Стапија во сила и американските царини за увоз на автомобили

Царините од 25 отсто на увоз на автомобили во САД, воведени од претседателот Доналд Трамп, стапија во сила кратко по полноќ во Вашингтон, во потег што се очекува драматично да ги зголеми трошоците и да ги наруши синџирите на снабдување во индустријата.

Одредени делови за автомобили исто така ќе бидат погодени од истите царини најдоцна до 3 мај, според планот што Трамп го објави минатата недела. Мерките се очекува да додадат илјадници долари на цените на новите возила и да влијаат на продажбата во индустријата.

Воведувањето дојде откако Трамп во средата рече дека САД ќе постават царини од 10 отсто на сите земји што извезуваат во САД, плус дополнителни царини насочени кон околу 60 земји. Иако увезените автомобили и делови се изземени од таканаречените реципрочни царини, производителите на автомобили веќе се погодени од интензивната трговска војна на Трамп.

„Иако секторот можеби мисли дека избегна куршум, остануваме загрижени дека царините за возила и за делови се тука за да останат и ќе додадат значителен товар врз трошоците“, посочи аналитичарот на „Бернштајн“ (Bernstein), Даниел Реска, во белешка до клиентите.

САД исто така ќе ги задржат постојните царини од 25 отсто за Канада и за Мексико, а изземањето за стоки што се усогласени со договорот за слободна трговија меѓу земјите ќе остане на неодредено време, рекоа официјални лица. Тие царини првично беа воведени за да се поттикне акција за намалување на протокот на фентанил. Земјите ќе преминат на новиот царински режим ако тие почетни царини се укинат, посочија официјалните лица.

Иако најновиот потег во голема мера го избегна дополнителниот притисок врз индустријата, производителите на автомобили сè уште се соочуваат со значителни потенцијални зголемувања на трошоците и нарушување на синџирите на снабдување од новите царини на Трамп, насочени конкретно кон увезените возила и делови.

Извршни директори од автомобилската индустрија со недели лобираа кај администрацијата да го ограничат влијанието од трговската војна на Трамп. „Форд“ (Ford Motor Co.), „Џенерал моторс“ (General Motors Co.) и „Стелантис“ (Stellantis NV) неодамна се заложија за исклучување одредени евтини компоненти за автомобили од планираните царини.

Извршните директори од индустријата рекоа дека ја поддржуваат целта на Трамп за производство на повеќе автомобили во САД и проширување на производствената база на земјата. Но преместувањето на фабриките за склопување автомобили веројатно ќе трае со години и можеби никогаш нема да се случи за доставувачите на делови што немаат доволно средства.

Акциите на производителите на автомобили паднаа откако Трамп ги објави долгоочекуваните мерки. „Џенерал моторс“ падна за 1,6 отсто во тргувањето по работното време, додека „Тесла“ (Tesla Inc.) падна за 6,2 отсто, а „Стелантис“ (Stellantis) падна за 1,9 отсто. Акциите на „Форд“ (Ford) останаа непроменети.

Плановите за царини на Трамп веќе ја потресоа индустријата дури и пред да стапат во сила конкретните царини за секторот. Купувачите на автомобили се упатија кон салоните во САД за да ги заклучат договорите пред потенцијалното зголемување на цените предизвикано од царините. Тоа ја зголеми продажбата во март на годишна стапка од околу 17,8 милиони возила, најмногу од април 2021 година, според аналитичарот на „ЏП Морган“ (JP Morgan), Рајан Бринкман.

„Мерцедес“ (Mercedes-Benz Group AG) размислува дали да ги повлече од американскиот пазар своите најевтини автомобили, како што е малиот теренец ГЛА (GLA), бидејќи царините би ги направиле тие возила економски неисплатливи, објави „Блумберг“.

Во моментов нема коментари за веста. Биди прв да коментира...

Остави коментар