Сè повеќе жени креваат тегови - револуција во теретаните

Околу десетина луѓе се во движење во теретаната „Кранч Фитнес“ (Crunch Fitness), сместена во подрумот на една зграда на Менхетен, користејќи ја паузата за ручек за да вежбаат. Млада жена на сјајна сребрена решетка за чучњеви балансира шипка преку грбот, со два светло црвени гумени тегови на двата краеви. На неколку метри оддалеченост, еден млад човек го проверува телефонот помеѓу сетовите пасивни подигнувања. Зад нив има море од справи за зајакнување на нозете, вклучувајќи и нови машини за различни типови чучњеви. На пространиот долен кат од трикатната теретана неколку други членови прават стомачни, склекови и креваат тегови.

Што би рекла Џејн Фонд на новиот тренд? Depositphotos

На горниот кат, неколку нови високотехнолошки ленти за трчање стојат во голема мера неискористени.

Во текот на ударните, најфрекфентни часови, сите платформи за кревање тегови се зафатени, вели генералниот менаџер Руди Санчез. „Добрата вест е дека ги има многу и никој не се жали“, вели тој. Тоа не беше случај порано. Минатата година теретаната инвестираше два милиона долари во реновирање, претворајќи го јога студиото во дополнителна просторија за кревање тегови и набавувајќи голема количина нови тегови. „Сега се многу поретки жалбите дека се зафатени сите справи за вежбање“, вели Санчез. „Нема веќе караници“.

Слични промени се случуваат ширум САД бидејќи фитнес центрите се обидуваат да привлечат сè повеќе опсесивна популација фокусирана на мускулите. Од 2021 година пребарувањата на „Гугл“ (Google) за кардио тренинг се намалуваат за просечно три проценти годишно, додека интересот за тренинг за сила расте за шест отсто. И „Кранч холдингс“ (Crunch Holdings LLC) и „Планет фитнес“ (Planet Fitness Inc.) известуваат дека на многу локации го намалиле бројот на кардио машини за повеќе од 40 проценти. Тоа би можело да значи големи промени за повеќе од 90.000 фитнес центри во САД, кои минатата година остварија приходи од 41,8 милијарди долари, според „ИБИС ворлд“ (IBISWorld). Дури и „Пелотон интерактив“ (Peloton Interactive Inc.), поранешен лидер во кардио опрема, сега ги проширува своите понуди за тренинг за сила. Во декември тие ја лансираа апликацијата „Стрент плус“ (Strength+), која нуди прилагодени програми за тренинг за сила, заедно со аудио инструкции и следење на целите. Во последниот фискален квартал, како што беше објавено на февруарската конференција за објава на заработката, корисниците веќе изведувале речиси исто толку тренинзи за сила колку и што возеле статичен велосипед.

Веќе не е тренд да се биде слаб, туку да се биде здрав и силен. 

„Најголемата промена е значителното намалување на употребата на кардио справите - статични велосипеди, ленти за трчање и степери“, вели Џим Роули, извршен директор на „Кранч фитнес“. „Порано имавме клубови со 100 парчиња кардио опрема, сега можеби има 60 бидејќи едноставно клиентите веќе не ја користат.“

Пораката од Американците е јасна: трчањето на лента за трчање или потењето на статичен велосипед во соба полна со странци е минато - кревањето тегови е иднината. Но, пресвртот е во тоа што промените не се водени од мускулести мажи, туку од жени и постари Американци. „Сега повеќе од кога било досега тегови креваат постари луѓе, повеќе жени, па дури и млади луѓе“, вели авторката и фитнес инфлуенсерка Кејси Џонстон. „Кога почнав да кревам тегови, сè уште многу стравував дека е премногу 'мачо' и премногу интензивно за повеќето луѓе.“

Таа промена е видлива и во теретаните на „Кранч Фитнес“, вели Роули, каде што жените сега сочинуваат 45 проценти од членството. „Порано се сметаше дека олимписките дисциплини како кревање тегови во место и чучњеви се резервирани за мажи“, вели тој. „Сега повеќе од 50 проценти од употребата на платформи за кревање е од жени.“ Иднината на кревањето тегови, се чини, им припаѓа на жените.

Во текот на 70-тите и 80-тите години трчањето и џогирањето доминираа во светот на фитнесот, благодарение на рекламирањето на придобивките од кардио вежбите. Легендарниот тренер и иден коосновач на „Најк“, Бил Бауерман, ја објави книгата „Џогирање“ (Jogging) во 1967 година, со што започна американската „џогинг треска“. Пет години подоцна, Бауерман и Фил Најт ги претставија патиките за трчање „Најк Кортез“ (Nike Cortez).

Без стероиди Depositphotos

Кревањето тегови долго време остана на маргините, резервирано за џиновите како Арнолд Шварценегер.

„На запад имаме скулптури на мускулести тела уште од пред 3.000 години“, вели д-р Харисон Поуп, професор по психијатрија на Харвард и автор на „Комплексот Адонис“ (The Adonis Complex). Како што Шварценегер, Халк Хоган и други станаа ѕвезди во 80-тите, сè повеќе момчиња и мажи сакаа да изгледаат силно.

„Денес, мускулестите тела се толку распространети во филмовите, ТВ емисиите, цртаните филмови и рекламите што веќе едвај ги забележуваме“, вели Поуп.

Сепак, кардио-терапијата долго време доминираше во теретаните. Градењето мускули е тешко и бавно, а зголемувањето на мускулатурата во 1990-тите беше делумно поттикнато од широката употреба на стероиди, забележува Поуп.

Денешната опсесија со мускули е поттикната од социјалните медиуми. Речиси секој фитнес профил денес ги промовира бицепсите и обликуваните мускули како идеал за здравје. На Инстаграм има повеќе од 72 милиони објави со хаштагот #fitspo, додека хаштагот #fittok на ТикТок има повеќе од 62 милијарди прегледи, според една студија од минатата година.

Теретаните дури сега ги следат потребите на својата публика. Според Маик Виденбах, сопственик на луксузна теретана во Њујорк, влегувањето во просечна теретана до неодамна беше како „патување назад во времето“ низ „шума од ленти за трчање“.

Ковид пандемијата ги ​​забрза промените: повеќе од 11.000 теретани се затворија во 2020 година. Луѓето кои не можеа да користат траки за трчање и статични велосипеди дома почнаа да експериментираат со тренинзи за сила. Многумина ги задржаа тие рутини.

„Всушност, можете да добиете одличен тренинг за сила и кардио во исто време“, вели Ден Виле, директор на производи во „Лајф фитнес/Хамер стрент“ (Life Fitness/Hammer Strength), која сега поголем дел од своето портфолио го посветува на опрема за сила.

Силата и мускулната маса се клучните фактори за долговечност Depositphotos

„Планет Фитнес“, најголемиот ланец на теретани во САД, веќе почна со отстранување на кардио справите и проширување на просторите за кревање тегови. По тестирањето тие заклучија дека оптималниот број на кардио справи по локација треба да биде околу 60-65, а остатокот од просторот да се ослободи за справи со слободни тегови и функционални тренинзи.

Оваа промена, исто така, е придружена со културна промена: денес има значително повеќе жени и постари Американци во теретаните отколку порано. Виденбах забележува дека на почетокот на 2000-тите, теретаните биле строго поделени според полот. Денес, жените сочинуваат речиси 40 проценти од неговите клиенти.

Постарите луѓе исто така вежбаат сè повеќе и повеќе. „Сите денес зборуваат за долговечноста, а силата и мускулната маса се клучни фактори за долговечност“, вели Ноам Тамир, основач на „Ти-ес фитнес“ (TS Fitness) во Њујорк.

Со стареењето на луѓето се намалува и густината на коските и метаболичкото здравје, а тренингот за сила помага да се забават овие процеси за разлика од кардио тренингот. „Мускулната маса директно влијае на квалитетот на животот во староста“, вели Тамир.

И како што заклучува Џонстон, „Сега кога знаеме дека мускулната маса не е само естетска работа, туку е клучна за целокупното здравје, телесното зајакнување повеќе нема да биде само минлив фитнес тренд“.

 

 

Во моментов нема коментари за веста. Биди прв да коментира...

Остави коментар