Луксуз и долговечност - сопственикот на „Гучи“ сака да ви помогне да стареете грациозно

Ако здравјето е новата валута, луксузните брендови мора да освојат дел од тој пазар. Од милијардери што сакаат да живеат вечно до фејслифтинг од 300.000 долари, ултрабогатите трошат повеќе од кога било на тоа што внесуваат во своето тело и како вежбаат - наместо да се фокусираат исклучиво на облека и додатоци. Таа потрошувачка им конкурира на класичните луксузни стоки, како накит и ретки чанти „биркин“. Во исто време, тоа претставува огромен профитабилен пазар за луксузните компании, под услов да можат да ја пронајдат вистинската стратегија во бизнисот што може да биде ризичен како скокање во ледена бања.

Глобалното трошење за производи и услуги за велнес, кои промовираат здравје, сон, исхрана, фитнес, внимателност и изглед, ќе достигне 2 билиони долари во 2024 година, според „Мекинси“ (McKinsey & Co) и извештајот „Бизнисот на модата: Состојбата на модата 2026“. Таа бројка би можела да порасне на 2,5 билиони долари до 2028 година. „Мекинси“ утврди дека 84 проценти од потрошувачите во САД и 94 проценти во Кина ѝ даваат приоритет на благосостојбата, а помладите генерации предводат.

„Најмногу се честиме себеси кога се чувствуваме среќно и богато“, вели Марио Ортели, извршен директор на фирмата за луксузни консултантски услуги „Ортели“. | Depositphotos

Секако, не сите тие пари ќе бидат потрошени за најскапи третмани. Но освојувањето дури и на мал дел од тој дополнителен буџет би било како инфузија на витамини за индустријата што помина низ невиден циклус на бум и пад во последните пет години.

Брендовите за убавина веројатно ќе имаат предност, а „Керинг СА“ (Kering SA), кој заостанува зад своите конкуренти додека се обидува да го оживее „Гучи“, е меѓу оние што се во најдобра позиција. Често занемарен аспект на продажбата на „Керинг“ од 4 милијарди евра на неговиот оддел за убавина на „Лореал“ (L’Oreal) во октомври е создавањето заедничко вложување за истражување на можностите „на пресекот на луксузот, благосостојбата и долговечноста“.

Засега, двете компании откриваат малку детали. Сепак, „Лореал“ веројатно ќе придонесе со знаењето стекнато од 15 години истражување за процесот на стареење на кожата и скалпот. Тоа веќе им овозможи да развијат софистицирани алатки за да ја утврдат биолошката возраст на кожата, како и да идентификуваат состојки, а потенцијално и додатоци за орална убавина, кои можат да го подобрат здравјето на најголемиот орган во човечкото тело. „Лореал“ исто така развива електронски уреди за убавина, како што е ЛЕД-маска, и ги зголеми своите инвестиции во „Галдерма груп АГ“, производител на инјектирачки филери.

Лука де Мео беше доведен да ги „поправи работите“ во „Керинг“. Прва задача - „Гучи“ | Bloomberg

Од друга страна, „Керинг“ го зголемува својот дострел меѓу клиентите со висока нето-вредност, на кои веќе им служи преку своите брендови и ексклузивни настани. Главниот оперативен директор на „Керинг“, Жан-Марк Дупле, им рече на инвеститорите во октомври дека компанијата ќе ја искористи својата експертиза во пронаоѓањето атрактивни локации во големите градови за да понуди врвни искуства што комбинираат велнес и, делумно, медицинска нега во луксузна средина.

„Кристијан Диор“, бренд во сопственост на ЛВМХ (LVMH Moet Hennessy Louis Vuitton SE), има околу десетина спа-центри низ целиот свет, претежно во луксузни хотели. Особено се важни неговиот прв самостоен спа-центар и влезот на американскиот пазар за убавина, во реновираната водечка продавница на „Диор“ во Њујорк, која нуди третмани како што е „програма за среќа“, која користи светлосна терапија за стимулирање на серотонинот и допаминот - навестување за тоа каде би можела да се движи „от велнес“ ('haute wellness'), како што го нарекува „Диор“.

Богатите трошат на услуги за убавина и велнес. Брајан Џонсон е веројатно еден од најекстремните примери на милијардер што троши два милиони долари годишно на напредни протоколи што можат да го спречат стареењето | Кајл Грилот/Bloomberg

 

Но спа-центрите немаат монопол. Други физички локации, поддржани од модни брендови, исто така реагираат на желбата за здрав, активен начин на живот.

„Голден Гус СпА“, италијанскиот производител на патики, отвори падел-арена во Милано во септември, опремена со терени, продавница и социјален простор. Кит Ајви, нов клуб само за членови отворен во Њујорк од основачот на брендот за улична облека Рони Фиг, комбинира велнес, падел, јадење и малопродажба на една ексклузивна локација во Вест Вилиџ.

Влегувањето во медицински ориентирани програми за долговечност може да биде начин да се искористи желбата на супербогатите проактивно да управуваат со своето здравје. Но тоа носи и ризици, особено ако поекстремните третмани - како што е инјектирање тинејџерска крв за подмладување - станат мејнстрим. Како и со модниот пробив во угостителството, каде што секој оброк или соба што не ги исполнува очекувањата на клиент со висок профил го нарушува брендот, проблемите со, да речеме, хормонската терапија би можеле да бидат уште поразорни за вредноста на брендот. Доколку компаниите за убавина или луксузни производи тргнат по овој пат, тие мора да се осигурат дека третманите се научно засновани и беспрекорно изведени.

Некои богати клиенти сакаат медицинска нега во луксузна средина | Depositphotos

За оние што не се подготвени на „ладно нурнување“, колекциите или соработките инспирирани од благосостојба може да бидат поприфатлива опција. „Селин“ на ЛВМХ минатата година лансира колекција за пилатес, вклучувајќи и кетбели обложени со кожа вредни 3.000 долари. Друга опција е технолошки искусниот накит да биде естетски попривлечен, со оглед на популарноста на следењето на здравјето и луксузните додатоци. Исто така, додека костимите за капење често се фокусирани на гламурозниот изглед на плажите на Ибица, има простор за пофункционални, но сепак стилски костими за капење, непропустливи костуми или термални мантили. На пример, линијата спортска облека „Линеа роса“ на „Прада“ (Prada SpA) би можела да го преземе водството тука.

Алтернативно, луксузните брендови би можеле да се поврзат со благосостојбата преку маркетинг, охрабрувајќи нè да забавиме, да дишеме и да најдеме радост, сугерира Ерван Рамбург, аналитичар во „ХСБЦ холдингс“ (HSBC Holdings Plc). Продавницата во облик на брод на „Луј Витон“ во Шангај е фокусирана на физичкото патување; дали следниот „Луј“ би можел да биде посветен на внатрешното патување?

Што има во излогот, тоа го има и во продавницата. Влегувањето во медицински ориентирани програми за долговечност за модните брендови значи дека тие мора да обезбедат дека третманите се научно засновани и беспрекорно изведени. Во спротивно, постои ризик за репутацијата.| Depositphotos

Со зголемената употреба на лекови за слабеење, кои поттикнуваат тренинг за сила за зачувување на мускулната маса, Клаудија Д’Арпицио, која го води глобалниот моден и луксузен оддел во „Бен“ (Bain & Co.), предвидува повеќе тесни кроеви и стилови без ракави што нагласуваат тонирани раце. Дали е случајност тоа што првите модели на Демна Гвасалија за „Гучи“ имале потенки силуети?

И како што богатите живеат подолг и поактивен живот, тие може да имаат и поголема склоност да купуваат физички луксузни стоки. „Најмногу се честиме себеси кога се чувствуваме среќно и богато“, ми рече Марио Ортели, извршен директор на фирмата за луксузни консултантски услуги „Ортели“ (Ortelli & Co). Ако на тој список се додаде и грациозното стареење, трошењето за луксузни производи, кое обично достигнува врв во 50-тите години, би можело да се продолжи на уште многу години.

Од биохакирање до додавање сјај на прстените „оура“ (Oura), големата луксузна новогодишна резолуција треба да биде доведувањето себеси во форма.