Колку е тешко да се изгради пругата од 50 километри до Ниш

Изминуваат пет месеци откако македонските и српските власти ставија потпис на идејата да се изгради брза пруга од Скопје до Ниш. Од моментот на потпишувањето на меморандумот за соработка остана неодговорено прашањето кога оваа пруга ќе биде изградена од македонска страна, секако додека во меѓувреме во соседна Србија се работи на железничката инфраструктура на повеќе локации.

„Она што е преземено досега за реализација на овој инфраструктурен проект е формирањето мешана комисија, составена од претставници на министерствата за транспорт од двете земји“, велат за „Блумберг Адрија“ од ресорното министерство. Последен состанок оваа комисија одржала претходниот месец, на кој се разговарало за изработка на акциски план за секоја страна. Значи, допрва ќе се изработуваат проектна задача, сообраќајни анализи и анализи за животната средина, но и најоптимална варијанта за коридор на трасата. Впрочем, сето ова значи дека проектот не е дури ни на хартија. 

 

МИА

Пругата во должина од 50 километри ќе нè поврзе со Централна Европа

Патувањето од Скопје до Ниш е предвидено да трае два часа и уште час и половина до Белград, со брзина од 120 до 160 километри на час. На македонска територија треба да се изгради пруга долга 50 километри, од граничниот премин Табановце до Скопје, а дополнително и да се поврзе со скопскиот аеродром. Досега брзата маршрута е делумно подготвена само на територијата на Србија, делови на потегот од Белград до Нови Сад, а се работи и на делот од Белград до Ниш и од Ниш до границата со Македонија. Паралелно, кинески компании веќе ја градат брзата железничка пруга од Нови Сад до Будимпешта.

Македонија и Србија заедно ќе бараат пари за изградба на оваа пруга од фондовите на Европската Унија, бидејќи овој проект е во рамките на Отворен Балкан. Првичните процени се дека ќе бидат потребни 1,5 милијарда евра за изградба на пругата.

Доколку оваа пруга стане реалност, Македонија ќе се поврзе со Австрија, Унгарија Словенија, Хрватска, Србија, и со Грција, преку сеопфатна транспортна мрежа што ќе ги поврзува големите градови како Атина, Солун, Скопје, Ниш, Белград, Загреб, Љубљана, Будимпешта и Салцбург.

Македонската железница е во катастрофална состојба

Сепак, ако се земе предвид вложувањето во македонската железница досега, на земјава ќе ѝ требаат децении да ја изгради брзата пруга кон Србија. Најголемиот дел од пругите е изграден пред повеќе од сто години, кога била воспоставена врска меѓу македонската железница и централната и западната железничка мрежа во Европа. Македонија има 700 километри отворени пруги, 226 километри станични колосеци и 102 индустриски колосеци.

„Железницата може да се пофали единствено со новоизградената пруга Битола - Кременица, во должина од 18 километри, за што беа потребни осум години, и со реконструкцијата на делницата Куманово - Бељаковце, во должина 30,8 километри. На околу 90 километри од постојната пруга е планирана или е во тек реконструкција“, велат од Министерството за транспорт.

Само осум воза се предвидени во возниот ред годинава

Патнички возови годинава ќе нема од Скопје кон Кочани, Табановце и Кичево. На возниот ред објавен од македонската железница е планирано поаѓање само на осум воза дневно кон Гевгелија, Битола и Велес, а кон другите релации нема да сообраќаат возови, што значи дека граѓаните од Куманово, Тетово, Гостивар, Кичево, Кочани и Штип ќе немаат можност да го користат ова превозно средство.

Бројот на превезени патници во железничкиот превоз од година на година драстично се намалува. Ако во 2015 година со воз на годишно ниво во земјава патувале и над милион патници, лани таа бројка достигнала едвај 400.000 патници.

Покрај патничките возови, и годинава Македонија останува без меѓународни возови.