Вештачка интелигенција ќе прима нарачки во рестораните на „Вендис“

Синџирот на ресторани за брза храна „Вендис“ (Wendy’s Co.) следниот месец ќе започне со тестирање на четбот поддржан од вештачка интелигенција, кој ќе разговара со купувачите и ќе прима нарачки на пултот за пристап со автомобили.

Системот, поддржан од софтверот за вештачка интелигенција на „Гугл клауд“ (Google Cloud), ќе звучи еднакво природно како да разговарате со вработен и ќе има способност да го разбере вашиот говор и да одговара на често поставувани прашања, велат од компанијата.

„Вендис“ е еден од неколкуте ресторани кои вклучуваат вештачка интелигенција и автоматизација за да ја подобрат услугата за клиентите, додека се борат со недостигот на работна сила. Згора на тоа, популарноста се зголемила за време на пандемијата, при што синџирот вели дека 80 отсто од клиентите претпочитаат да нарачуваат на овој начин.

Ова „создава огромна можност за нас да обезбедиме навистина диференцирано, побрзо и речиси бесконтактно искуство за нашите клиенти“, изјави главниот извршен директор, Тод Пенегор.

Интересот кај инвеститорите и јавноста за четботови со вештачка интелигенција се зголеми по претставувањето на ЧетГПТ (ChatGPT) на „Опен еј-ај“ (OpenAI) минатата година. Тоа ја поттикна трката меѓу технолошките гиганти, вклучително и матичната компанија на „Гугл“ (Google), „Алфабет“ (Alphabet), кои се трудат да ја имплементираат новата технологија во светот на бизнисот.

Мислењата за тоа што ќе значи вештачката интелигенција за работниците и компаниите се многу различни, и варираат од прогнози за масивно нарушување до маргинални промени. Според мислењето на „Престо“ (Presto Automation), компанија која нуди платформа со вештачка интелигенција за нарачки од ресторани, технологијата ќе ја размрда индустријата.

„Мислам дека за три години нема да има пулт за нарачка од автомобил на кој ќе работи човек“, изјави  за телевизијата „Блумберг“, Кришна Гупта, претседател и привремен извршен директор на „Престо“.

„Вендис“ го промовира својот четбот во продавница во сопственост на компанијата во близина на Колумбус, Охајо и се обидува да ги намали грешките во комуникацијата преку автоматизирање на процесот.

Користењето на вештачка интелигенција за примање нарачки може да се исплати за „Вендис“ бидејќи заостанува зад конкурентите во поглед на времето за чекање на нарачките и прецизноста, според компанијата за анализа на податоци „Интач“ (Intouch Insight).

Компанијата, исто така, годинава се обдидува да го забрза растот и започнува план за реструктуирање со цел да ги намали трошоците. Синџирот неодамна објави заработка за првиот квартал од годинава. Неодамнешните резултати од конкурентите како „Мекдоналдс“ и „Чипотле“ ги надминаа очекувањата на Волстрит, што сугерира дека потрошувачите сè уште јадат во ресторани.