Политиките на Трамп наспроти берзите: Од еуфорија до паника во неколку чекори

Американскиот претседател Доналд Трамп продолжува да ги изненадува земјите и пазарите со своите ненадејни и остри одлуки, продлабочувајќи ги трговските конфликти со целиот свет, дури и со неговите најблиски соработници. Неизвесноста и непредвидливоста што ги носи Трамп ги вознемирува инвеститорите и носи рекордни нивоа на нестабилност на берзите.

Во својот последен потег, чија цел е „да ја направи Америка повторно голема“, американскиот претседател потпиша извршна наредба со која се воведува царина од 25 отсто за увоз на автомобили, која ќе стапи на сила на 2 април и ќе влијае на сите автомобили што не се произведуваат во САД. Трамп ги нарече тарифите „трајни“ и рече дека не е заинтересиран за преговори за исклучоци и дека ќе воведе дополнителни царини за Европската унија и Канада доколку, како што вели, тие работат заедно за да „предизвикаат економска штета“ на САД.

Паника, паника и уште паника – има ли одмор за инвеститорите на берзите?

Значи, непредвидливите потези на американскиот претседател Доналд Трамп предизвикаа голема нестабилност на пазарите - од акции преку обврзници до криптовалути. Откако малку стивна паниката околу потенцијалната рецесија во САД, се појавија стравувања дека американските акции ќе станат помалку ликвидни. Ова повторно ги турна берзите во режим на паника и распродажба, по што следеа декретите на Трамп за воведување царини за увоз на автомобили. Така, откако Трамп беше инаугуриран, инвеститорите речиси и да немаа време да здивнат.

Да потсетиме дека вредностите на американските акции пораснаа, берзанските индекси и биткоинот надминаа неколку рекорди, бидејќи инвеститорите беа прилично оптимисти кога Доналд Трамп победи на претседателските избори во САД. Многу инвеститори тогаш очекуваа дека американските берзи ќе продолжат да уриваат рекорди во 2025. Сепак, неколку месеци по победата и инаугурацијата на Трамп, можеме да видиме дека американските берзи се во минус од почетокот на годината.

„Верувам дека скокот на американските берзи што го видовме по победата на Трамп е само привремен, а не долгорочен. Ако го споредиме ова опкружување со времето кога Трамп првпат беше избран во 2016 година, тогаш не им требаше долго време на нашите клиенти да додадат многу нови акции во нивните портфолија. Овој пат, одговорот беше различен, свесни сме дека последните две години беа силни на пазарот на акции, вреднувањата беа повисоки, сè уште има постојана инфлација и моментално сме неутрални кога станува збор за распределбата на средствата и очекуваме нестабилноста да продолжи“, вели Адам Филипс, главен инвестициски директор во „ЕП Велт Адвјазорс“ (EP Wealth Advisors), за „Блумберг Адрија Конект“ (Bloomberg Adria Connect).

Кога ќе ги погледнеме резултатите што ги забележаа американските индекси од почетокот на годината, тие дефинитивно се во минус. Индексот S&P 500 од почетокот на годината забележа загуби од 2,82 отсто, Nasdaq Composite потона дури 7,38 отсто, а Russell 2000 индексот потона за 7,10 отсто.

„Овогодинешните податоци покажуваат дека диверзификацијата конечно повторно функционира. Во текот на изминатите две години, повеќето инвестиции беа направени во акции на неколку технолошки компании, таканаречените ‚Величествени седум‘, додека оваа година е поинаква. Ако ја исклучиме „Величествената седумка“ и ако ни остане индексот S&P 493 (наместо S&P 500), пазарите всушност работат со два отсто добивка, што е околу четири долари над поширокиот индекс, така што диверзификацијата е тема на годината и таа функционира“, објаснува Филипс.

Со наметнувањето царини од страна на Трамп, потоа одложувањата и промените на мислењето, Филипс вели дека инвеститорите едноставно „живеат од најава до најава“. „Мислам дека дел од оваа несигурност се создава намерно, во обид да ги задржи трговските партнери и инвеститорите фокусирани на Соединетите држави“, вели Филипс.

Bloomberg Adria

Во Фед не се сигурни што се случува

Да потсетиме, Федералните резерви ги задржа каматните стапки непроменети, од 4,25 до 4,5 отсто, и покрај тоа што најави забавен економски раст и повисока инфлација.

„Федералните резерви навистина не се сигурни што се случува и каде одат работите. Претседателот на Фед, Џером Пауел, го употреби зборот ‚неизвесност‘ 16 пати за време на неговата прес-конференција минатата недела, и тие чекаат повеќе податоци како и останатите. Фактот што не ги намалија каматните стапки и не планираат да го сторат тоа во скоро време, значи дека не веруваат дека Америка е во опасност од рецесија и дека веруваат дека економијата е во добра состојба, иако има знаци за нејзино слабеење“, рече Филипс.

Филипс не се согласува со ставот на Доналд Трамп дека Фед треба да ги намали каматните стапки. „Лесно е да се критикува Банката на федерални резерви од страна. Нивната работа не е лесна и мислам дека во целина тие направија добра работа досега и паметно е да чекаат податоци и да носат внимателни одлуки, наместо да брзаат да ги намалат стапките, иако сите, вклучително и Трамп, ќе го сакаат тоа. Кога ќе се смират инфлациските притисоци, тие ќе можат да и помогнат на економијата со намалување на стапките, но ако тоа се направи прерано, постои ризик од враќање на инфлацијата, што може да ја загрози довербата на потрошувачите, како и самата економија. Тоа се случи во 1970-тите и тие сакаат да го избегнат тоа сега“, објаснува Филипс.