуда. Пазарот за следната година се соочува со презаситеност, што значи дека има малку простор за значително зголемување на производството од ОПЕК + (Организација на земји извознички на нафта и нивни сојузници). Групата веќе го одложи за напролет зголемувањето на производството, што требаше да почне да се применува од идниот месец.

„Пазарите главно проценуваат дека тензиите во Сирија ќе останат ограничени во нејзиниот сопствен простор, а ризиците од пошироко нарушување на снабдувањето со нафта остануваат ниски“, рече Јун Ронг Јеап, пазарен стратег во „Ај џи Азија“ (IG Asia Pte) во Сингапур.

„Сауди Арамко“ (Saudi Aramco), пак, во меѓувреме ги намали своите цени на нафтата за Азија за јануари, откако ОПЕК+ ја донесе одлуката за дополнително одложување на зголемувањето на производството, нагласувајќи ја слабата перспектива на пазарот. Државниот производител, исто така, ги намали цените за северозападна Европа и Медитеранот, додека цените за Северна Америка ги остави непроменети.