Вештачката интелигенција најмногу се користи во креативните индустрии и маркетингот

Дали некогаш сте забележале како научната фантастика погрешно ја прикажува идната технологија? Наместо летечки автомобили, добивме вирални твитови кои поттикнаа културолошки војни. Наместо факс машина на вашиот зглоб, добивме мемиња. Слично на тоа, ја проверуваме реалноста со вештачка интелигенција.

Научната фантастика ја наслика иднината со компјутери кои обезбедуваат веродостојни информации со роботска прецизност. Сепак, компаниите кои се обиделе да вклучат алатки за генеративна вештачка интелигенција во нивната инфраструктура, со доза на непријатност откриле дека алатките „халуцинираат“ и прават грешки. Тие не се многу сигурни, не се крути и механички. Речиси се каприциозни.

„Мислевме дека вештачката интелигенција ќе биде Терминатор, но испадна дека е Пикасо“, вели Нил Кац, основач на „Ајлевел“ (EyeLevel.ai), стартап кој им помага на компаниите да пробаат модели на генеративна вештачка интелигенција со 95 проценти точност кога ќе се приклучат на нивните податоци. Ќе бидат потребни уште три до пет години „нагодување“ пред тоа ниво на доверливост да стане широко распространето со вештачката интелигенција, предвидува Кац, што значи дека технологијата би можела да биде значително корисна за основните операции на финансиските или здравствените компании. Тоа не значи дека генеративната вештачка интелигенција веќе не има трансформативно влијание врз индустријата. Тоа едноставно не се случува онака како што замислиле нејзините креатори.

Дури и кога фирмите ги зауздуваат трошоците и инвеститорите ги намалуваат нивните очекувања за лидерите во сферата на вештачката интелигенција како „Енвидија“ (Nvidia Corp.), креативните моќи на технологијата се прифаќаат во индустрии каде што „закочувањето на мозокот“ или „халуцинациите“ на технологијата може да бидат предност и каде што ризикот од грешка е помал. Размислете за маркетинг, игри и забава или кој било бизнис што вклучува нелинеарно размислување.

Влијанието на пазарот на трудот е веќе јасно. Изведувачите доминираат во креативните индустрии и, од лансирањето на ЧетГПТ (ChatGPT), има пад на побарувачката за дигитални хонорарни соработници за 21 отсто, според студија од ноември 2023 година од истражувачи од бизнис школата Харвард и две други академски институции. Најпогодени работни места се оние поврзани со пишување. Јаел Биран, искусен аниматор кој уживал во својата динамика од околу 12 проекти годишно, неодамна ми кажа дека неговата активност се намалила на само три во текот на изминатата година.

„Маркетингот е најдалеку во искористувањето на вештачката интелигенција“, се вели во неодамнешната белешка од „Ендерс анализис“ (Enders Analysis Ltd.), компанија за истражување на индустријата специјализирана за технологија, медиуми и телекомуникации, иако помалите огласувачи можат да користат алатки за генеративна вештачка интелигенција за да напишат маркетиншки копии или да генерираат постери и слики. Досега, една од најголемите пречки беше вештачката интелигенција да произведува точни рендери на логото на една компанија, ми кажа еден инженер за машинско учење во маркетинг фирма, но таквите технички проблеми лесно се решат со алатки како Фотошоп (Adobe Photoshop).

Минатата година, „Кока-кола“ (Coca-Cola Co.) објави реклама на Јутјуб (YouTube) делумно создадена со алатки за генеративна вештачка интелигенција, додека „Тојс ар ас“ (Toys 'R' Us) разви цела реклама со помош на алатката за генерирање видео на „Опен еј-ак“ (OpenAI) позната како СОРА (SORA), со, може да се каже, бизарен ефект. Слатката видео реклама прикажува младо момче чие лице прави суптилни, вонземски гримаси, потсетувајќи нè на недостатоците што генераторите на слики сè уште ги имаат.

Корисниците на Твитер ја преплавија рекламата со коментари нарекувајќи ја морничава, што беше вистина, но ја нарекоа и крајно неефикасна, што не беше точно. Рекламите генерирани од вештачка интелигенција штотуку започнуваат и најверојатно ќе наидат на приемчива публика. Сетете се дека сликите генерирани со вештачка интелигенција веќе го преплавуваат Фејсбук со бизарни прикази на „Шкамп Исус“ и сличен кич, што сугерира дека голем дел од јавноста им простува (или можеби ги занемарува) деформираните човечки раце какви што ги претставува генеративната вештачка интелигенција, а ја прифаќа нејзината живописна и малку надреална естетика.

Во меѓувреме, бизнисите неволно прифаќаат дека вештачката интелигенција има проблеми со вистината, нешто што требаше да биде очигледно од самиот почеток: бумот на генеративната вештачка интелигенција е поддржан од јазични модели кои можат да го предвидат следниот најверојатен збор во реченицата. Компаниите кои се обидуваат да ги вклучат овие модели во нивните збирки на податоци се мачат затоа што системите за вештачка интелигенција се обучени за текст. Моделите се борат да разберат бројки, финансиски табели, графикони или ракопис. Тоа е решлив технички проблем, но ќе биде потребно време, што ги прави халуцинациите препрека на патот до широка употреба на генеративната вештачка интелигенција. Како и да е, одреден период вештачката интелигенција ќе продолжи да биде подобра во пишувањето поезија отколку во решавањето математички задачи.

Можеби затоа главната технолошка директорка на „Опен еј-ај“, Мира Мурати, беше толку брутална во својата проценка за тоа како алатките на нејзината компанија ќе ги револуционизираат креативните вештини на луѓето. „Некои креативни работни места може да исчезнат, но можеби тие ни досега не требаше да постојат“, рече таа во едно неодамнешно интервју.

Проблемот со решавање на „халуцинациите“ во вештачката интелигенција може да потрае неколку години за банките, телекомуникациските и здравствените институции. На краток рок, сепак, креативните индустрии ќе бидат тие кои ќе се соочат со пресметка.

Во моментов нема коментари за веста. Биди прв да коментира...

Остави коментар