Турската економија без здив, стапките остануваат 50 отсто

Турската централна банка веројатно ќе ја остави својата главна каматна стапка во мирување петти месец по ред, при што фокусот ќе биде префрлен на управувањето со ликвидноста и видливите знаци на забавување на економскиот раст.

Се очекува Одборот за монетарна политика предводен од гувернерот Фатих Карахан да ја остави еднонеделната репо-стапка на 50 отсто, покажува истражувањето на „Блумберг“ меѓу економистите. Политиката засега треба да остане затегната, тврдат оттаму, со цел да се постигне целната стапка на инфлација од 38 отсто. Во моментот стапката е 62 процента. Одлуката за монетарната политика ќе се носи во вторник. 

Економистите велат дека фокусот на централната банка ќе биде на комплементарни чекори за затегнување, како што е управувањето со условите за ликвидност, додека стапките ќе останат на исто ниво. Прекумерната понуда на лири, поттикната од високата референтна стапка и оживеаниот странски интерес за турските средства, остана загрижувачка бидејќи може да резултира со пониски стапки на депозитите и да ја поткопа затегнатата монетарна политика.

Официјалните лица презедоа неколку мерки за стерилизирање на вишокот ликвидност, вклучувајќи и задолжување преку главната клириншка куќа и одржување аукции за купување лири. Карахан истакна во презентацијата претходно овој месец дека банката ќе го диверзифицира својот сет на алатки за управување со прекумерната понуда.

„Изобилството на лири на пазарот доведе до тоа централната банка од средината на 2023 година повремено да биде нето-заемопримач, а од 12 јули и континуирано е тоа“, рече Селва Бахар Базики од „Блумберг економикс“ (Bloomberg Economics), која очекува монетарната власт да „управува со неповолната инфлација со дополнително заострување, а со користење алтернативни алатки“.

Годишната инфлација драстично падна минатиот месец, најмногу благодарение на споредбата со базата од минатата година. Од друга страна, месечната инфлација, показател што го преферира централната банка, беше нестабилна. Официјалните лица сакаат да видат одржлив пад таму пред да почнат да разговараат за какво било намалување на стапките.

Очекувањата на компаниите и на домаќинствата за инфлација, уште една клучна метрика за централната банка, се исто така повисоки од изгледите на официјалните лица. Зголемените очекувања влијаат на цените и на побарувачката, а нивното однесување е од суштинско значење. 

Според прелиминарните податоци, забавувањето најверојатно ќе стане поизразено во втората половина од годината. Централната банка соопшти дека веќе почнува да забележува пад на незадолжителните трошоци.

Ладењето е дополнително видливо во економската активност. Мерката на турската производствена активност е под 50 - прагот што ја дели експанзијата од контракцијата - во последните четири месеци. Индустриското производство падна за 4,7 отсто на годишно ниво - најлош пад од смртоносните земјотреси во февруари 2023 година. Невработеноста забележа најголем месечен скок во последните три години, а според економистите на „Гаранти ББВА рисрч“ (Garanti BBVA Research), таа стапка може дополнително да се зголеми.

„Забележуваме посилно забавување на агрегатната побарувачка кон крајот на вториот квартал и очекуваме рестриктивната монетарна позиција и построгите финансиски услови да овозможат подлабока корекција во третиот квартал“, велат економистите на „Гаранти“, вклучувајќи го и Али Батухан Барлас. „Големината на очекуваната фискална консолидација и времетраењето на затегнатата монетарна позиција ќе бидат одлучувачки за изгледите за растот“.

Во моментов нема коментари за веста. Биди прв да коментира...

Остави коментар