Заводливоста на гурманските парфеми: Зимава блеснете со парфеми што се „вкусни“

Во светот на престижните парфеми, малку категории предизвикаа внимание како гурманските мириси. Не е ни чудо, бидејќи неодоливо потсетуваат на мирисите на омилените слатки и спомени што зрачат со топлина и сигурност. Нив ги карактеризираат вкусни ноти како ванила, карамела, чоколадо и разни зачини, а топлиот пријатен мирис е особено посакуван за време на зимските месеци. Ни оваа зима не е исклучок, бидејќи гурманската категорија продолжува да се развива.

Во текот на претходните две години забележа раст од 12 отсто во глобалната продажба, надминувајќи ги другите категории мириси. Аналитичарите овој раст го припишуваат на промената во преференциите на потрошувачите кон искуствени мириси, како и на поширокиот и исто така растечки велнес-тренд, кој ги позиционира гурманските мириси како поттикнувачки, пријатни и утешни.

Додека обичните комерцијални гурмански мириси се движат меѓу 90 и 150 евра, понудата на нишни мириси често достигнува цени од 250 евра па нагоре, одразувајќи ги нивниот премиум квалитет и мајсторска изработка и оправдувајќи ги егзотичните ретки состојки што се користат во изработката на мирисите. Генерацијата зед и милениумците сочинуваат над 45 отсто од купувачите на гурмански мириси, привлечени првенствено од нивните носталгични квалитети, но и од ефектот, кој е едноставно таков што би сакале некого „да го изедете“.

САД, Франција и Блискиот Исток се водечки пазари за гурмански мириси, при што последниот покажува раст на продажбата од дури 18 отсто во однос на претходната година.

„Современиот гурмански мирис е целосно во рамнотежа“, вели Франсис Куркџијан, уметнички директор на МФК (Maison Francis Kurkdjian). „Се стремиме да создадеме мириси што предизвикуваат емоции, а да не го преплават корисникот. Предизвикот е да се направи слаткоста суптилна“.

Пјер Вулф, извршен директор на брендот „Амуаж“ (Amouage), напоменува дека денешните потрошувачи бараат автентичност. „Сакаат приказни, уникатни состојки и мириси што се издвојуваат. Гурманските парфеми го обезбедуваат тоа чувство, особено во постудените месеци“.

Парфимерот Жером Епине, познат по својата работа со брендот „Бајредо“ (Byredo), ја нагласува важноста на иновацијата: „Вкусните акорди, неочекуваните комбинации како солена карамела или чоколадо со шафран ги прават гурманските парфеми возбудливи и релевантни“.

Сезонава новиот бран на гурмански парфеми го редефинира значењето на носење нешто „слатко“ и „вкусно“. Додека богатите и декадентни состојки остануваат во прв план, парфимерите воведуваат изненадувачки ноти и структури за да ја одржат категоријата актуелна и модерна.

Во продолжение нудиме брз водич за гурмански парфеми за зимава, кои ветуваат дека ќе остават заводлива долготрајна трага. Без разлика дали сте долгогодишен гурман или новајлија, понудата сезонава ветува дека ќе ги возбуди сечие непце и сечиј нос.

Трендови за зимата 2024/2025

1. Еволуција на слаткоста со помалку шеќер, повеќе софистицираност

Поминаа времињата кога гурманските парфеми главно беа само слатки. Парфимерите сега истражуваат софистицирани интерпретации на слаткоста, мешајќи традиционално јадливи ноти со цвеќиња, дрво и зачини за да создадат поурамнотежени композиции.

2. Вкусно и зачинето

Зголемување на зачинетите ноти што ја дополнуваат слаткоста, со состојки како кардамон, морско оревче, па дури и сол, кои се појавуваат во формулациите.

3. Популарност на нишните гурмани

Потрошувачите сè повеќе ги привлекуваат нишните брендови чиј занаетчиски пристап кон изработката на парфеми често резултира со уникатни гурмански композиции. Брендови како „Ксерјоф“ (Xerjoff), „Амуаж“ и ИПП (Initio Parfums Prive) го користат овој тренд.

4. Трајност и одржливост

Бидејќи одржливоста повеќе не е предмет на преговори со луксузните потрошувачи, брендовите иновираат со одговорни состојки и еколошки прифатлива амбалажа. На пример, многу куќи сега користат ванила одгледана во лабораторија, намалувајќи го негативното влијание врз животната средина.

Унисекс парфемите се хит на зимата

Ви претставуваме десет што ќе сакате да ги користите или да ги почувствувате на некој друг:

 

„Клајв Кристијан“ (Clive Christian) / „Таун енд кантри“ (Town&Country)

Отстапени фотографии

Првично создаден во 1925 година, го прослави Винстон Черчил, па овој парфем беше хит производ на ЦПЦ (Crown Parfumery Company). Денес е трансформиран со посветеноста на „Клајв Кристијан“ на најфините состојки - совршено направен за самоизразување. Остар мирис со освежителни ноти е комбинација на природноста на селото и елеганцијата на Лондон преку бел чај, мускатна жалфија, смрека и кардамон.

„Амуаж“ (Amouage) / „Ризонс“ (Reasons)

Отстапени фотографии

Кога првпат се нанесува, парфемот е донекаде скромен: лешникот претставува топлина што утешува. Но, по неколку моменти, мирисот се развива и станува доминантен. Поминал низ процес на двојна инфузија со сандалово дрво и буриња од даб. Има кардамон, лешник и цимет.

„Ателје де Орс“ (Atelier Des Ors) / „Кава карда екстрејт“ (Kawa Karda Extrait)

Отстапени фотографии

Алхемија на какао и вештачки состојки. Какаото е доминантно. Потекнува од далечни земји на Латинска Америка и се смета за света билка, „храна на боговите“ (што значи дрво на какао, грчки: theobroma).

„Мезон Марџела“ (Maison Margiela) / „Реплика: Кофи брејк“ (Replica: Coffee Break)

Отстапени фотографии

Пријатна мешавина од кафе, лаванда и ванила, која ја доловува атмосферата на омиленото кафуле.

„Килијан“ (Killian) / „Енџелс шер“ (Angel's Share)

Отстапени фотографии

Богатиот мирис на коњак, со пралине и цимет, го прави овој мирис декадентно уживање.

„Том Форд“ (Tom Ford) / „Тобако ванила“ (Tobacco Vanille)

Отстапени фотографии

Култен класик, кој балансира слатка ванила со робустен тутун и зачини.

„Диор“ (Dior) / „Фив делишс“ (Feve Delicieuse)

Отстапени фотографии

Луксузни зрна тонка, карамела и ванила во нежна формулација.

„Шанел“ (Chanel) / „Коромандел“ (Coromandel)

Отстапени фотографии

Почетните ноти на портокал, цитрус и нероли се мешаат со пачули и корен од ирис, со база на бело чоколадо и бензоин, создавајќи пријатен и свечен букет.

„Герлан“ (Guerlain) / „Спиритус дабл ванила“ (Spiritueuse Double Vanille)

Отстапени фотографии

Сакан нишен парфем. Мешавина од ванила со бензоин и зачини.

„Џо Мелоун“ (Jo Malone) / „Мајр и тонка“ (Myrrh & Tonka)

Елегантен баланс на смолеста смирна и кремасти зрна тонка.

Конечно, совет за носење на овој вид мириси

• Паметно распоредете ги, комбинирајќи ги гурманските мириси со комплементарни лосиони или масла за тело за да го продолжите нивното траење.

• Размислете за пригодите во кои ќе го носите мирисот. Додека богатите гурмански мириси се совршени за вечери, послабите формулации се добри за текот на денот.

• Првиот впечаток е важен. Со оглед на нивната моќ, неопходно е да ги тестирате гурманските парфеми на вашата кожа за да видите како одговараат со хемијата на телото.

• Инвестирајте во квалитет! Одлучете се за добро осмислени композиции, бидејќи поевтините опции можат да мирисаат лепливо или синтетички.

 

(Напомена: Сите фотографии користени во текстот му се дадени на авторот од брендовите.)

Во моментов нема коментари за веста. Биди прв да коментира...

Остави коментар