Кина ги откажува нарачките од „Боинг“ среде трговската војна

Кина им нареди на своите авиокомпании да не прифаќаат повеќе испораки на авиони од „Боинг“ (Boeing Co.) како дел од ескалацијата на трговската војна со САД, во која претседателот Доналд Трамп воведе царини до 145 отсто на кинеските производи, според извори запознаени со ситуацијата.

Пекинг исто така побарал од кинеските превозници да запрат со купување опрема и делови за авиони од американски компании, велат упатените, барајќи да останат анонимни бидејќи станува збор за чекори што не се од јавен карактер.  

Наредбата доаѓа откако Кина воведе одмазднички царини од 125 проценти на американските производи изминатиот викенд, посочуваат изворите. Тие тарифи сами по себе би ја зголемиле цената на американските авиони и делови повеќе од двојно, правејќи го непрактичен потегот на кинеските авиокомпании да прифаќаат авиони од „Боинг“.

Кинеската влада исто така разгледува начини да им помогне на авиокомпаниите што изнајмуваат авиони од „Боинг“ и се соочуваат со повисоки трошоци, велат упатените.

„Боинг“ се затече во средината на брзорастечкиот спор меѓу двете најголеми економии во светот, иако ситуацијата е сложена и може да се промени во секој момент. Трамп се повлече од некои американски царини, вклучувајќи ги и царините на ајфони увезени од Кина.

Околу десет авиони „боинг 737 макс“ (Boeing 737 Max) се подготвуваат да влезат во флотите на кинеските авиокомпании, вклучувајќи по два за „Чајна Саутерн ерлајнс“ (China Southern Airlines Co), „Ер Чајна“ (Air China Ltd.) и „Шамен ерлајнс“ (Xiamen Airlines Co.), според податоците од АФГ (Aviation Flights Group). Некои од авионите се паркирани близу фабриката на „Боинг“ во Сиетл, додека други се во Жушан во источна Кина, според веб-страницата на фирмата за следење на производството.

Документите за испорака и плаќањето за некои од овие авиони можеби биле завршени пред да стапат во сила реципрочните царини објавени од Кина на 11 април и за тие авиони можеби ќе биде дозволено да влезат во земјата, велат некои од изворите.

Цивилната авијациска администрација на Кина не одговори на барањето за коментар. „Боинг“ одби да коментира. Претставниците на „Чајна Саутерн ерлајнс“, „Ер Чајна“ и „Шамен ерлајнс“ исто така не одговорија на барањата за коментар.

Минатата недела „Блумберг“ извести дека „Џунјао ерлајнс“ (Juneyao Airlines Co.) го одложува приемот на авион „боинг 787-9 дримлајнер“ (Boeing 787-9 Dreamliner), кој требаше да го добие за околу три недели.

За „Боинг“, застојот е нов удар на еден од најголемите пазари за продажба на авиони во светот.

Се предвидува дека Кина ќе сочинува 20 отсто од глобалната побарувачка за авиони во следните две децении, а во 2018 година речиси една четвртина од производството на „Боинг“ заврши во азиската земја. Но американскиот производител на авиони не објавил голема нарачка во Кина во последните години поради трговските тензии и самонаметнатите проблеми.

Кина прва го приземји „737 макс“ (737 Max) во 2019 година по две смртоносни несреќи. Трговските спорови со администрацијата на Бајден и во првиот мандат на Трамп исто така помогнаа кинеските нарачки да се насочат кон европскиот „Ербас“ (Airbus SE).