Владата подготвува предлог-закон за измени и дополнување на Законот за странци со кои се излегува во пресрет на барањата на „Бехтел и Енка“ за олеснување на постапката за ангажирање работна сила од странство потребна за реализација на проектите за изградба на патишта по коридорите 8 и 10 во Македонија. Со новата регулатива се предвидува да се поедностави постапката за сите правни лица кои имаат за цел да ангажираат лица-странци како работна сила во земјава.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести коишто ги издвоивме за почеток на денот.
ЕСГ влегува во македонската регулатива преку законот за сметководство
ЕСГ (животна средина, социјални прашања и управување, од англиски: ESG-environmental, social and governance) во 2025 година ќе влезе во македонската регулатива. Новиот закон за сметководство ќе биде донесен во текот на годината и тој ќе содржи обврски за известување кои се однесуваат на управувањето, животната средина и прашањата за вработените.
Првичниот текст на новиот закон за сметководство Министерството за финансии го објави на ЕНЕР во јуни 2024 година, но потоа беше повлечен. Јавна расправа не се одржа, неофицијално, текстот треба да се доработи. Сметководители пак за „Блумберг Адрија“ велат дека законот секако ќе биде донесен во текот на 2025 година, а дека е повлечен затоа што во него треба да се допрецизираат обврските кои се однесуваат токму на ЕСГ сегментот.
Европа гради премалку нови ветерни електрани за да ги исполни енергетските цели
Во 2024 година, ветерните електрани сочинуваа 20 отсто од вкупната потрошувачка на електрична енергија во Европа и 19 отсто во рамките на Европската унија, но изградбата на нови капацитети значително заостанува зад потребите. Според податоците на „Винд Јуроп“, ЕУ изградила 13 GW нови капацитети минатата година, што е далеку под 30 GW потребни годишно за да ги постигне своите цели за енергија и клима до 2030 година.
Три клучни проблеми го попречуваат растот на секторот – повеќето влади не ги спроведуваат новите правила за издавање дозволи на ЕУ, приклучоците на мрежата заостануваат, а бавното темпо на електрификација ја ограничува побарувачката за електрична енергија од обновливи извори. Еден од најголемите предизвици за секторот на ветерната енергија е бавната и комплицирана процедура за издавање дозволи. Иако новите правила на ЕУ стапија на сила, многу земји-членки сè уште ги немаат имплементирано во своето законодавство, а ситуацијата дополнително се влоши во текот на 2024 година.
Биткоинот падна на најниско ниво од ноември
Биткоинот падна на речиси двомесечен минимум откако инвеститорите се ослободија од поризични средства по наглото зголемување на приносите на обврзниците. Првата криптовалута вчера падна за 3,6 проценти на 90.957 долари, што е најниско ниво од 26 ноември и далеку под врвот од 108.316 долари што го достигна во декември. Останатите криптовалути исто така беа во минус, при што етерот вчера падна за 5,3 проценти до 11:36 часот во Лондон.
Посилните од очекуваните податоци за работните места во САД во петокот ги поттикнаа трговците да ги намалат облозите дека Федералните резерви може повторно да ги намалат каматните стапки во скоро време, влошувајќи го и онака променливиот почеток на 2025 година. „Почетокот на новата година не беше лесен за крипто-пазарот“, рече Алекс Купцикевич, главен пазарен аналитичар во „Фхпро“ (FxPro). „Дополнителен придонес кон вознемиреноста е фактот што минатонеделниот нагорен момент не успеа да се развие, туку само привлече продавачи“.
„Тесла“ за прв пат го престигна „Ауди“ во глобалната продажба на автомобили
„Тесла“ (Tesla Inc.) го надмина еден од најценетите германски премиум брендови на автомобили минатата година и покрај тоа што продаде помалку возила од очекуваното. „Ауди“ (Audi) на „Фолксваген“ (Volkswagen AG) продаде 1,67 милиони возила во 2024 година, што е за 12 проценти помалку од една година порано. Борбата со засилената конкуренција во Европа и Кина и слабата побарувачка за електричните модели го фрлија брендот зад „Тесла“ на Илон Маск, која испорача 1,79 милиони возила минатата година.
„Тесла“имаше година која не беше без проблеми. Американската компанија го забележа својот прв годишен пад на испораките за повеќе од една деценија и само тесно ја задржа предноста пред кинеската БЈД (BYD Co.) како најпродаван бренд електрични возила. Но, брзата експанзија на „Тесла“ во претходните неколку години ја позиционираше компанијата во можност да ги искористи сите пропусти на актуелните компании. Нејзиното спортско корисно возило (СУВ) „модел ипсолон“ се рангира меѓу најпродаваните автомобили во светот и добива фејслифт оваа година.
Цената на нафтата е на највисоко ниво во последните четири месеци
Цената на нафтата се искачи на највисоко ниво во повеќе од четири месеци, бидејќи новиот бран на американски санкции против руската енергетска индустрија се заканува да ги намали резервите, предизвикувајќи конфузија меѓу клучните увозници во Азија. Брент вчера напредуваше кон 81 долар за барел, откако поскапе за речиси 4 отсто во претходната сесија. ВТИ (West Texas Intermediate) стигна до близу 78 долари. САД во петокот ги воведоа своите најагресивни санкции досега за руската нафтена индустрија, насочени кон големите извозници, осигурителни компании и повеќе од 150 танкери.
Потезите – помалку од две недели пред новоизбраниот американски претседател Доналд Трамп да ја преземе функцијата – ги ставаат во центарот на вниманието Индија и Кина, каде што рафинериите би можеле да бидат принудени да бараат алтернативни набавки. Индија се појави како витален купувач на руска сурова нафта по инвазијата на Москва на Украина во 2022 година, а Кина е најголемиот увозник на нафта во светот. Фјучерсите во Шангај пораснаа.
.webp){kind=icon}
