За возила на струја ни треба квантен скок во приходите

Доколку не се случи чудо во растот на просечните приходи на македонското население или додека на пазарот не излезат електрични автомобили со многу пониски цени од сегашните, Македонија уште долго ќе чека зелена транзиција на возниот парк, во кој денес убедливо доминираат возилата на фосилни горива. Тоа го сигнализира истражувањето на Европската асоцијација на автопроизводители (АЦЕА), кое покажува дека во земјите каде што населението има поголеми просечни годишни нето-приходи многу е поголем пазарниот удел на електрични автомобили.

Шведска лидер во пазарниот удел на електричните возила

Според истражувањето, електричните автомобили учествуваат со 21,6 отсто во бројот на новите автомобили регистрирани во ЕУ во 2022 година, но тие имаат пазарен удел од само 9 проценти или помалку во повеќе од половина од земјите-членки.

Во земјите каде што електричните возила имаат пазарен удел помал од 9 проценти, како што се неколку земји од Централна, Источна и Јужна Европа, меѓу кои се Грција, Италија, Полска и Хрватска, просечниот годишен нето-приход е околу 13.000 евра по работник. Највисоките удели (над 30 проценти) се концентрирани само во пет земји од Северна и Западна Европа, каде што годишниот нето-приход надминува 32.000 евра.

Во Шведска, каде што годишниот нето-приход е над 35.000 евра, повеќе од половина од новорегистрираните автомобили имаат електричен погон. Спротивно на тоа, електричните возила имаат пазарен удел од само 4 проценти во Бугарија, каде што приходите се околу 7.000 евра.

„Овие бројки потврдуваат значителни разлики во достапноста до електрични возила помеѓу различни региони во Европа, при што Северна и Западна Европа водат со највисоки удели, а Централна, Источна и Јужна Европа претставуваат најниски удели“, се вели во истражувањето на АЦЕА.

Македонија далеку од целосна промена на возниот парк

На патиштата во Македонија денес се возат помалку од 200 електрични возила, што е занемарлива бројка во однос на вкупниот број регистрирани возила. „Блумберг Адрија“ веќе пишуваше дека, според податоците од Царинската управа, во земјава лани биле увезени вкупно 52 електрични возила. Златко Муцунски, генерален директор на „Порше Македонија“, тогаш потврди дека  уделот на електричните возила во вкупниот пласман на компанијата е сè уште мал, но и дека нивната процентуална застапеност е во согласност со движењето на трендот на европскиот пазар.

„Трендот на европскиот пазар бележи сè поизразено зголемување на уделот на електричните возила во вкупната продажба. Очекуваме споредлива динамика и кај резултатите на ’Порше Македонија’ во иднина. Колку за илустрација, за оваа година веќе имаме планирана продажба од околу 200 електрични автомобили“, изјави неодамна Муцунски.

Ако се земе предвид дека просечниот годишен нето-приход по вработен во Македонија се движи околу 6.200 евра, станува јасно дека сè уште е многу мал бројот на македонски граѓани што можат да си дозволат купување електрично возило.

Позитивно во однос на ова прашање е што на пазарот на електрични возила веќе се јавува силна конкуренција, како и тоа што некои од производителите увидоа дека цените на возилата се превисоки. Така, Илон Маск во неколку наврати ги намали цените на одредени модели на возилата „тесла“, што колку-толку ги прави подостапни за заинтересираните купувачи во Европа и во Македонија.

Сепак, иако има очигледно зголемување на интересот за купување ваков вид возила и мал пад на цените, европските трендови покажуваат дека бавно ќе оди зелената транзиција на возниот парк во Македонија, со оглед на тоа што пазарниот удел на електричните возила во земји каде што населението има двојно поголеми приходи отколку Македонците е под 10 проценти.

Во моментов нема коментари за веста. Биди прв да коментира...

Остави коментар