Ковачевски: Договоривме непречена испорака на јаглен и мазут од Грција

Енергетската криза со која што се соочуваме сите бара регионална соработка за надминување на претстојната критична зима, рече премиерот Димитар Ковачевски, кој присуствува во Атина на средба меѓу владини делегации од Македонија и Грција, кои што разговараат на тема ублажување и надминување на последиците од енергетската криза.

Премиерот Ковачевски истакна дека со Грција биле договорени неколку работи: непречено снабдување со лигнит и јаглен во следните шест месеци, со цел Македонија да може да има доволни количини суровини за непречено производство на електрична енергија во домашните капацитети. Договорена е и непречена испорака на мазут од Грција за потребите на ТЕЦ Неготино.

„Важно беше да се договориме за непречена испорака бидејќи веќе има недостиг од енергенси насекаде. И доколку се случи да има какво било ограничување на извозот од Грција, тоа нема да важи за нас“, тврди премиерот Ковачевски.

Тој информираше дека на средбата се разговарало и за други големи проекти за енергетска трансформација, како интерконекторот Евзони, за кој што е почната процедурата за анализа на економската исплатливост на овој проект.

„Веќе има понуди и ако се тече според планот изградбата на интерконекторот ќе почне до крајот од оваа година“, рече премиерот Ковачевски.

Влада/Премиерот Ковачевски во Атина

Владините делегации на двете држави разговарале и за изградба на голема гасна централа од страна на Грција во Македонија.

„Почнати се анализи за тоа и откако ќе се направат тие анализи, потоа ќе биде претставено на Влада и во Собрание како стратешка инвестиција“, рече премиерот Ковачевски.

Се разговарало и за проектот Чебрен, за кој што одново е почната процедура. После голем број неуспешни обиди, конечно овој пат има понуда од грчка компанија и ако е соодветна со очекувањата, премиерот Ковачевски се надева дека до крајот на годината ќе се потпише договор за проектот, чија изградба би траела неколку години.

Меѓу останатите спомнати проекти од секторот енергетика е и интерконекторот Александропулос, чија изградба треба да започне до крајот на следната година.

„Сметам дека на среден рок терминалот ќе биде ставен во функција и ќе може конечно да имаме гас кој што оди од југ до север, а не само тој што доаѓа од исток кон запад. Во моментот имаме само еден интерконектор за руски гас и дополнително разговараме за уште еден од Петрич до Струмица, преку кој би се снабдувале со азербејџански гас“, рече премиерот Ковачевски.

Во меѓувреме се уште нема конкретен договор со ТЕ-ТО за тоа дали ќе работи со полн капацитет. Според планот, ТЕ-ТО би требало да работи постојано, со што ќе обезбедува 70 проценти од топлинската енергија потребна за главниот град, а струјата од когенеративната потројка ќе биде наменета за потребите на стопанството.

„Сметам дека има добри шанси да се направи договор со ТЕ-ТО“, рече премиерот, според кого не се работи за убедување, туку за договор.

Инаку, на средбата во Атина, покрај премиерите на двете држави, од македонска страна присуствуваа и министерот за економија, директорите на ЕСМ и МЕПСО и претседателот на Стопанската комора, додека грчката делегација ја сочинуваа заменик министерот за економска дипломатија и надворешни работи, советник на грчкиот премиер за енергетски прашања, директорот на државната компанија за природен гас и останати претставници од секторот.

Во моментов нема коментари за веста. Биди прв да коментира...

Остави коментар