Пет секунди беа доволни за да падне електроенергетскиот систем на Пиринејскиот полуостров. Причините за целосниот блекаут во Шпанија и Португалија во понеделникот сè уште се истражуваат, но иако срамежливо, прстот се посочува кон фотоволтаиците.
Тие направија проблем и во Македонија пред десетина дена. За прв пат, за велигденските празници, дел од нив беа исклучени, а оваа мерка ќе се применува и во наредниот период, најверојатно до октомври, а почнувајќи веќе од утре. Соларите се добри за животната средина, но многу предизвикувачки од технички аспект, велат познавачите.
Добро утро, ова се петте вести што се важни за почеток на денот.
И македонските инвестициски фондови „ранети“ во царинската војна на Трамп
Хаосот што го предизвикува царинската политика на американскиот претседател Доналд Трамп на светските берзи влијае и врз перформансите на македонските инвестициски фондови од почетокот на годинава, конкретно на оние што ги вложуваат парите на своите клиенти на берзите во САД, Европа и другите региони.
Речиси сите инвестициски фондови од типот акциски имаат негативни приноси од први јануари наваму, заклучно со 24 април, како последен ден со расположливи податоци на Македонската берза. Исклучок се само три фонда, каде што убедлив шампион е „КБ Инвест – златен фонд“, кој има принос од дури 29 проценти, пред „Вега финансии“ со околу три проценти и „КБ Инвест – МБИ10“ со нешто над еден процент во позитива.
ББА прогноза: Какви резултати ќе има „Македонски Телеком“ годинава?
„Македонски Телеком“ ја започна 2025 година со силна кампања за промоција на дигитални решенија за деловни корисници, првенствено дигитализација и дигитална безбедност. Ова не е изненадувачки бидејќи тоа е картата на која компанијата игра за да го помести растот на приходите од претходната ниска едноцифрена стапка на раст.
Со оглед на тоа што пазарот на мобилна телефонија е многу заситен и речиси и да нема простор за раст, освен ценовната компонента, во тој сегмент, силната инфраструктура им овозможува да бараат раст.
Војна на производителите на спортска опрема во Формула 1: Мекларен договори соработка со „Пума“
Мекларен Рејсинг (McLaren Racing) објави раскинување на соработката со британскиот производител на спортска опрема „Кастор“ (Castore) една година пред истекот на договорот, а од сезоната 2026 ќе соработува со германскиот бренд „Пума“ (Puma), кој ќе стане новиот официјален снабдувач на опрема за нивните тимови.
Договорот со „Кастор“, кој започна во 2022 година и требаше да трае до крајот на 2026 година, ќе заврши по сезоната 2025 година. Иако официјалните причини не се објавени, извештаите сугерираат дека проблемите со квалитетот на производот и достапноста на резервите влијаеле врз одлуката на Мекларен.
Зошто евтината нафта ги радува увозниците, а ги загрижува извозниците
Кога Доналд Трамп на 20 јануари го започна својот втор претседателски мандат, цените на нафтата беа блиску до летните максимуми. До почетокот на април паднаа на најниско ниво во последните четири години, а подоцна во текот на месецот забележаа само мало закрепнување.
Овој пад има сериозни последици за земјите извознички што тешко ги покриваат буџетските потреби при овие цени, како и за увозниците што профитираат поради пониските трошоци за енергија во сообраќајот и индустријата. Еве што треба да се знае кога станува збор за падот на цените на нафтата.
По месото од лабораторија, стартапи создаваат алтернативи на масло
Маслото кое на неодамнешното дегустирање во Њујорк го послужуваа на кисел леб беше лесно, кремасто и масно – токму онакво какво што би очекувале. Но, иако изгледаше и мирисаше како вистинско, не беше направено од млечни масти, туку од силен стакленички гас.
Масните киселини, соединенија на водород, кислород и јаглерод, се составни елементи на сите масти и масла во храната. Во природата ги создаваат растенија и животни, но стартапот „Сејвор“ (Savor) од Калифорнија ги реплицира тие молекули користејќи метан фатен при рударење на јаглен или дупчење на природен гас.
.webp){kind=icon}
