ЕУ вети дека ќе одговори со контрамерки на американските царини од 20 отсто

Европската унија, најголемиот трговски партнер на САД, вети дека ќе возврати откако претседателот Доналд Трамп објави огромни царини против блокот во неговиот обид да го разбие глобалниот трговски систем.

Трамп, говорејќи вчера од Белата куќа, објави царина од 20 отсто за увозот од ЕУ, која ќе стапи на сила на 9 април. Тој откри различни давачки за одредени земји, вклучително и стапка над 50 проценти за Кина.

„Најавата на претседателот Трамп е голем удар за светската економија“, рече претседателката на Европската комисија, Урсула фон дер Лајен, во своето видео обраќање. „Се подготвуваме за дополнителни контрамерки за заштита на нашите интереси и бизниси доколку не успеат преговорите“.

Таканаречените реципрочни царини на Трамп треба да ги таргетираат сите трговски бариери со кои се соочува извозот на САД во странство, како што се давачките, домашните регулативи и даноците. Фон дер Лајен претходно изјави дека ЕУ „држи многу карти“, вклучително и одмазднички тарифи насочени кон американските услуги и технолошки компании.

Американските мерки претставуваат закана да избришат голем дел од проширувањата на европско подрачје, што Европската централна банка (ЕЦБ) ги предвидува за оваа и следната година. Влијанието врз инфлацијата е помалку јасно, што ги спречи претставниците на ЕЦБ да се посветат на каков било исход на нивниот следен состанок на 17 април.

Најновите американски мерки доаѓаат откако Трамп објави увозна царина од 25 отсто за челик и алуминиум, како и за автомобили и некои од клучните автоделови. ЕУ објави сет на контрамерки во вредност до 26 милијарди евра (28,1 милијарди американски долари) како одговор на давачките за металите, кои се очекува да стапат на сила во средината на април. Трамп рече дека ќе објави други секторски давачки за производи, вклучувајќи граѓа, фармацевтски производи и полупроводници.

Што велат економистите на „Блумберг“?

„ЕУ ќе се обиде да преговара за договор за барем да го намали износот на американските царини. Без договор, таа ќе продолжи да се одмаздува на Вашингтон“, велат аналитичарите Џејми Раш и Антонио Баросо. 

Трамп се закани дека ќе воведе царина од 200 отсто за европското вино, шампањ и други алкохолни пијалоци доколку ЕУ продолжи да наметнува такси за извозот на американското виски (царината за тоа треба да стапи во сила на 14 април).

Франција и другите земји ја повикаа комисијата која се занимава со трговските прашања за ЕУ, да размисли блокот да го примени инструментот против присила - најмоќната трговска алатка на ЕУ, дизајнирана да возврати на нациите кои насилно користат трговски и економски мерки, објави претходно „Блумберг“.

Таканаречениот инструмент АЦИ (ACI – Anti-Coercion Instrument) никогаш претходно не бил активиран и може да доведе до ограничувања на трговијата и услугите, како и да опфати одредени права на интелектуална сопственост, странски директни инвестиции и пристап до јавни набавки.

Bloomberg Mercury

 

Министрите за трговија на ЕУ треба да се сретнат на 7 април за да разговараат за мерките на САД и одговорот на ЕУ.

Фон дер Лајен вети цврст и пропорционален одговор на царините, но исто така посочи дека ЕУ претпочита да избегне конфронтација, а да најде решение преку преговори во наредните недели.

Говорејќи по најавата на претседателот, неговиот секретар за финансии ги повика другите земји да не возвраќаат. „Не би се обидел да се одмаздам“, изјави Скот Бесент за телевизијата „Блумберг“. „Додека не возвраќате, ова е највисоката стапка“, рече тој.

Комисијата работи на листа на можни отстапки што би можела да ги направи кон САД, со цел да се постигне спогодба за отстранување или намалување на давачките. ЕУ сака да склучи џентлменски, необлигаторен договор, кој што ќе служи како основа за натамошни преговори и при тоа ќе ги определи областите за преговори за царини, взаемни инвестиции со САД, како и олеснување на одредени регулативи и стандарди, објави претходно „Блумберг“.

Шефот за трговија на ЕУ, Марош Шефчовиќ, минатата недела отпатува за Вашингтон за да разговара за трговските прашања со американскиот секретар за трговија Хауард Лутник, американскиот трговски претставник Џејмисон Грир и директорот на Националниот економски совет Кевин Хасет. Тој не беше успешен во укинување на новите тарифи, но тие почнаа да ги мапираат контурите на потенцијалниот договор за намалување на давачките, објави „Блумберг“.

Нетарифните прашања, како што се данокот на додадена вредност, дигиталните даноци и неколку регулативи на ЕУ и стандарди за храна беа истакнати за време на разговорите во Вашингтон. ЕУ вели дека нејзиниот ДДВ е праведен, недискриминаторски данок кој подеднакво се применува и на домашната и на увезената стока.

Bloomberg Mercury

 

Администрацијата на Трамп ги фокусираше своите напади на, според неа, нефер бариери за американските производи за кои САД веруваат дека придонесуваат за трансатлантска нерамнотежа што ја фаворизира Европа. ЕУ, исто така, ја покрена можноста за дополнителни набавки на течен природен гас и производи од областа на одбраната.

Европските власти нагласија дека иако ЕУ има трговски суфицит со стоки со САД, блокот од 27 земји увезува многу американски услуги, почнувајќи од е-трговија и сајтови на социјалните медиуми до интернет пребарувачите - сите дел од американската индустрија за висока технологија која неодамна се придружи на Трамп и неговиот круг на советници. Фирмите од ЕУ и САД имаат повеќе од пет трилиони евра (5,4 трилиони американски долари) инвестиции на пазарите меѓусебно, според Комисијата.

Германија е најтешко изложена на акциите на Трамп поради нејзиниот трговски суфицит од 92 милијарди евра во стоки со САД во 2024 година, според Евростат. Нејзината водечка автомобилска индустрија е особено во фокусот, што ја комплицира борбата на секторот со влошената позиција во Кина и транзицијата кон електрични возила.
Трговското назадување ќе ги намали очекувањата за брзо враќање од двегодишниот пад и тоа токму во моментот кога идниот канцелар, Фридрих Мерц, се подготвува да ги зголеми трошоците за одбраната и инфраструктурата за да ја врати економијата на вистинскиот пат.

 

Во моментов нема коментари за веста. Биди прв да коментира...

Остави коментар