Трамп се закани со нови царини за ЕУ и Канада ако се здружат против САД

Американскиот претседател Доналд Трамп навести дека ќе се воведат дополнителни царини за Европската Унија и Канада ако тие работат заедно „за да им нанесат економска штета“ на САД.

Вечерта во објава на социјалната мрежа Трут (Truth Social) Трамп рече дека големи царини, „многу поголеми од планираните“, ќе бидат воведени кон овие земји при развој на такво сценарио. Еврото накратко намали малку од добивката, а канадскиот долар падна.

„Ако Европската Унија соработува со Канада за да им нанесе економска штета на САД, големи царини, многу поголеми од планираните, ќе бидат воведени на нив за да го заштитиме најдобриот пријател што секоја од тие две земји го имала некогаш!“, објави Трамп.

Трамп во средата потпиша наредба со која се воведуваат царини од 25 отсто на увозот на автомобили, ескалирајќи ја трговската војна со цел да донесе повеќе работни места во САД. Овој потег ја поставува основата за повеќе царини следната недела, вклучувајќи ги ветените таканаречени реципрочни царини на 2 април и потенцијално продлабочувајќи ги тензиите со клучните трговски партнери. Други царини за специфични индустрии се исто така во подготовка, вклучувајќи и за дрвната граѓа, полупроводниците и лековите.

ЕУ се подготвува за контрамерки како одговор. Франција ја повика Европската комисија, која раководи со трговските прашања за блокот, да размисли за користење на своето најсилно трговско оружје  за првпат, извести „Блумберг“ претходно.

Во подготовка за трговските мерки на Трамп, ЕУ разменува идеи со некои од своите истомисленици, според високи официјални лица на ЕУ, кои зборуваа под услов на анонимност. Сепак, нема индикации дека блокот ја координира својата одмазда.

„Сега е клучно ЕУ да даде одлучен одговор на царините – мора да биде јасно дека нема да се повлечеме пред САД“, истакна денеска германскиот министер за економија Роберт Хабек во изјава испратена по електронска пошта. „Потребни се сила и самодоверба“.

Последните коментари на Трамп доаѓаат откако канадскиот премиер Марк Карни ги посети Франција и Обединетото Кралство минатата недела на своето прво странско патување за да предложи поблиска алијанса со европските сојузници.

„Сакам да осигурам дека Франција и цела Европа работат ентузијастички со Канада, најевропската од неевропските земји“, рече Карни во Париз.

ЕУ очекува реципрочните царини на Трамп следната недела да бидат со двоцифрена стапка низ блокот, според луѓе запознаени со ставовите во Брисел. Официјалните лица таму предвидуваат дека САД ќе користат единствена царинска стапка за ЕУ како целина наместо да поставуваат различни нивоа по земја членка.

Трговскиот шеф на ЕУ, Марош Шефчович, и шефот на кабинетот на претседателката на Европската комисија, Урсула фон дер Лајен, неделава се сретнаа со американскиот секретар за трговија Хауард Лутник, американскиот трговски претставник Џејмисон Грир и директорот на Националниот економски совет, Кевин Хасет, за да дискутираат за трговската ситуација.

Разговорите со САД направија незначителен прогрес односно има малку нешта што ЕУ може да ги направи за да спречи царините да бидат воведени, велат упатени извори, кои зборуваа под услов на анонимност. Одговорот на ЕУ на американските царини веројатно нема да следува веднаш, бидејќи блокот ќе треба да ги процени деталите.

Трамп смета дека реципрочните давачки ќе ги коригираат нетарифните бариери што тој ги смета за неправедни, како што се домашните регулативи и начинот на кој земјите собираат даноци, вклучувајќи го и ДДВ на ЕУ. ЕУ вели дека нејзиниот ДДВ е фер, недискриминаторски данок што се применува еднакво и на домашни и на увозни стоки.

Говорејќи пред новинарите во средата во Овалната соба, Трамп рече дека реципрочните давачки ќе бидат пониски од очекуваните.

„Ќе го направиме тоа за сите земји и ќе го направиме многу мазно“, рече Трамп. „Мислам дека луѓето ќе бидат многу изненадени. Во многу случаи тоа ќе биде помалку од царината што ни ја наплаќаа со децении“.

Обвинувањето на Трамп против автомобилскиот сектор ѝ додаде поголема болка на индустријата што се соочува со тешка перспектива во Европа. Регистрациите на новите автомобили во регионот во февруари паднаа за 3,1 отсто во споредба со претходната година, на 963.540 единици, соопшти неделава Европската асоцијација на производители на автомобили, бидејќи неизвесноста за економијата ги поттикна потрошувачите да се воздржуваат од поголеми купувања.

Германија е далеку најизложената земја членка на ЕУ од перспектива на автомобилските царини. САД минатата година увезоа нови возила во вредност од 24,8 милијарди долари од земјата, што е речиси половина од вкупно 52,3 милијарди долари испорачани од блокот.

„Порше“ (Porsche AG) и „Мерцедес“ (Mercedes-Benz Group AG) ќе бидат најтешко погодени од најновиот трговски напад на претседателот Доналд Трамп, соочувајќи се со потенцијален удар од 3,4 милијарди евра (3,7 милијарди долари) од новите американски царини на увезени автомобили.

Иако „Фолксваген“ (Volkswagen AG) и БМВ (BMW AG) се донекаде изолирани бидејќи произведуваат автомобили во САД, компаниите испорачуваат стотици илјади возила со висока вредност во земјата секоја година. Неколку европски бренда, вклучувајќи го и „Ферари“ (Ferrari), целосно се потпираат на увозот.

Други производители погодени од повисоките царини на автомобили увезени од ЕУ се „Стелантис“ (Stellantis NV), производителот на „џип“ (Jeep), „алфа ромео“ (Alfa Romeo) и „фиат“ (Fiat); „Јагуар“ (Jaguar Land Rover) на „тата“ (Tata Motors Ltd.); и „Волво“ (Volvo Car AB).

Во моментов нема коментари за веста. Биди прв да коментира...

Остави коментар