Раст на просечната плата над инфлацијата пет месеци по ред

Годишен раст на просечната плата во август од 14,2 проценти регистрира Државниот завод за статистика во објава денеска. Коригирано за инфлацијата, зголемувањето е помало.

Според податоците, зголемувањето се должи на растот на просечната месечна исплатена нето-плата по вработен во секторите административни и помошни услужни дејности, каде што е забележан раст од 21,6  проценти, но и во секторите образование со раст од 17,5  отсто и градежништво од 16,5 проценти.

Просечната месечна исплатена нето-плата по вработен во август 2023 година изнесува 36.390 денари.

Во август годишната стапка на инфлација беше 8,3 проценти, што значи дека растот на платите реално е помал за тој процент, односно коригиран за трошоците за живот изнесува 6 проценти.

Аналитичкиот тим на „Блумберг Адрија“ смета дека малиот фонд на потенцијални работници продолжува да го фаворизира растот поради намалувањето на невработеноста, која падна за 10 отсто во однос на почетокот на 2022 година.

„Исто така, силниот прилив на странски инвестиции (6,4 проценти од БДП во 2022 година) и разните инфраструктурни проекти придонесуваат за натамошен недостиг од работници, а со тоа и притисок врз растот на платите“, вели Михаел Блажековиќ, аналитичар во „Блумберг Адрија“. „Во јавниот сектор номиналниот раст на платите е 15,8 отсто во однос на ланскиот осми месец, што го поддржува притисокот врз државниот буџет, што се гледа и од растот на буџетскиот дефицит годинава“.

Од друга страна, Македонија сè уште има најниски просечни плати во регионот Адрија.

„Македонската плата е само 65 отсто од просекот на целиот регион Адрија, додека во споредба со словенечките плати, кои се највисоки во регионот, таа е само 40 отсто. Токму поради споменатиот недостиг од работници, но и (бавното) постепено приближување кон просекот на ЕУ, очекуваме натамошен раст на платите во наредните месеци“, додава Блажековиќ.

 

Во моментов нема коментари за веста. Биди прв да коментира...

Остави коментар