Кредитниот рејтинг на Македонија останува ист, Србија за прв пат доби инвестициска оценка

„Фич“ го потврди долгорочниот стандарден рејтинг на Македонија на „ББ+“ со стабилна перспектива.

Во соопштението на агенцијата објавено на терминалот на „Блумберг“ е наведено дека оваа оценка на земјата е поддржана од конзистентните макроекономски политики кои го поткрепуваат девизниот курс врзан со еврото, како и заложбите за пристапување во ЕУ кои делуваат како сидро за реформите на среден рок.

Наспроти овие фактори, агенцијата потсетува и на ризиците – високата евроизација на банкарскиот сектор и високата структурна невработеност, кои делумно се слика на големата неформална економија и неусогласеноста на вештините на пазарот на труд, заедно со слабиот раст на продуктивноста.

Раст на дефицитот

„Фич“ анализира дека по преземањето на власта, новата влада ја ревидираше прогнозата за фискалниот дефицит за 2024 година од 3,4 на 4,9 отсто од БДП.

„’Фич‘ констатира дека големата ревизија е поттикната од откривањето на заостанатите долгови кон различни изведувачи од приватниот сектор направени од претходната администрација (околу 1,3 п.п. од БДП), како и политичката одлука на новата влада да ги зголеми пензиите и некои плати во јавниот сектор од октомври 2024 година (уште 2 п.п. од БДП)“, стои во соопштението.

„Фич“ предвидува умерено намалување на дефицитот на 4,3 отсто од БДП во 2025 година и 3,8 отсто во 2026 година.

Долгот ќе расте

Траекторија на долгот ќе расте, констатира реномирана агенција

„Долгот на општата влада на Северна Македонија изнесуваше 52,1 отсто од БДП заклучно со првата половина од 2024 година, 'Фич' проектира континуиран раст на односот на долгот со БДП при што ќе биде премината границата од 60 отсто наведена како цел до 2027 година. Спроведувањето на кредибилна среднорочна стратегија за постојано намалување на дефицитите ќе биде клучно за стабилизирање на траекторијата на долгот“, наведува „Фич“.

Унгарски кредит

„Во четвртиот квартал од годината, очекуваме властите да финализираат 15-годишен заем од 500 милиони евра (3,5 отсто од БДП во 2024 г.) со Унгарија по стапки под пазарните за да се задоволат ревидираните буџетски потреби и делумно да се финансира еврообврзницата од 500 милиони евра која достасува во јануари 2025 година“, се вели во соопштението.

„Фич“ очекува поголемо потпирање на домашните емисии на хартии од вредност во 2025-2026 година и не очекува дополнително повлекување од линијата за претпазливост и ликвидност (PLL) од 200 милиони евра од ММФ, која ќе истекува во ноември 2024 година.

Бавен раст

По растот од 1 отсто во 2023 година, економијата оствари просечен раст од само 1,8 отсто на годишно ниво во првата половина од 2024 година, главно поради слабите економски перформанси во Германија (каде оди 44 отсто од македонскиот извоз) и покрај силната приватна потрошувачка и инвестициите во земјата.

По растот од 2,2 отсто во 2024 година, агенцијата очекува раст во просек од 3,5 отсто во 2025-2026 година, делумно поттикнат од изградбата на транспортните коридори 8/10д. И покрај силните инвестиции, слабата продуктивност и лошата демографија влијаат на потенцијалниот раст.

Србија има инвестициски рејтинг

Србија доби инвестициски рејтинг од „Стандард и Пурс глобал“. Агенцијата и даде оценка на земјата БББ-/A-3.

„Стандард и Пурс“ ја подигна и проекцијата за економскиот раст на Србија на четири проценти за оваа и за следните неколку години, како што се наведува во соопштението на рејтинг агенцијата.

„Силната домашна побарувачка, делумно поддржана од инвестициите во инфраструктурата поради проектот „Експо 2027“, нè натера да го проектираме растот на БДП на Србија за оваа и за следните неколку години на четири проценти“, се вели во соопштението.

Изгледите за кредитниот рејтинг се стабилни, додаваат тие. „Силните надворешни браници заедно со доволните и се поразновидни странски директни инвестиции ќе дејствуваат против можните надворешни ризици“, се додава во соопштението на агенцијата.

Од агенцијата додаваат дека поповолно сценарио подразбира подобри фискални резултати и уште побрз економски раст од проектираниот и дека тогаш рејтингот може дополнително да се подигне. Може да дојде до влошување на изгледите или намалување на рејтингот поради значително влошување на ситуацијата во економиите на главните трговски партнери на Србија. Во секој случај, голема улога ќе имаат геополитичките тензии и капацитетот на Србија да ги избегне и да го држи под контрола нивното влијание врз економијата.

Агенцијата за кредитен рејтинг наведе и дека очекува буџетскиот дефицит да се зголеми од минатогодишните 2,4 отсто од БДП на 4,3 отсто поради повисоките инвестиции во одбраната и поголемите инвестиции и увоз.