Како „Бушерон“ го освои пазарот на луксузниот накит?

Од основањето во 1858 година, „Бушерон“ (Boucheron) работи како една од најпрестижните луксузни куќи за накит во светот, но парискиот бренд не постигна масовна комерцијална присутност во САД како „Булгари“ (Bulgari), „Картие“ (Cartier) или „Ван Клиф и Арпелс“ (Van Cleef & Arpels).

Меѓутоа, тоа почнува да се менува. По една деценија експанзија во Азија, „Бушерон“ во септември го отвора својот прв бутик во Њујорк, а во наредните години планира да отвори продавници во Беверли Хилс, Лас Вегас и Мајами.

Ова растечко влијание го одразува успехот на брендот. Според извештајот за заработка за првиот квартал од 2024 година, кој го објави матичната група „Керинг СА“ (Kering SA), „Бушерон“ е еден од ретките брендови што забележаа двоцифрен раст.

Зошто „Бушерон“ е толку популарен додека пазарот на луксузот малку се намалува полека низ светот? Купувачите на луксузен накит почнаа да бараат нешто различно од иконските парчиња како „Алхамбра“ на „Ван Клиф и Арпелс“ и љубовната белезица на „Картие“, дизајни што се толку популарни што станаа сеприсутни - и често копирани. Сега клиентите трагаат по стилови што се повеќе „под радар“.

„Бушерон“ нуди голем број такви парчиња, особено во своите смели колекции на луксузен уникатен накит што изгледаат поинаку од сè што е видено на пазарот досега.

„Потрошувачите што моментално го движат пазарот на луксузот сѐ повеќе ги привлекуваат карактеристични безвременски парчиња од реномирани брендови, а ’Бушерон’ се издвојува“, вели Грант Мобли од списанието „Онли натурал дајмнондс“ (Only Natural Diamonds). „Нивните креации го привлекоа вниманието на ултрабогатите купувачи, кои повеќе ги ценат стилот и изработката отколку впечатливите дизајни што често се фалсификуваат“.

Куќата секоја година претставува по две колекции на луксузен накит под креативно водство на директорката Клер Шусн. Колекцијата „Историја на стилот“ (Histoire de Style) во јануари се враќа во наследството на „Бушерон“ со традиционален дизајн, додека колекциите „Карт бланш“ (Carte Blanche) во јули се поавангардни, користејќи материјали и техники што може да се опишат како надвор од овој свет. Во еден ѓердан од 2020 година, Шусн користела аерогел што го изолира роверот на НАСА на Марс.

Овие ремек-дела може да бидат пообемни и да ги комбинираат најретките скапоцени камења со поскромни материјали, како што е кристалот (кварц), што е карактеристично за оваа куќа. Најновата колекција „Ор блу“ (Or Bleu - „сино злато“) го истражува светот на водата инспириран од необичните пејзажи на Исланд.

Еден од најинвентивните примери е ѓерданот од 148 сантиметри, кој претставува водопад што достигнува речиси до колена. Друг, направен од кристални кругови со дијаманти, имитира капки вода што се шират по езеро. Украс за уши со дијаманти симулира кршење бранови.

„Ова е спектакуларно не само по креативноста на дизајнот туку и по техниката“, вели Френк Еверет, потпретседател за накит во „Сотбис“ во Америка. „Како го направиле тоа парче? Како успеале да ги вклопат сите тие дијаманти со кристалите?“

Ѓерданот „Ајсберг“ е инспириран од плажата Фелсфјара со црн песок, која е покриена со парчиња од санти мраз што заринкале; мајсторите од „Бушерон“ потрошиле 2.000 часа на спојување издлабени кристали и дијаманти за неговата изработка. Еверет наведува дека и покрај својот див изглед - и секако дивите цени - овие скапоцени камења се носат со уживање и донесуваат големо задоволство. „Едно од прекрасните нешта кај уникатните парчиња е тоа што ви треба само една личност што го сака токму тоа парче“.