Американскиот претседател Доналд Трамп идната недела ќе одбележи 100 дена од вториот мандат. Откако го преврте светот наопаку, меѓу другото и со царините за автомобилите, реши првата стотка да ја помине со работници од автомобилскиот сектор во Мичиген затоа што, како што вели, со своите царински политики тој ги штити токму нив. Истовремено, изјави дека нема да ги покачува даноците за најбогатите затоа што тоа може да ги натера да ги напуштат САД.
Добро утро, ова се останатите пет вести што се важни за почеток на денот.
Кои нови американски тарифи се на сила, кои на пауза, а кои се крчкаат?
Светот сѐ уште не може да се соземе од новата трговска политика што ја наметна администрацијата на САД предводена од претседателот Доналд Трамп, кој во изминатиов период покажа дека е способен да изврши силен притисок врз трговските партнери преку воведување енормни тарифи за увоз, но и лесно да ретерира во одлуките. Во обидот да ја преструктурира глобалната трговија тој предизвика тарифен галиматијас кој се менува буквално на дневна основа што носи неизвесност за бизнисите и оневозможува долгорочно планирање.
Како што пишува „Блумберг“ дури и со 90-дневната пауза на некои царини објавени на 9 април, новите увозни даноци што ги воведоа САД откако Трамп го започна својот втор мандат претставуваат најзначајна протекционистичка промена во земјата во повеќе од еден век и ја туркаат најголемата светска економија на непозната територија.
Поткастери наспроти инфлуенсери: Која е разликата и како заработуваат?
Во денешниот дигитален пејзаж, и поткастерите и инфлуенсерите ги привлекоа вниманието и интересот на публиката низ светот. Но по што се разликуваат и како заработуваат?
Според „Поткастерс јунајтед“ (PodcastersUnited), за волја на вистината, термините „поткастер“ и „инфлуенсер“ често се користат како синоними, но постои суптилна разлика помеѓу двете. Поткастер е едноставно некој што создава и води поткаст. Инфлуенсер, од друга страна, е некој што изградил публика и има моќ да влијае врз неа.
Можностите и моќта на поткастот: Како да заработите или да победите на избори?
Во ера на разновидни и многубројни медиуми, се чини дека поткастот релативно брзо се издигна меѓу мноштвото и го најде своето место. Знаеме дека љубителите на поткасти веднаш ќе забележат на тоа „брзо“, со оглед на фактот дека поткастот како формат за трансмисија на размислувања и информации постои веќе цели 20 години.
Сепак, поаѓаме од тоа дека поткастите ја добиваат својата заслужена слава во последната деценија, па оттука и споменатиот брз раст на популарноста. Во прилог на ова говори фактот дека во последните шест години речиси двојно се зголеми бројот на слушатели/гледачи на поткасти. Според официјалните податоци на „Статиста“ (Statista), во 2019 година на глобално ниво поткастите имале 275 милиони слушатели, додека лани бројката достигна 505 милиони.
Кендрик Ламар нов адут на „Гејторејд“ на пазарот за спортски пијалаци
Реперот Кендрик Ламар станува новото заштитно лице на една од најголемите маркетинг-кампањи во историјата на брендот „Гејторејд“ (Gatorade), додека „Пепси“ (PepsiCo Inc.), неговиот сопственик, настојува да ја задржи водечката позиција на сè поконкурентниот пазар на спортски пијалаци.
Кампањата, чија официјална презентација е планирана за петок, го вклучува добитникот на „греми“ и на Пулицеровата награда, како и низа спортисти на „Гејторејд“, како што се Кејтлин Кларк, Лука Дончиќ, Џејсон Тејтум, А’ја Вилсон и Шедур Сандерс. Рекламите ќе бидат премиерно прикажани викендов, за време на доигрувањата во НБА-лигата, а дополнителни промотивни активности се планирани на спортски настани како што се олстар-натпреварот на американската бејзбол-лига и драфтот во НФЛ (NFL).
„Нестле“ и „Унилевер“ најавуваат нови поскапувања
„Унилевер“ (Unilever Plc) и „Нестле“ (Nestlé SA) во првиот квартал објавија подобри продажби од очекуваното, откако ги зголемија цените за да ги компензираат растечките трошоци за суровини.
Двете компании, кои изгубија удел на пазарот поради инфлацијата за време на пандемијата, рекоа дека потрошувачите ќе треба да преземат дел од товарот бидејќи глобалната трговска војна и растечките цени на суровините повторно ги зголемуваат нивните трошоци.
.webp){kind=icon}
