ББА прогноза: ЕЦБ ќе ја зголеми каматата за 25 базични поени

И покрај тоа што неизвесноста околу зголемувањето на референтната каматна стапка на ЕЦБ е најголема во изминатава година, очекуваме уште едно зголемување од 25 базични поени на денешната седница, вели Михаел Блажековиќ, аналитичар за пазари во аналитичкиот тим на „Блумберг Адрија“.  

„Имено, многубројни показатели за и против зголемување на каматните стапки се испреплетени, но очекуваме овојпат да преовлада фокусот на инфлацијата“, вели Блажековиќ.

Тој додава дека упорната базична инфлација во еврозоната е минимално ослабена според последното читање, но сепак е над очекувањата на ЕЦБ за забавување на растот.

„Дополнително, сè уште силниот пазар на труд и номиналниот раст на платите, а во последно време и реалниот раст поради олабавувањето на посилните инфлациски притисоци, одат во прилог на натамошно зголемување на референтните каматни стапки“, вели Блажековиќ.

Од друга страна, вели тој, има лоши економски податоци поврзани со индустрискиот извоз и фабричките нарачки на најголемата економија - Германија, како и со водечките показатели за расположението на менаџерите од производниот и услужниот сектор, кои се во контракција, што оди во прилог на запирање на растот на референтните каматни стапки.

„Затоа, со исклучок на одлуката за каматните стапки, ЕЦБ ќе има поголем фокус кон рамномерно истиснување на се‘ уште значителниот вишок ликвидност што не дозволува монетарната трансмисија целосно да функционира. Имено, монетарното истиснување на вишокот ликвидност ќе продолжи и во наредните месеци, особено поради тоа што во октомври годинава доспеваат обврзниците кои ЕЦБ ги откупи при одредени програми за QE“, вели Блажековиќ.

Според него, досега Германија и Франција учествуваа најмногу во квантитативното затегнување, односно ЕЦБ не ги реинвестираше нивните обврзници и на тој начин ги заштити земјите со висок јавен долг како Италија, Шпанија и Португалија.

„Сепак, во септември и октомври доспева долгот на Италија, Шпанија и Португалија од околу 100 милијарди евра, што може да создаде притисок врз распонот на нивните обврзници во однос на реперот и да ги зголеми приносите во случај на ново задолжување што би резултирало со зголемување на алокациите за камати, а со тоа и зголемување на буџетски дефицити“, вели Блажековиќ.

Тој додава дека иако пазарите на капитал даваат 65 проценти веројатност дека на денешната седница ќе има ново зголемување на референтните каматни стапки на ЕЦБ, централната банка нема да дозволи пазарите да помислат дека рестриктивната монетарна политика е завршена дури и доколку нема зголемување на референтните каматни стапки.

Во моментов нема коментари за веста. Биди прв да коментира...

Остави коментар