ЕУ планира отстапки за Трамп за да го ублажи ударот од американските царини

Европската Унија ги утврдува отстапките што е подготвена да ги направи кон администрацијата на Доналд Трамп за да обезбеди делумно отстранување на американските царини, кои веќе почнаа да го погодуваат извозот на блокот и кои треба да се зголемат односно да се прошират по 2 април.

На претставниците на ЕУ на состаноците неделава во Вашингтон им беше кажано дека нема начин да се избегнат новите автомобилски и таканаречени реципрочни царини што Трамп ќе ги воведе следната недела, според луѓе запознаени со разговорите. Инаку, почнаа и дискусиите за тоа како на крајот треба да изгледаат контурите на потенцијалниот договор за намалување на царините.

Тоа ја натера Европската комисија, која се занимава со трговските прашања за ЕУ, да почне да работи на листа на услови (англ. term sheet - документ што ги одредува условите за потенцијален деловен договор, поставувајќи ја основата за идни конкретни преговори меѓу две страни, станува збор за т.н. џентлменски договор што докажува сериозна намера, но генерално не е правно обврзувачки.) за потенцијален договор, кој би ги одредил областите за преговори за казнените трговски мерки, вклучувајќи и намалување на сопствените царини, меѓусебни инвестиции со САД, како и олеснување на одредени регулативи и стандарди, рекоа извори, кои зборуваа под услов да останат анонимни.

Реципрочните тарифи имаат цел да го ограничат тоа што Трамп го смета за неправедна давачка за американските стоки, како и нецарински пречки, како што се домашните регулативи и начинот на кој земјите собираат даноци, вклучувајќи ги и данокот на додадена вредност на блокот, дигиталните даноци и регулативите. ЕУ вели дека нејзиниот ДДВ е праведен, недискриминаторски данок што се применува еднакво и на домашната и на увезената стока.

Портпаролот на комисијата одби да коментира.

Процент на царини што економиите во светот ги бараат за увоз на американски производи Bloomberg Mercury

 

По овие вести, еврото накратко ги избриша загубите, а тргувањето се одвива по курс од околу 1,0794 долар. Европските обврзници благо ги намалија добивките, при што приносот на 10-годишните германски обврзници се намали за три базични поени, на 2,74 отсто.

Секој договор за кој  ќе преговараат неговите заменици, сепак на крајот ќе треба да биде одобрен од Трамп. Овој необврзувачки договор ќе биде основа за Европската комисија да разговара со САД откако ќе стапат во сила реципрочните царини, велат изворите. Тие царини најверојатно ќе ги погодат сите или поголемиот дел од стоките од ЕУ што се извезуваат во САД.

САД не го наведоа нивото на царини што ќе го применуваат за ЕУ, но официјалните лица во блокот очекуваат стапката да падне меѓу 10 и 25 отсто, велат изворите. Тие додадоа дека секој иден договор ќе биде тежок и дека нема да го врати статус квото.

Да потсетиме, шефот за трговија на блокот Марош Шефковиќ и шефот на кабинетот на претседателката на Европската комисија, Урсула фон дер Лајен, се сретнаа неделава со американскиот секретар за трговија Хауард Лутник, американскиот трговски претставник Џејмисон Грир и со директорот на Националниот економски совет, Кевин Хасет, за да разговараат за ситуацијата.

Преговорите со САД слабо напредуваа и ЕУ може малку да стори за да спречи воведување царини следната недела, објави претходно „Блумберг“.

Нецаринските прашања, како што се ДДВ, дигиталните даноци и неколку регулативи на ЕУ и стандарди за храна, беа истакнати за време на разговорите во Вашингтон, бидејќи администрацијата на Трамп ги фокусира своите напади на, според неа, нефер пречките за американските производи за кои САД веруваат дека придонесуваат за трансатлантската нерамнотежа што ја фаворизира Европа. ЕУ исто така отвори можност за дополнителни набавки на течен природен гас и американски производи од одбраната.

Трговска размена меѓу ЕУ и САД на стоки и услуги Bloomberg Mercury

 

Европските власти се обидоа да истакнат дека иако ЕУ има трговски суфицит од стоки со САД, блокот од 27 земји увезува многу американски услуги, почнувајќи од е-трговијата и социјалните медиуми до интернет-пребарувачите - сите дел од американската високотехнолошка индустрија, која неодамна се здружи со Трамп и неговиот круг на советници. Фирмите од ЕУ и од САД имаат повеќе од пет трилиони евра (5,4 трилиони американски долари) инвестиции на пазарите меѓусебно, според комисијата.

Покрај реципрочните давачки, САД планираат дополнителни царини за голем број сектори, вклучувајќи метали, автомобили, фармацевтски производи, граѓа и полупроводници. Трамп неделава најави и 25 проценти такса за увоз на автомобили и некои автоделови.

Во иднина се очекуваат царини и за другите сектори, велат изворите. Преговорите за тие секторски давачки може да бидат уште покомплицирани бидејќи целта на САД е да се зајакне американската индустрија и да се врати производството во САД.

Во текот на месецов САД воведоа царина од 25 отсто за увоз на челик и алуминиум, што ја принуди ЕУ да предложи свои одмазднички давачки за политички чувствителни американски стоки во вредност до 26 милијарди евра. ЕУ се консултира со владите и индустријата за целната листа и нејзиниот одговор се очекува да биде објавен до средината на април, по гласањето на земјите членки, што веројатно треба да се случи на 9 април, рече еден од изворите.

Трамп се закани дека ќе воведе царина од 200 отсто за европското вино, шампањ и други алкохолни пијалаци ако ЕУ продолжи со наметнатите царини за извозот на американското виски, кои треба да стапат во сила на 14 април.

Алатките на ЕУ со можни одговори исто така дозволуваат ограничувања што ги надминуваат царините, вклучувајќи и квоти за увоз, суспендирање на концесиите, како и активности за договори за јавни набавки, услуги и аспекти на интелектуална сопственост во трговијата, објави претходно „ Блумберг“.

Малку е веројатно дека блокот веднаш ќе одговори на реципрочните тарифи бидејќи ќе му треба време за процена што точно воведува Трамп, велат изворите. Министрите за трговија на ЕУ треба да се сретнат на 7 април за да разговараат за мерките на САД и потенцијалниот одговор на ЕУ.