ЕУ може да избегне рецесија со ефективна акција во енергетиката

Европа може да избегне рецесија доколку функционерите задолжени за монетарната и фискалната политика се договорат за ефективни мерки за справување со зголемените трошоци за енергија, изјави комесарот за економија на Европската унија, Паоло Џентилони.

„Имаме шанса, ако работиме заедно, монетарната политика и фискалната политика и со вистинскиот пакет за енергија сега, да избегнеме рецесија“, им рече Џентилони на новинарите пред состанокот на министрите за финансии на ЕУ во Прага.

„Тоа е предизвик, но тоа е можно“, додаде тој.

Европа е зафатена од својата најтешка енергетска криза во последните 50 години, бидејќи Русија ги намалува испораките како одмазда за санкциите воведени поради нејзината инвазија на Украина. Напливот на инфлацијата ја интензивираше кризата со трошоците на животот, туркајќи ги европските економии на работ на рецесија.

Лидерите преговараат за ограничување на цената на увозот на руски гас дури и откако претседателот Владимир Путин предупреди дека Москва ќе го прекине снабдувањето доколку се воведе таков механизам.

Минатата година рускиот гас покри околу 40 отсто од побарувачката на ЕУ. Повеќето земји наоѓаат алтернативи за руските испораки, но домаќинствата и компаниите најверојатно ќе се соочат со принудни намалувања на енергијата во постудените зимски месеци.

Европската централна банка во четвртокот ја намали прогнозата за раст на еврозоната следната година од 2,1 проценти на само 0,9 проценти.

„Постои ризик од рецесија“, изјави луксембуршката министерка за финансии Јурико Бакес за новинарите во Прага, додавајќи дека властите имаат „голема одговорност да преземат мерки и да не дозволат тоа да се случи“.

„Треба да ги координираме чекорите на ниво на ЕУ бидејќи мерките преземени во една земја влијаат врз соседите. Ние сме под инфлациски стрес, сите ние треба да преземеме одговорност за поддршка на компаниите и домаќинствата“, рече Бакес.

Во моментов нема коментари за веста. Биди прв да коментира...

Остави коментар