Веќе три дена на социјалните мрежи постојано ми се појавува спонзорирано видео. На него е премиерот Ковачевски насмеан, со многу насмеани земјоделци, нови трактори и друга механизација. Во видеото, премиерот кажува дека за субвенции за да се купи таа механизација и да се подобрат условите за работа на земјоделците, државата потрошила седум милијарди денари од најголемиот земјоделски буџет досега, тежок 12 милијарди денари.
Ама кај нас човек на ништо не може да се израдува. Исклучувам Фејсбук, си го отворам нашиот mk.bloombergadria.com и таму наслов, ДЗР откри хаос кај државната помош во земјоделството. Државните ревизори велат дека „поради отсуство на евиденција на доделена државна помош, Министерството нема воспоставени контроли за избегнување на двојното финансирање за иста намена и надминување на максималниот износ на помош“.
Највпечатливо ми беше ова: „Евиденција на државното земјоделско земјиште се води рачно, во табели, на локално ниво, без ажурирање на централизиран регистар по доставена ексел-табела“, велат ревизорите. Ете така. Во 2023 година, кога светот секојдневно ги турка напред можностите на вештачката интелигенција, нашите административци немаат ексел-табели.
Ама така е во држави во кои сè е наопаку, па површина е дното – како што многу прецизно се изрази претседателката на антикорупциската комисија, Билјана Ивановска.
Го имаме и лидерот за оваа недела. Термоелектричната централа Битола (ТЕЦ Битола) e најголемиот загадувач со сулфур диоксид и честички прашина во целиот Западен Балкан во 2022 година. Добро, криза беше, мораше да се обезбеди струја. Тоа би било оправдувањето. Но, оправдувањето е слабо ако земјава и натаму е зависна само од руски гас (енергент што се смета за помал загадувач) и тој влегува во земјава само преку една точка. Со години имаме само планови за диверзификација на изворите на снабдување.
Имавме план и до крајот на месецот да издадеме граѓанска обврзница, но анализите сè уште се во тек. Значи, планираните педесетина милиони евра ќе доцнат. А доцнат и оние 80 од солидарниот данок.
Од 1 јули ќе расте затезната камата. Ќе изнесува шест отсто, најмногу во 13 години. Тоа е резултат на минатонеделното последно подигнување на референтната камата од страна на НБРМ. Но мерките на централната банка многу бавно се пресликуваат на политиките на деловните банки, па кредитите растат, а додека е тоа така цените на недвижностите нема да паѓаат. За разлика од тука, во Британија хипотеките станаа скапи, што води до пад на цените на становите.
Високите камати ќе ги спуштат цените и на суровините, предвидоа аналитичарите на „Блумберг Адрија“ во својата редовна неделна анализа.
.webp){kind=icon}