Македонските инвестициски фондови уриваат рекорди

Октомври годинава ќе остане во убаво сеќавање меѓу друштвата кои управуваат со инвестициските фондови во Македонија со оглед на тоа што успеаа да срушат неколку рекорди. Имено, на последниот ден од октомври, нето вредноста на отворените инвестициски фондови во Македонија изнесуваше 1,92 милјарди денари односно 312 милиони евра, што е зголемување за повеќе од 109 милиони евра во однос на истиот месец минатата година кога нивната нето вредноста била 203 милиони евра и претставува нов рекорден износ.

Податоците на Комисијата за хартии од вредност покажуваат дека во октомври годинава вкупниот прилив на средства во отворените инвестициски фондови изнесува 46,4 милиони евра што споредбено со септември е зголемување за 179,4 проценти и убедливо најголем прилив остварен месечен прилив во 2024 година. Од друга страна, одливите во октомври се зголемени за 4,35 проценти во споредба со септември и изнесуваа 22,2 милиони евра.

Во октомври се забележува позитивна нето разлика на приливите и одливите во отворените инвестициски фондови од 24,2 милиони евра, што е исто така рекордна сума.

 

„Блумберг Адрија“ веќе пишуваше дека за разигрување на фондовската индустрија и за поголемо привлекување инвеститори треба да придонесат и алтернативните инвестициски фондови што ќе се појават на македонскиот пазар откако ќе се донесе соодветната регулатива. Како што најави министерката за финансии Гордана Димитриевска Кочоска на неодамнешната годишна конференција на Македонската берза, во следниот период се очекува да биде готов Законот за алтернативни инвестициски фондови, кој ќе овозможи работа на нови видови фондови, покрај отворените и затворените инвестициски фондови. Во алтернативни фондови влегуваат оние што инвестираат во други класи на финансиски инструменти, освен акции и обврзници, како што се фондови за ризичен капитал, хеџ-фондови, фондови за недвижности, стоки или финансиски деривати.

Во моментов нема коментари за веста. Биди прв да коментира...

Остави коментар