Пред Велигден: Во светот недостиг од јајца, во Македонија има за извоз

Македонскиот пазар е стабилен и снабден со доволни количества квалитетни и безбедни консумни јајца, соопшти Групацијата за живинарство при Стопанската комора на Македонија.

Неделава компаниите од овој сектор имале состанок со министерот за земјоделство Цветан Трипуновски и информирале дека „како традиционален производ што е дел од велигденските обичаи, јајцата се достапни во доволни количества во трговските мрежи, пазари и фармерски продавници“, наведе Групацијата.

„Најголемите производители и извозници на јајца најавија активна соработка со дистрибутерите и трговците со цел да се задоволи зголемената побарувачка во овој период од годината, а притоа цените да останат на конкурентно ниво, во согласност со пазарните трендови. Ресорното министерство и надлежните институции ги следат состојбите и се подготвени да преземат мерки доколку се јави потреба од дополнителна стабилизација“, се наведува во соопштението

Јајцата се опфатени со мерките на Владата за замрзнување на маржите на основните прехранбени производи на 10 отсто до 30 април годинава, што значи дека до Велигден цените нема да се зголемат.

Се укинува царината за увоз на оплодени јајца за домашни петли

Бројките на државната статистика потврдуваат дека јајца има и за извоз. Во јануари биле извезени јајца во вредност од 735.522 евра. Над половина од извозот завршил во Грција. Вредноста на увозот е двојно помала, а најмногу јајца се увезени од Србија.

Во вакви услови,Владата на последната седница расправаше за укинување на увозната давачка – царинска стапка за живински и птичји јајца во лушпа, свежи, конзервирани или варени.

Од Владата за „Блумберг Адрија“ објаснија дека станува збор за укинување на давачките за увоз на оплодени јајца за домашни петли.

„Станува збор за одлука со која се предлага укинување на увозната давачка – царинска стапка за живински и птичји јајца во лушпа, свежи, конзервирани или варени, оплодени јајца за инкубација од живина од видот домашни петли (Gallus domesticus), во рамките на количество од 40.000 килограми. Целта е на краток рок да се реши проблемот што е настанат во производство на еднодневни пилиња поради немањето доволно количество на оплодени јајца за инкубација во земјите членки на ЦЕФТА“, се наведува во одговорот од Владата.

Оттаму уште информираа дека „во периодот пред Велигден, со задоволство ги информираме граѓаните дека македонскиот пазар е стабилен и снабден со квалитетни домашни и увезени јајца“.

Лани драстичен раст на извозот 

Лани е забележан значителен раст на извозот на јајца. До пред две години земјава беше нето-увозник на овој производ, а лани извозот надмина шест милиони евра, што е двојно повеќе од 2023 година.

Од Македонија лани се извезени јајца во осум земји, а над половина од извозот завршил во Грција и Кипар.

Зголемената понуда на јајца се случува во време кога бројот на живина во земјава се намалува. Ова намалување не влијае на производството на јајца поради зголемената продуктивност (соодветна околина, раководење и опрема итн.), наведуваат од Групацијата за живинарство.

Во САД цената на јајцата експлодира поради голем недостиг

Цената на 10 јајца во САД во последните недели стигна до 10 долари поради голем недостиг на пазарот. За една година цената се зголеми за 159 отсто, а голем број трговци ги ограничуваат количествата што може да се купат.

Недостигот од производот е резултат на болеста птичји грип, која ги пустоши фармите во земјата.

Со болеста во претходните три години се борат и некои европски земји. Полска, Унгарија и Франција се најтешко погодени, а епидемија пред два месеца беше прогласена и во живинарска фарма во Португалија, во близината на Лисабон.

Турција – најголем добитник

Во вакви услови најголема добивка од недостигот од јајца на американскиот пазар има Турција, која го зголеми извозот кон САД за дополнителни 15.000 тони.

Од Централниот сојуз на производители на јајца во Турција соопштија дека од сега до јули земјата ќе испорача околу 240 милиони јајца, околу шест пати повеќе од количеството извезено во САД во цела 2024 година. Дополнителниот извоз ќе генерира приход од околу 26 милиони долари за Турција.

Во моментов нема коментари за веста. Биди прв да коментира...

Остави коментар