Утрово станав рано, рано за да месам леб. Син ми, уште нерасонет, ме праша дали ќе му ја наместам пак паричката, затоа што, нели, леб се меси само за Бадник. И не ми е криво што станав толку рано, затоа што децата веднаш се вратија од училиште поради нова дојава за бомба, па го јадеа лебот топол. Тоа ја обележи неделата во земјава – недостиг од леб и дојави за бомби, кои повторно ги затворија децата дома.
Според експертите, кога во 2021 година Владата првпат ги замрзна цените на лебот, земјава имаше најниска инфлација во регионот. Но потоа ги одмрзна, па почна да експериментира со други мерки и сега сме во ситуација да имаме највисока инфлација, која најтешко се намалува. Според аналитичарите на „Блумберг Адрија“, и годинава земјава ќе се бори со двоцифрена стапка.
И во еврозоната останува проблемот со високата базична инфлација и токму тоа е причината за смртта на евтините пари.
Depositphotos
Во вакви услови, цените на становите уриваат рекорди, што нè натера да анализираме колкав стан и каде би можеле да купиме за 100.000 евра. Но високите цени на недвижностите не се пресликуваат на приходите на општините, иако данокот на имот е нивна изворна давачка, па тие тонат во долгови.
Ниту на државата не ѝ цветаат рози на овој план. Пари за да ги покрие старите долгови ќе мора да позајми, а по откажувањето на еврообврзницата, услови за задолжување стануваат сè полоши.
БДП лани се слизна на 2,1 отсто од 3,9 во 2021 година, откако економијата дополнително забави во четвртиот квартал од годината. Забавувањето се гледа и во финансиските извештаи на некои од компаниите за лани. Други пак, имаат производ кој се продаде и во Белата Куќа и во Бакингемската палата.
За разлика од земјава, каде што полиците за леб се празни, светот се занимава со други работи. На пример, како да се полнат фондовите во време на роботизација и како да се зголеми примената на „зелениот“ водород во индустријата.
.webp){kind=icon}