Адвокатските фирми регрутираат се‘ повеќе експерти за ВИ

Четботови, научници за податоци, софтверски инженери. Поради тоа што клиентите бараат „повеќе за помалку“, адвокатските канцеларии вработуваат сè поголем број вработени кои ја проучувале технологијата, а не правото за да се обидат да се издвојат од нивните ривали.

„Адвокатските фирми се рекламираат како експерти за вештачка интелигенција повеќе од кога било досега“, вели Крис Тарт-Робертс, раководител на одделот за технолошко право во „Мекферленс“ (Macfarlanes), опишувајќи го трендот за кој вели дека започнал пред околу шест месеци.

„Конкуренцијата за таленти за технолошко право е жестока и постои веќе некое време“, додаде тој.

Револуцијата во генеративната вештачка интелигенција ја забрза потрагата во правната индустрија за поефикасна технологија. Многу фирми формираат тимови во обид да сфатат како да користат генеративна вештачка интелигенција во сите области на правната пракса и покрај тоа што ЧетГПТ, чет-ботот во сопственост на „Опен-Еј-Ај“ станува нешто кое предизвикува страв, но истовремено се прифаќа.

Правните услуги се најранливи на софтвер како ЧетГПТ, според една неодамнешна студија на Универзитетот во Пенсилванија. Тоа ја поттикнува загриженоста дека вештачката интелигенција би можела да замени значителен дел од трудот на  помладите правници. Широко достапната технологија е особено прилагодена за правна работа која одзема многу време, поради нејзината способност веднаш да анализира големи документи, да користи успешни аргументи врз основа на минати случаи или да создава прашања врз основа на однапред дефинирани критериуми.

„Ален и Овери“ (Allen & Overy) беше првата од „магичниот круг“ на врвни правни фирми во Обединетото Кралство што годинава објави дека ќе користи четбот за да им помогне на адвокатите да подготвуваат договори и белешки на клиентите. Ривалите сега пилотираат „правни асистенти“ со вештачка интелигенција како што е советникот на „Кесјтекст“ (Casetext Inc.), а тука е и „Брајан Кејв Лејтон Пејснер“(Bryan Cave Leighton Paisner), која започна со проба на софтверот во јуни.

„Тревирс Смит“ (Travers Smith) исто така со седиште во Лондон соопшти дека неодамна промовирала еден од своите софтверски инженери во улога на менаџер за вештачка интелигенција и бара да изгради приспособен модел на ВИ за компанијата. „Вагтменс“ (Weightmans) со седиште во Ливерпул оваа година ангажираше двајца помлади правни инженери за да ги задоволи барањата на клиентите за техничка експертиза, вели Катриона Волфенден, менаџер за иновации на фирмата.

Во „Мекферленс“, еден постар член на тимот сега студира магистерски студии по вештачка интелигенција на Универзитетот во Кембриџ. „Ален и Овери“ планира да додаде повеќе научници за податоци во својот тим од 20 правници и програмери кои работат на софтвер напојуван со вештачка интелигенција, кој може да подготви договорни клаузули или да ги олесни преговорите, вели Франческа Бенетс, партнер во фирмата.

„Тоа е непогрешлив тренд“, вели Кристина Блеклаус, правен консултант и претседател на „Лотек“ (Lawtech UK), проект поддржан од Владата за трансформирање на правната индустрија во Британија преку технологија. „Многу од ова е поттикнато од клиенти кои сакаат повеќе за помалку: поголема транспарентност и поекономични правни услуги“, додава таа.

Променливиот пејзаж на работни места ги менува дури и наставните програми на правните факултети. Универзитетот во Ливерпул сега нуди модули за да ги научи студентите да комуницираат со правните технолошки алатки, според Кејти Аткинсон, декан на училиштето за електротехника, електроника и компјутерски науки.

„Не е дека сите адвокати ќе бидат заменети со научници за податоци“, вели Аткинсон. „Повеќе е како да доаѓаа дел со нови улоги“.

 

Во моментов нема коментари за веста. Биди прв да коментира...

Остави коментар